ရန်ကုန်သီတဂူ- ပုဂံညောင်ဦး လေ့လာရေး ခရီးအဖွဲ့ (၂၀၁၃)

သီတဂူ-ပုဂံလေ့လာရေး ခရီးပြီးဆုံး

သီတဂူကမ္ဘာ့ဗုဒ္ဓတက္ကသိုလ် (ရန်ကုန်) ကျောင်းသား ကျောင်းသူများ အဖွဲ့သည် ၇-၁၂-၂၀၁၃-ရက်နေ့ ညနေပိုင်းက စတင်ထွက်လာရာ ၉-၁၂-၂၀၁၃ ရက် ညနေပိုင်း ပြီးဆုံး။ ၁၀-၁၂-၂၀၁၃ ရက်နေ့ မနက်ပိုင်း ရန်ကုန်ပြန်ရောက်။

အညာမြေ လတန်ဆောင်ရဲ့ ရာသီကလဲ နွေးနွေးထွေးထွေး ရှိလှသည်။ စာရေးသူတို့ လေ့လာရေးအဖွဲ့သည် ၈ ရက်နေ့ မနက်စောစော ပုပ္ပါးတောင်ခြေက စွယ်တော်မိုးကုတ်ဝိပဿနာရိပ်သာတွင် ခေတ္တနားခိုသည်၊ မျက်နှာသစ်၊ ကိုယ်လက်သုတ်သင်ပြီး မနက်စာကို ထိုရိပ်သာမှ ဆရာတော်ကြီးနှင့်တပည့်များက ကပ်လှူသဖြင့် ထိုနေ့မနက်စာအတွက် အဆင်ပြေသွားသည်။ ဆရာတော်ကြီးများကလည်း နွေးနွေးထွေးထွေးကို ကြိုဆိုပြီး အနာဂတ် အမျိုးဘာသာ သာသနာအတွက် အညွှန့်တလူလူ တိုးထွက်လာသည့် ကြုံရခဲမျှသော ကျောင်းသားသံဃာများနှင့် သီလရှင်ဆရာလေးများကို ဆွမ်းကပ်ခွင့်ရသည်။ ပုပ္ပါးတောင်ပေါ်သို့ တက်ရောက် လေ့လာကြသည်။ “အတက်ဒူးကွေး အဆင်းဒူးတုန်” ဆိုတဲ့အတိုင်း ခြေတောက်တွေ မသယ်ချင်လောက်အောင် မောပန်းလှသည်။ သိပ်လှပတဲ့ ပုပ္ပါးတောင်တော်နှင့် ၀န်းကျင် တောတောင်တို့မှ ဖြတ်တိုက်ခက်လာသော လေနုနုတို့သည် စာရေးသူတို့ အမောကို ပြေစေသည်၊ တုန်ရီနေတဲ့ ဒူးတွေ ခြေသလုံးကြွက်သားတွေလည်း လန်းဆန်းလာစေသည်၊ အားအင်တွေ ပြည့်လာစေသည်။

စာရေးသူသည် ပုပ္ပါးတောင်ပေါ်သို့ ၂ ကြိမ်မြောက် ရောက်ခြင်းဖြစ်သည်။ ထိုနှစ်ကြိမ်တို့သည် နှစ်ကွာခြားသည်နှင့် အနေအထားလဲ ကွဲကွာသွားသည်၊ ၂၀၀၇-၂၀၀၈ သီတဂူကမ္ဘာ့ဗုဒ္ဓတက္ကသိုလ် (စစ်ကိုင်း) ပညာသင်နှစ် ဘီအေ နောက်ဆုံးနှစ်ဖြစ်သလို ပထမဆုံးသော ဘီအေဘွဲ့ရ အသုတ်ဖြစ်သည်။ ထိုနှစ်မှာပဲ ဘီအေနောက်ဆုံးနှစ် ကျောင်းသားအဖြစ် ပထမအကြိမ် ပုဂံ-ညောင်ဦး-ပုပ္ပါး လေ့လာရေးခရီးအဖြစ် လာရောက်ခဲ့ဖူးသည်။ ယခုအကြိမ်မှာတော့ အမ်အေ (ဒဿနိကဗေဒ)အပြီး၊ ပါရဂူတန်းအတွက် စာတန်းတင်ပြီး၍ သီတဂူကမ္ဘာ့ဗုဒ္ဓတက္ကသိုလ် (ရန်ကုန်)၏ ကထိကအဖြစ်၊ ဦးဆောင်အဖြစ်နှင့် ဤလေ့လာရေး ခရီးကို စတင်သည်။ နောက်လိုက်အဖြစ် လိုက်ခဲ့တုန်းက အသာလေး အများသွားသည့်နေရာ မကြောင်းမကြ မတောင်းမတ လေ့လာရသဖြင့် သက်သောင့်သက်သာ ရှိလှသည်။
သို့သော်လည်း ဦးဆောင်သူတစ်ယောက် အဖြစ်နဲ့ကတော့ တစ်ချိန်လုံး တစ်လမ်းလုံး ပူပန်ရသည်၊ ခရီးစဉ်အဆင်ပြေဖို့၊ တည်းဖို့ခိုဖို့ နေရာထိုင်ခင်း အဆင်ပြေဖို့၊ အများနှင့်သွားရသဖြင့် ရေချိုးခန်း အိမ်သာက အစ အဆင်ပြေဖို့ ပူပန်ရသည်၊ ငှါးရမ်းထားသည့် ကားများ အချိန်မီ မရောက်လာပါကလဲ စိတ်ပူရ၊ ဒေါသတွေ ထွက်ရ ပြောရဆိုရသဖြင့်လည်း ပူပန်နေရသည်။ လမ်းခရီး ကားများ တစ်ခုခု အဆင်မပြေဖြစ်ပါကလဲ ပူပန်ရပြန်သည်။ ခရီးစဉ်ဆုံးသွားမှတော့ပဲ စိတ်အေးရတော့သည်။ ပူပန်မည့်သာ ပူနေရတာ တကယ်တော့ ကျောင်းသား ကျောင်းသူတွေရဲ့ ဘုန်းကံကြောင့်ပဲ ဖြစ်မည်၊ အရာအားလုံး အဆင်ပြေခဲ့သည်။ ၀ိုင်းဝန်း အကျိုးဆောင်ပေးကြသည့် ပုဂ္ဂိုလ်များကို အထူးပဲ ကျေးဇူးတင်ရှိပါသည်။ ငြိမ်းချမ်းစွာဖြင့် လေ့လာရေးခရီးတွင် ပါဝင်ခဲ့ကြသော တပည့်အပေါင်းအားလည်း အထူးကျေးဇူးတင်ရှိပါသည်။

ပုပ္ပါးတောင်ပေါ်မှ နေ့လည် ၈နာရီဝန်းကျင်လောက်မှ ညောင်ဦးမြို့၊ သိမ်းမဆည်းဂိတ်ကျောင်း (ရွှေစည်းခုံဘုရားအနီး) တွင် တည်းခိုရန် ဆင်းလာခဲ့ကြသည်၊ ရောက်ရောက်ချင်း အသီးအသီး နေရာယူပြီး နေ့လည်စာ စားကြသည်မှာလည်း ပျော်စရာကောင်းလှသည်။ ကျောင်းသား ကျောင်းသူများ၏ ကာယသာမဂ္ဂီ စိတ္တသာမဂ္ဂီ (ကိုယ်ရော စိတ်ပါ ညီညွတ်ခြင်း)တို့ကို တွေ့ရသည်။ နေ့လည်စာအတွက် မခိုမကပ်ဘဲ ကိုယ့်အသိစိတ်ကလေးနဲ့ နေရာထိုင်ခင်းကျင်းကြခြင်း၊ စားပွဲများအတွက် ပြင်ဆင် ချက်ပြုတ်၊ ဆေးကြောခြင်း စတဲ့ ဝေယျာဝစ္စပြုလုပ်နေကြသည်ကို မြင်ရပြန်တော့ စိတ်အေးရသည်၊ ကြည်နူးရသည်။ ဤသို့အားဖြင့် ခရီးသွားခြင်းကလည်း ချစ်ခြင်းနှင့် ညီညွတ်ခြင်းကို ဖြစ်စေသည်။

ထို သိမ်းမဆည်းဂိတ်ကျောင်းမှာ တည်းခိုပြီး ပုဂံ-ညောင်ဦးမြို့ပေါ်ရှိ ထင်ရှားကျော်ကြားစေတီ ပုထိုးတော်များ၊ မထင်မရှား စေတီပုထိုးတော်များနှင့် စွယ်တော်လေးဆူတွင် တစ်ဆူအပါဝင်ဖြစ်သည့် တန့်ကြည်တောင်စေတီတော်ကို ပျော်ပျော်ကြီး လေ့လာခဲ့ရသဖြင့် ခရီးပန်းပေမဲ့ အားလုံး ကျေနပ်အားရကြလိမ့်မည် ထင်ပါသည်။ ဘုရားဖူးရင်း ဘုရားဒကာ ကျောင်းဒကာများလည်း ဖြစ်ခဲ့ကြသည်။ ဘုရားစောင်းတန်းရှိ အလှူခံဌာနတွေမှာ မိမိအဖွဲ့မှ ဘုရားဒကာ ကျောင်းဒကာ ၀င်လုပ်သူတွေကိုလည်း တွေ့ခဲ့ကြရသည်၊ တည်းခိုခဲ့သည့် မပြည့်စုံသေးသော နေရာများအတွက် ကျပ်၂ သိန်းကျော်ကိုလည်း မိမိတို့ လမ်းစရိတ်ထဲမှ စုပေါင်း၍လည်း ကျောင်းဒကာအဖြစ် အားလုံး ပါဝင်ခဲ့ကြသေးသည်။ ထိုကျောင်းတိုက်ဆရာတော်ကြီး၏ အဆုံးအမကိုလည်း နာကြားခွင့်ရသည်၊ “ငါ့ရှင်တို့က အညွှန့်တလူလူတက်နေတဲ့ ကျောင်းသားတွေ၊ ကိုယ့်အညွှန့်ကို ကိုယ်ကိုယ်တိုင် မဖျက်ဆီးပစ်ကြနဲ့”ဟု အမိန့်ရှိသည်။ ဤသို့အားဖြင့် ဘုရားဖူးရင်း လိပ်ဥမတူးကြဘဲ ရွှေဥတွေပဲ တူးခဲ့ကြသည်။

လေ့လာရေးခရီးစဉ်အားလျှော်စွာ ပုဂံရာဇ၀င်ကို ကျွမ်းကျင်နိုင်နှင်းသည့် လမ်းညွှန်ဂိုက်ကိုလည်း ငှါးရမ်းထားသဖြင့် အဆင်ပြေသည်။ ယနေ့ တွေ့မြင်နေရသော ပုဂံဘုရားများနှင့် နန်းတော်ရာ၊ ကျောင်းတော်ရာများက ရှေးမြန်မာများ၏ လူနေမှုဘ၀ပုံရိပ်၊ ဘာသာ သာသနာယုံကြည်မှု၊ အမျိုးဘာသာ သာသနာ စောင့်ရှောက်မှုတို့ကို မိမိတို့ ရင်ထဲ စွဲကျန်စေခဲ့သည်။ ရှေးမြန်မာများ၏ အနုစိတ်သော ဗိသုကာပညာများ၊ စာပေများက သူတို့၏ ဘ၀ပုံရိပ်နှင့် စိတ်နေစိတ်ထားများကို ဖော်ပြသဖြင့် ရှေးမြန်မာများ၊ မိမိတို့၏ ဘိုးအေများ၏ စိတ်ဓာတ်များကို လေ့လာခံစားခွင့်ရကြသည်။ တွေ့မြင်ခဲ့ရသော ပုဂံပုံရိပ်များက မိမိတို့နှလုံသားဝယ် ဘာသာ သာသနာနှင့် မျိုးချစ်စိတ်တို့ကို ခိုင်မာစေခဲ့သည်။ ဤသို့အားဖြင့် လေ့လာစရာတွေ ထုနဲ့ဒေးရှိနေပေမဲ့ ရရှိသည့် အချိန်လေးဖြင့် ဤမျှလောက် လေ့လာခွင့်ရသည်ကိုပဲ ကျေနပ်အားရမိကြမည် ထင်ပါသည်။

ရွှင်လန်းချမ်းမြေ့ပါစေ
သီတဂူစတား
၁၁-၁၂-၂၀၁၃

Posted in: တက္ကသိုလ် သတင်း