၂၀၁၂ မြန်မာနိုင်ငံတွင် အထင်ရှားဆုံး

၂၀၁၂ မြန်မာနိုင်ငံတွင် အထင်ရှားဆုံး

 
ယခုနှစ်အတွင်း ထူးခြားထင်ရှားမှု အရှိဆုံးသူများအဖြစ် The VoiceWeekly အယ်ဒီတာအဖွဲ့က သတ်မှတ်ရွေးချယ် ဖော်ပြလိုက်သည့် ပုဂ္ဂိလ်များတွင် သီတဂူဆရာတော်ကြီးလည်းပါဝင်သည်။

လင်းပွင့်စ မြန်မာနိုင်ငံတွင် အကောင်းအဆိုး ရောပြွမ်း ဖြစ်ပွားခဲ့သည့် ၂ဝ၁၂ ခုနှစ်တွင် ဘာသာ ရေးနှင့် လူမှုရေး လှူဒါန်းကူညီမှု များအပြင် နိုင်ငံ ခြား တိုင်းပြည်အချို့၏ အဓိက အရေးကိစ္စရပ် အချို့တွင်ပါ သြဇာ သက်ရောက်မှုရှိရှိ လှုပ်ရှားခဲ့သူ၊ ဘွဲ့တော်ရင်း ဒေါက်တာအရှင် ဉာဏိဿရ ဟု ခေါ်တွင်ကာ မွန်ပြည်နယ် သထုံမြို့ သပိတ်အိုင်တောရ စခန်းတွင် လေးနှစ်ကြာ တရားအားထုတ်ခဲ့ခြင်းကို အစွဲပြု၍ သပိတ်အိုင် ဆရာတော်ဟုလည်း လူသိများသူ သီတဂူဆရာတော်ကို ယခုနှစ်အတွက် ထူးခြားထင်ရှားသည့် ပုဂ္ဂိုလ်အဖြစ် ရွေးချယ်လိုက်ပါသည်။

၂၀၁၂ ခုနှစ်အတွင်း လူထု အာရုံစိုက်မှု အမြင့်ဆုံးဖြစ်ခဲ့သည့် လက်ပံတောင်းတောင်အရေး အပါအဝင် ထိုင်းနိုင်ငံ ချင်းမိုင် (ဇင်းမယ်) မှ မြန်မာဘုန်းတော်ကြီးကျောင်း အရေးတို့တွင်လည်း သက်တော် ၇၆ နှစ်ရှိ ဆရာတော်၏ ပါဝင်ဆောင် ရွက်မှုတို့မှာ များစွာ အရေးပါ ခဲ့သည်။

"ဒီပြဿနာက ရေနဲ့ ဖျန်းတာပဲ၊ ဒါပေမဲ့ ငရဲပြည်က ရေဖြစ်နေတယ်" ၊ "သမိုင်းတွင်မည့် မီးသင့်သင်္ကန်း" စသည့် ဆရာတော်၏ မှတ်ချက် စကားတို့က ဒီမိုကရေစီ ပြုပြင်ပြောင်းလဲရေး လုပ်ဆောင်နေသော သက်တမ်းနုနု အစိုးရအတွက် ယခုနှစ်အတွင်း အမည်းစက်ဖြစ်စေသော လက်ပံတောင်းတောင် သပိတ်ဖြိုခွင်းမှုနှင့်ပတ်သက်၍ များစွာ ထင်ရှားခဲ့သည်။ အစိုးရက တရားဝင်ဝန်ချ တောင်းပန်အပြီး သံဃာတော်များ တစ်နိုင်ငံလုံး ဆန္ဒပြ အရှိန်တက်လာမည့်အရေးကို အစိုးရနှင့် ဦးဆောင်သံဃာ တို့အကြား ညှိနှိုင်း စေ့စပ်သူအဖြစ် ကြားဝင်ကာ ဆန္ဒပြမှုများ ရပ်တန့်ရန် မိန့်ကြားအပြီးတွင် ဆန္ဒပြမှုများ အရှိန် လျော့ကျခဲ့သည်။

ပဲခူးတိုင်း ဒေသကြီး သဲကုန်းမြို့နယ် ဇာတိ၊ သက်တော် ၃၀ ကျော်အရွယ်မှ စတင်၍ လူမှုရေး လုပ်ငန်းများ လုပ်ကိုင်ခဲ့သူ၊ ၁၉၇၈ ခုနှစ်တွင် သီတဂူ သာသနာပြု အဖွဲ့ကို တည်ထောင်ကာ ရေအလှူတော်၊ အာယုဒါန ဆေးရုံတော်၊ ဗုဒ္ဓတက္ကသိုလ်၊ ဓမ္မဝိဟာရ စသည့် သာသနာပြု လုပ်ငန်းများ လုပ်ကိုင်လျက်ရှိသူ၊ ဗုဒ္ဓ တရားတော်ကို နေ့စဉ် အနည်းဆုံး တစ်ကြိမ် တရားရေအေး တိုက်ကျွေးလျက်ရှိသူ ဆရာတော်သည် နိုင်ငံ အတွင်းရှိ အရေးကိစ္စများတွင် မိန့်ကြားလေ့ရှိသော မှတ်ချက်စကားမှာလည်း များစွာ ထိရောက်လှပြီး နိုင်ငံပြုပြင်ပြောင်းလဲရေးတွင် အစိုးရ၊ အတိုက်အခံတို့အပြင် နိုင်ငံတကာ ဆက်ဆံရေး စာမျက်နှာ တွင်လည်း များစွာ အရေးပါလှသောကြောင့် ယခုကဲ့သို့ရွေးချယ်ရခြင်း ဖြစ်ပါသည်။

thevoicemyanmar မှ ကူးယူဖော်ပြသည်။

ရွှင်လန်းချမ်းမြေ့ပါစေ
သီတဂူစတား
၂၉-၁၂-၂၀၁၂

Read more »

တိုင်းပြည် အနှစ်ရှိသူများ

တိုင်းပြည် အနှစ်ရှိသူများ

တနေ့က သီတဂူဆရာတော်ကြီး၏ နိုဝင်ဘာ ၃၀ ရက်နေ့ ရန်ကုန်မှာဟောခဲ့တဲ့ “ချမ်းမြေ့ ပျော်ရွှင်ပါစေ” ဆိုတဲ့ တရားကို နာပြီး အတွေးတွေ များစွာဝင်ခဲ့သည်။ ဆရာတော်ကြီးကလဲ အံ့သြလောက်အောင်ကို နေရာ အချိန်အခါ အံဝင်ခွင်ကျအောင် ဟောနိုင်သည်။ ဆရာတော်ကြီး၏ တရားတော်ထဲမှာ အနှစ်မရှိတဲ့ အမတ်တွေ ၀န်ကြီးတွေ အကြောင်းပြောထားတာလေး ပါရှိတယ်။ ထို အနှစ်မရှိတဲ့ အမတ်တစ်ယောက်ကြောင့် ရဟန်းတော်တွေ များစွာ အသက်ပေးခဲ့ရတယ်။

တခါတရံ တိုင်းပြည်မင်းလုပ်တဲ့သူက အလွန်တော်နေပေမဲ့ သူ့အနားမှာ နေတဲ့ အနှစ်မရှိတဲ့ ၀န်ကြီးတွေ၊ အမတ်တွေ၊ အရာရှိတွေ၊ အကြံပေးတွေက မြှောက်ထိုးပင့်ကော်မှုကြောင့် တိုင်းပြည်ပျက်စီးခဲ့ရတဲ့ သာဓကတွေလဲ များစွာရှိခဲ့တယ်။ ဆရာတော်ကြီးက ဒါကိုလဲ မီးမှောင်းထိုးပြသွားသည်။

အဇာတသတ်မင်းကြီး ဘုရားရှင်နဲ့မတွေ့ခင် ဘုရားရှင်ကို အမြဲတမ်း ဆန့်ကျင်ခဲ့တဲ့ အရှင်ဒေ၀ဒတ်ရဲ့ မြှောက်ထိုးပင့်ကော်မှုကြောင့် အဖေရင်းကိုပါ သတ်မိခဲ့သည်။ အသောကမင်းကြီးလက်ထက်ကလဲ အလားတူပဲ ဖြစ်ခဲ့သည်၊ အနှစ်မရှိတဲ့ ၀န်ကြီးတစ်ယောက်ကြောင့် ရဟန်းတော်တွေ အသတ်ခံခဲ့ရဖူးသည်။ ဘုရင်ကြီးတွေ အဲဒီလို ကြီးကျယ်တဲ့ ညစ်ညမ်းတဲ့ အမှုကြီး ကျူးလွန်ပြီးမှ တွေးတိုင်း စိတ်မအေးရ ဖြစ်ခဲ့ရသည်။ မကျူးလွန်မီကထဲက ကိုယ်ကိုယ်တိုင်ကလဲ အနှစ်ရှိဖို့လိုသလို ကိုယ့်နားက အကြံပေးဆိုတဲ့ ၀န်ကြီးတွေကလဲ အနှစ်ရှိနေဖို့လိုတယ် ဆိုတာ မြတ်ဗုဒ္ဓက အောက်ပါ သုတ္တန်ကို ဟောခဲ့သည်။

တိုင်းပြည်ကြီးပွားကြောင်း လေးပါး
၁။ တိုင်းပြည် ခေါင်းဆောင်က အနှစ်ရှိပြီး နောက်လိုက်တပည့်တွေ ဘာမှမတတ်-အကာတွေ ခြံရံခြင်း။ တစ်ကိုယ်ကောင်းဆန်၊ တိုင်းပြည်နဲ့လူမျိုးကို မကြည့်တတ်သော နောက်လိုက်များ ခြံရခြင်း။ (သာရော ဖေဂ္ဂုပရိဝါရော)

၂။ တိုင်းပြည် ခေါင်းဆောင်က ဘာမှ မလုပ်တတ်၊ အကာတုံးကြီး ဖြစ်နေပြီး နောက်လိုက်တွေက အနှစ်တွေ (ပညာတတ်) (ဖေဂ္ဂု သာရပရိဝါရော)

၃။ တိုင်းပြည် ခေါင်းဆောင်ကလဲ အကာ၊ နောက်လိုက်ကလဲ အကာတွေချည်းဖြစ်နေသူ တစ်စု (ဖေဂ္ဂု ဖေဂ္ဂုပရိဝါရော)။

၎။ တိုင်းပြည် ခေါင်းဆောင်ကလဲ အနှစ်ရှိပြီး နောက်လိုက်တွေကလဲ အနှစ်ရှိသူကတစ်စု (သာရော သာရပရိဝါရော)။

နံပါတ် (၃) တိုင်းပြည်မှာ ခေါင်းဆောင်ရော နောက်လိုက်ပါ အကာတွေချည်း ဖြစ်နေရင် အဲဒီနိုင်ငံ အဲဒီတိုင်းပြည် ဘယ်တော့ မချမ်းသာနိုင်၊ ဘယ်တော့မှ မကြီးပွားနိုင်။ နံပါတ် (၂) နောက်လိုက်တွေ အနှစ်ရှိနေပမဲ့ အာဏာမရှိ၍၊ အာဏာရှိတဲ့ တိုင်းပြည်ခေါင်းဆောင်က အကာဖြစ်နေရင်လဲ ထိုတိုင်းပြည် ထိုနိုင်ငံ အရှုံးကြီး ရှုံးမည်။

သာရော သာရပရိဝါရော-ဆိုတဲ့အတိုင်း ခေါင်းဆောင် နောက်လိုက် အားလုံးက ကိုယ်ကျိုးမဖက် တိုင်းပြည်အတွက် လူမျိုးအတွက် ဘာသာအတွက် မေတ္တာ စေတနာ ထားတဲ့ အနှစ်ရှိသူများ ဖြစ်လျှင်-----ဆန္ဒပြုပါသည်။

အင်္ဂုတ္တရနိကာယ်၊ ရုက္ခသုတ်ကို ကိုးကားသည်။

ရွှင်လန်းချမ်းမြေ့ပါစေ
သီတဂူစတား
၂၆-၁၂-၂၀၁၂

Read more »

သီတဂူနှင့်တိပိဋက ပူဇော်ပွဲ (မဟာဗောဓိ)

အထွေထွေ မှတ်စု (မဟာဗောဓိ)

စာမိတ်ဆက်
စာရေးသူ၏ ၂၀၁၂ ဒီဇင်ဘာ အထွေထွေမှတ်စုသည် မြတ်ဗုဒ္ဓပွင့်ရာ မဟာဗောဓိပင်အောက်တွင် (၈)ကြိမ်မြောက် နိုင်ငံတကာ တိပိဋက ရွတ်ဖတ်ပူဇော်ပွဲ အတွေ့အကြုံများဖြစ်သည်။ စာရေးသူအတွက် ဒုတိယအကြိမ်ရောက်ခြင်းဖြစ်သည်၊ ဒီပွဲကို နိုင်ငံတကာ ဗုဒ္ဓဘာသာများက အလှည့်ကျ ဦးစီး၍ ကျင်းပလေ့ရှိသည်။ ဒီလိုပွဲကြီးတစ်ပွဲ ဦးစီးကျင်းပနိုင်ဘို့ဆိုတာ မလွယ်ကူပါဘူး၊ အလွန်တာဝန်ကြီးသလို အကုန်အကျလဲ များပါသည်၊ တစ်ဦးတစ်ယောက်တည်း ဦးဆောင်လို့လဲ မရဘူး၊ အားလုံး စိတ်တူ ကိုယ်တူ လက်တွဲပြီး ကျရာတာဝန်ကိုယ်စီ ထမ်းဆောင်မှ အောင်မြင်နိုင်ပါသည်။ ထိုကဲ့သို့ လူအများကြီး၊ အဖွဲ့အသီးသီးက ကိုယ်ကျရာ တာဝန်ကို ယူကြပေမဲ့ ပုထုဇဉ်သဘာဝအလျောက် ကွဲကွဲပြဲပြဲလေးတွေ ဖြစ်တတ်တာလဲ သဘာဝပင်ဖြစ်သည်။ ဖြစ်တတ်တာလေးတွေကို တွေ့သမျှ စုစည်းပြီး အထွေထွေ မှတ်စုအဖြစ် မှတ်တမ်းတင်ထားပါသည်။

(အခမ်းအနားတွင် ဖူးမြင်ရသော မစိုးရိမ်ဆရာတော်ကြီး၊ သီတဂူဆရာတော်ကြီးနှင့် တိပိဋကဆရာတော် ၄ ပါး)

 

(မဟာဗောဓိပင်အောက်က သိတဂူဆရာတော်ကြီး၏ ညပိုင်းဓမ္မသဘင်)

ပွဲကြီး၏ အခမ်းအနား
ပွဲကြီးကြီး ပြုလုပ်ပြီဆိုရင် ထိုပွဲအတွက် ကော်မတီဆိုတာ ရှိသည်၊ ထိုကော်မတီအောက်မှာ ပြန်ကြားရေး၊ ဘဏ္ဍာရေး၊ နေရာချထားရေး စသည်စသည် ဌာနအသီးသီးလဲ ပါရှိမည်။ တာဝန်ကျ နိုင်ငံက နိုင်ငံအသီးအသီးအတွက် ဘုရားပရ၀ုဏ်အတွင်း မဏ္ဍပ်များ စီစဉ်ပေးရခြင်း၊ ကျန်းမာရေး အစားအသောက်က အစ အစစအရာရာ တာဝန်ယူရသည်။ ထောင်နဲ့ချီသော ရဟန်းသံဃာ၊ လူအုပ်ကြီးအတွက် နေရာပေးရ၊ ချက်ရပြုတ်ရ၊ ကျွေးရမွေးရတဲ့ တာဝန်ကလဲ မသေးလှ၊ မြန်မာအစားအစာ၊ ထိုင်းအစားအစာ၊ အိန္ဒိယအစားအစာများ အဓိက စီမံပေးထားသည်ကို တွေ့ရသည်။ ထောင်နဲ့ ချီတဲ့ လူအုပ်ကြီးဆန့်တဲ့ မဏ္ဍပ်ကြီးထဲမှာ တပြိုင်တည်း ကျွေးနိုင်အောင် စီမံရသည်။ ထိုမဏ္ဍပ်ကြီးနဘေးတွင် မြန်မာ့ရိုးရာ ယဉ်ကျေးမှုများ တင်ဆက်ရန်အတွက် မဏ္ဍပ်ကြီးတစ်ခုလဲ ခန်းခန်းနားနားတွေ့ရသည်၊ ၂ ရက်နေ့ နေ့လည်ပိုင်းနှင့် ညပိုင်း၊ ၃ ရက်နေ့ ညပိုင်းတို့မှာ သီတဂူဂီတဉ္စလီအဖွဲ့ (အလင်္ကာဝတ်ရည်) က မြန်မာ့ယဉ်ကျေးမှုများဖြစ်တဲ့ မြူးမြူးကြွကြွ ပခန်းမင်းအဆိုအက၊ သိမ်မွေ့နုညံ့လှတဲ့ ဗုဒ္ဓပြကွက်များကို မြိုင်မြိုင်ဆိုင်ဆိုင် တင်ဆက်သွားနိုင်ခဲ့သဖြင့် လာရောက်ကြည့်ရှု့သည့် ပရိသတ်များ နှစ်ထောင်းအားရမှုများ ရှိကြသည်။ ဒီလိုတင်ဆက်မှုမျိုး တစ်ခါမှ မမြင်ဖူးဘူး (I have never seen) ဟု ကော်မတီကြီးစတင်တည်ထောင် မစ်ဝမ်မိုးက ချီးကျူးစကားဆိုသည်၊ နောင်နှစ်တွေမှာ နိုင်ငံပေါင်းစုံက မိမိတို့ နိုင်ငံအလိုက် မိနစ် (၃၀)စာစီ ယဉ်ကျေးမှုအက အလှများကို တင်ဆက်နိုင်ရန် ကော်မတီက ဆုံးဖြတ်ထားသည်။

မြတ်ဗုဒ္ဓပွင့်တော်မူရာ မဟာဓောဓိကြီးတစ်ခုလုံးကို ပန်းပေါင်းစုံတို့ဖြင့် ခြုံထားသည်၊ ဒီလိုပန်းအလှတန်ဆာဆင် ပူဇော်ခြင်းမျိုးကိုလဲ တစ်ခါဖူးမှ မဖြင်ဖူးဘူး (I have never seen)ဟု နိုင်ငံတကာက ပရိသတ်များက ချီးကျူးစကားဆိုကြသည်၊ အခမ်းအနားသိမ်းပွဲမှာ ထည့်သွင်းပြောသွားကြသည်။ ကျပ်သိန်းတစ်ရာကျော်ဖိုး အကုန်အကျခံပြီး မြန်မာမိသားစုများက အထူးသဖြင့် ဒေါ်အေးအေးမော် (မိုးသောက်ပန်းအဖွဲ့) တို့က ဘုရားရှင်အား ပန်းပေါင်းစုံတို့ဖြင့် ပူဇော်ကြသည်။ ဘုရားဝန်းပတ်ပတ်လည်မှာလဲ နိုင်ငံပေါင်းစုံက မဏ္ဍပ်များဖြင့် စည်ကား လှပလျှက်ရှိသည်၊ မြတ်ဗုဒ္ဓ၏ တရားတော်များကို မိမိတို့နိုင်ငံအလိုက် အသံအမျိုးအမျိုးဖြင့် ရွတ်ဆို ပူဇော်နေကြသည်မှာလည်း ဘ၀ဂ်ညံလို့နေသည်။ ဗုဒ္ဓဘာသာလူများရဲ့ မျက်နှာမှာလဲ အေးမြခြင်း၊ ကြည်နူးခြင်း၊ ပြုံးပျော်ကြခြင်း၊ စတဲ့ အချင်းချင်း မေတ္တာ ကရုဏာ အသွင်တွေကလဲ ကြည့်၍မ၀ ရှု၍မ၀ဖြစ်လှသည်။

 

(အခမ်းအနား ကျင်းပရာ မဟာဗောဓိသို့ ချီတက်လာသော မန္တလေး သီတဂူကမ္ဘာ့ဗုဒ္ဓတက္ကသိုလ် ကျောင်းအမအဖွဲ့)

၂-၁၂-၂၀၁၂ ရက်မနက် ဖွင့်ပွဲ
ပွဲတော်ကြီး၏ ဖွင့်ပွဲအခမ်းအနားကို မဟောဗောဓိပင်အောက်မှာ ကျင်းပသည်။ ထိုနေ့ မနက်စောစော မြန်မာပြည် ဘုရားပွဲလှည့်သလို၊ ရှင်ပြုသောအခါ ၀င်းခင်းလှည့်သလိုမျိုး မြန်မာဘုန်းတော်ကြီးကျောင်းမှ မဟာဗောဓိပင် အထိ တန်းစီလှည့်လည် ပူဇော်ခံကြသည်၊ ထိုသို့ပူဇော်ခံလှည့်လည်ရာဝယ် မြန်မာ့အလံ၊ သာသနာ့အလံများ၊ ရဟန်းတော်များ၊ ၀င်းခင်းများ၊ အကများ၊ ၀တ်စုံညီဝတ်ဆင်သူများ၊ ပိဋကတ်တော် စာအုပ်များ ပင့်ဆောင်သူအဖွဲ့များ စသည်ဖြင့် ကြည့်ကောင်းအောင် စီစဉ်သူအဖွဲ့က စီးစဉ်ပေးသည်။ အလွန့်အလွန်ကို ကြည့်ကောင်းပါသည်။ သို့သော်လည်း မြန်မာလူမျိုးတို့ရဲ့ ဗီဇက အဲဒီမှာ ပေါ်လာသည်၊ အရှက်ကွဲမည်ဆိုလဲ ကွဲချင်စရာ။ နေရာ သိပ်လုကြခြင်းပင်ဖြစ်သည်၊ သူကရှေ့ကနေမယ်၊ ငါက ရှေ့ကနေမယ်၊ သူ့ကို ဘာလို့ရှေ့ကထားလဲ၊ ငါတို့ကို ဘာလို့ရှေ့ကမထားဘဲ နောက်ကထားလဲ၊ သူကဘာမို့လို့ ရှေ့ကိုပို့နေသလဲ စသည်ဖြင့် အငြင်းအပွားလေးများရှိခဲ့သည်။ အခမ်းအနားသိမ်းတဲ့နေ့က မြန်မာကျောင်းဆရာတော်က မိန့်သည်၊ သူများအဖွဲ့တွေလဲ ဒီလိုပဲ ကွဲကွဲပြဲပြဲလေးတွေ ရှိကြတာပဲ၊ ဒါပေမဲ့ လူမသိဘူး၊ မြန်မာကွဲတာ လူသိတယ်၊ မကောင်းဘူး၊ မဖြစ်သင့်ဘူး စသည် မိန့်ခဲ့သည်။ နောက်နှစ်မှာလဲ မြန်မာကပဲ ဦးဆောင်ရမည်ဖြစ်၍ ဒီလို အဖြစ်မျိုး မဖြစ်ဖို့ မိန့်သည်။

(အခမ်းအနား ကျင်းပရာ မဟာဗောဓိသို့ ချီတက်လာသော သီတဂူ ကျောင်းအမအဖွဲ့) 

(အခမ်းအနား ကျင်းပရာ မဟာဗောဓိသို့ ချီတက်လာသော အိန္ဒယမြန်မာကျောင်းသားများကျာင်းအမအဖွဲ့) 

ဒီအခမ်းးအနားမှာ ပါဝင် လုပ်ဆောင်သူတွေ အဖွဲ့အဖွဲ့တွေ များစွာ ပါရှိသည်။ သီတဂူအဖွဲ့၊ မြန်မာကျောင်းဆရာတော်ကြီးအဖွဲ့၊ မိုးသောက်ပန်းအဖွဲ့၊ မြန်မာကျောင်းသားများကျောင်းအမအဖွဲ့၊ မထင်မရှား များစွား အလှူပါကြသည့် မိသားစု စသည်စသည်အားဖြင့် များစွာရှိသည်၊ အများစုကတော့ နယ်ခံများ မဟုတ်ကြ၊ ဒီနှစ်ပွဲကျမှ ရောက်ကြသည့်သူများ ဖြစ်ကြသည်၊ မြန်မာကျောင်းသားများအဖွဲ့၏ ကျောင်းအမကြီးကတော့ နယ်ခံလိုလိုဖြစ်နေသည်၊ နှစ်စဉ်နှစ်တိုင်းလဲ မြန်မာမဏ္ဍပ်မှာ ဦးဆောင်ဦးရွက်လုပ်ပေးနေသည်ကို တွေ့ရသည်၊ အဝေးက ကြွလာသည့် ရဟန်းတော်များကိုလဲ ကျောင်းမှာ နံက်ဆွမ်း၊ နေ့ဆွမ်းကပ်လေ့ရှိသည့် ကျောင်းအမကြီးဖြစ်သည်၊ သူ့ကို စာရေးသူတို့က ဗုဒ္ဓဂယာဘက်မှာတော့ မြန်မာနိုင်ငံအတွက် တကယ့်အိမ်ရှင်ကောင်းဟု သက်မှတ်ထားသည်၊ သက်မှတ်ခံရလောက်အောင်လဲ အလုပ်လုပ်နိုင်ခဲ့သူ ဖြစ်သည်။ ထို့ကြောင့် ကျောင်းအမကြီးအနေနဲ့က ဒီနှစ်မှရောက်လာသူများကို ကိုယ်က အိမ်ရှင်အနေနဲ့ ဦးစားပေး နေရာပေးနေရတာပဲလို့ သဘောထားစေချင်သည်။ နှစ်စဉ်နှစ်တိုင်း လုပ်ပေးနေရတဲ့ ကုသိုလ်စိတ်တွေ အိမ်ရှင်စိတ်တွေ ဒီလိုပွဲမျိုးမှာ ပြသနိုင်ရမှာ ဖြစ်သည်။ သူများတွေနဲ့အတူ လိုက်ပြီး တွက်ကပ် မနေသင့်။ တချို့က ဒီနှစ်မှာလာပြီး နေရာယူတယ်ဆိုပြီး ပုထုဇဉ်ပီပီ အတွေးဝင်တတ်သည်၊ ယောနိသော မနသိကာရလေးထားပြီး အသစ်အသစ် ပါဝင်လာသူမှန်သမျှကို ရှေ့တန်းတင်ဖို့လိုသည်၊ ကော်မတီအဖွဲ့အနေနဲ့ သီတဂူဆရာတော်ကြီးပြောသလို အလှူများစွာပါဝင်သူများ၊ အလုပ်လုပ်သူများကို ဣဿာ မစ္ဆရိယမထားဘဲ မုဒိတာစိတ်လေးဖြင့် ရှေ့သို့ ထွက်စေရမည်ဖြစ်သည်။

(မဟာဗောဓိပင်ကြီးကို ကျပ်သိန်း ရာချီပြီး ပန်းပေါင်းစုံတို့ဖြင့် ပူဇော်သော မိုးသောက်ပန်းအဖွဲ့)

(ပိဋကတ်ကျမ်းစာများကို ပင့်ဆောင်လာသော မြန်မာအဖွဲ့)

ပုထုဇဉ်များပီပီ ဖြစ်လေ့ဖြစ်ထရှိတဲ့ စိတ်ကို ထိန်းချုပ်နိုင်အောင် ကြိုးစားရမှာ ဖြစ်သည်၊ ဒီလိုပါပဲ ဘုန်းတော်ကြီးကျောင်းတွေမှာ ဖြစ်တတ်တဲ့ အလေ့တစ်ခုရှိသည်၊ တချို့ကျောင်းအမတွေက ငါက ဒီကျောင်းရဲ့ ပင်တိုင်းကျောင်းအမ၊ ကျောင်းဒကာပဲ ဆိုပြီး ဂုဏ်ယူဝင့်ကြွားပြောလေ့ရှိသည်၊ နောက် အသစ်သစ်လာမည့် ကျောင်းဒကာ ဒကာမတွေကို နေရာ မပေးချင်၊ သူ့ထက်ပိုပြီး ဒီကျောင်း ဒီဆရာတော်နဲ့ ရင်းနှီးသွားမှာကို စိုးရိမ်သည်။ တချို့ကျောင်းတွေမှာဆို မူလကျောင်းဒကာ ဒကာမများကြောင့် ဒီကျောင်း ဒီဘုန်းကြီး အထီးကျန်နေရသည်။ ဘယ်သူမှ မလာရဲ ဖြစ်တဲ့ အထိ ဖြစ်လာသည်။ တကယ်ဆို ကိုယ်က မူလကျောင်းဒကာ ဒကာမပဲ၊ နောက်မှ လာတဲ့သူတွေကို ကြိုဆိုရမှာ ဖြစ်သည်၊ နေရာပေးရမှာ ဖြစ်သည်၊ ကိုယ့်ကျောင်း ကိုယ့်ဘုန်းကြီး ပိုလို့တောင် ပြီးပြည့်စုံမည်၊ သာသနာပြုရာဝယ် ပိုပြီး ခရီးပေါက်နိုင်သည်။ ကိုယ်လဲ ဂုဏ်ပိုလို့ မြင့်တက်လာသည်။ ကိုယ်ကုသိုလ်ရသလို သူတို့လဲ ရနိုင်ပါစေဆိုတဲ့ စိတ်မျိုး များများ မွေးနိုင်ဖို့လိုသည်။

သာသနာပြုရေးမှာပဲဖြစ်ဖြစ် လူမှုရေးမှာပဲ ဖြစ်ဖြစ် တစ်ယောက်တည်း မဖြစ်နိုင်တဲ့ ကိစ္စတိုင်းကိုမဆို ပေါင်းစုညီညာ အောင်ကြောင်းဖြာ ဆိုတဲ့အတိုင်း စုစုစည်းစည်းနဲ့ ကိုယ်စီတာဝန်ယူကြရမှာ ဖြစ်သည်။ ကိုယ်တစ်ယောက်တည်းလဲ မပြီး၊ သူချည်းလဲ မပြီး၊ သူရယ် ငါရယ် စုံညီမှ ညီညွတ်မှ အောင်မြင်မည်။ “မင်းမပါ ဘယ်ဟာမပြီး၊ မင်းချည်းတော့လည်း ဘယ်ဟာမပြီး။ သူမပါဘယ်ဟာမပြီး၊ သူ့ချည်းတော့လည်း ဘယ်ဟာမပြီး။ ငါမပါ ဘယ်ဟာမပြီး၊ ငါချည်းတော့လည်း ဘယ်ဟာမပြီး။ မင်းသူငါညီညာစုံမှ အလုံးစုံ အကုန်ပြီး ပြုကြစုစည်း။”ဟု ထီးဆောင်းဆရာတော်ပြောသလို ယခုလို အလုပ်ကြီးကြီးလုပ်ပြီဆိုရင် အားလုံးစုံညီ တက်ညီလက်ညီမှ အောင်မြင်မှာ ဖြစ်သည်၊ တစ်ယောက်ကတစ်မျိုး၊ တစ်ယောက်က တစ်ဖုံ၊ သူတစ်မင်း ငါတစ်မင်း သွားနေရင် ခရီးမပေါက်။ တချို့က ငါလုပ်လို့ ငါဦးဆောင်လို့ အောင်မြင်တယ် ဆိုတဲ့ ကိုယ့်ကိုယ်ကို အထင်ကြီးနေတဲ့ စိတ်ဓာတ်လေးတွေလဲ ပြင်ဖို့လိုသည်။ ထင်ပေါ်ကျော်ကြားချင်စိတ်တွေကြောင့် ရှေ့ကနေ ယားယားနေချင်တဲ့စိတ်၊ တကယ်အလုပ်လုပ်တဲ့သူကို နေရာ မပေးချင်တဲ့ စိတ်တွေ ပြင်ကြရမှာ ဖြစ်သည်။ ထိုအကြောင်းရာနှင့်စပ်ပြီး သီတဂူဆရာတော်ကြီးက ကျောင်းသားများအတွက် တစ်ပါး ဒေါ်လာတစ်ရာစီ လှူတဲ့ပွဲမှာ မိန့်သွားသေးသည်။ ယနေ့ ကျင်းပပြုလုပ်ခဲ့ပြီးသော နိုင်ငံတကာ တိပိဋက ရွတ်ဆိုပူဇော်ပွဲကြီးကို မြန်မာပြည်သူပြည်သားတွေ အဖွဲ့လိုက် အဖွဲ့လိုက် ကိုယ်စီတာဝန်ယူခဲ့ကြလို့ အောင်မြင်စွာ ပြီးဆုံးရုံတင်မက မြန်မာပြည်သူတွေရဲ့ ဗုဒ္ဓ ဓမ္မ သံဃာ့အပေါ်မှာ ယုံကြည်မှု ပူဇော်မူကလဲ အံ့မခန်း ဖြစ်ကြောင်း ချီးကျူးမှုလည်း ရရှိခဲ့သည်။

အလားတူပဲ အခြားအခြားသော နိုင်ငံမှ ဗုဒ္ဓဘာသာဝင်များကလဲ သူတို့နိုင်ငံပိုင်ကျောင်းအသီးသီးမှ မဟာဗောဓိပင်အထိ ချီတက်ကြသည်။ သူတို့နည်း သူတို့ဟန် သူတို့ ယဉ်ကျေးမှုနဲ့အတူ ချီတက်လာကြသည်မှာလည်း ကြည်နူးစရာ။ ဗုဒ္ဓရဲ့အမွှေနှစ်သာကျန်၍ ဓမ္မပျောက်ဆုံးရာ နေရာသည်လည်း ဓမ္မများ ပြန်လည် သယ်ဆောင်လာသည်ဟု ခံစား ကြည်နူးရသည်။ အခမ်းအနားကျင်းပရာ မဟာဗောဓိပင် ၀န်းကျင်တစ်ခုလုံးလည်း နိုင်ငံပေါင်းစုံးက ယဉ်ကျေးမှုပေါင်းစုံတို့ဖြင့် မြတ်ဗုဒ္ဓကို ပူဇော်နေကြသည့် မြင်ကွင်းကလဲ အလွန်အေးချမ်းသည်၊ အလွန် ငြိမ်းချမ်းသည်၊ အလွန် တင့်တယ် လှပသည်၊ အလွန် ကျက်သရေရှိလှသည်။ ကိုယ့်နိုင်ငံမဏ္ဍပ်အသီးအသီးမှာ နိုင်ငံပေါင်း ကိုးနိုင်ငံက ဗုဒ္ဓဘာသာ ရဟန်းတော်များ သူတော်စင်များ၏ နေ့စဉ် မြတ်ဗုဒ္ဓအဆုံးအမများကို ရွတ်ဆိုသံများကလည်း ဘ၀ဂ်အထိ မြည်ဟီးလို့နေသည်။ ညစဉ် မဟာဗောဓိပင်အောက်မှာ သီတဂူဆရာတော်ကြီးအပါအ၀င် နိုင်ငံပေါင်းစုံက မထေရ်တို့၏ အမြိုက်စည်ကြီး တီးခက်မှုကလဲ ဘ၀ဂ်ညံသည်။

(သီတဂူဂီတဉ္စလီအဖွဲ့ရဲ့ တင်ဆက်မှု အစီအစဉ်များ)

(သီတဂူဂီတဉ္စလီအဖွဲ့ရဲ့ တင်ဆက်မှု နှင့် ကျေးဇူးတင်ကြောင်းပြော နေသော မစ်ဝမ်မိုး)

သီတဂူ၏ ပါဝင်မှု
သီတဂူဆရာတော်ကြီးက အမေရိကန်ဒေါ်လာ တစ်သိန်းကျော် အကုန်အကျခံ၍ ထိုပွဲအတွက် ပါဝင်ခဲ့သည်၊ လာလာသမျှဧည့်သည်တော်များကို ထမင်းကျွေးနိုင်ရန် တစ်နေ့စာ ဒေါ်လာ တစ်သောင်းနှုံးဖြင့် ၃ ရက်စာ သုံးသောင်း တာဝန်ယူခဲ့သည်။ နိုင်ငံတကာတိပိဋကရွတ်ဆိုပူဇော်ပွဲတွင် မြန်မာ့ဂုဏ်ဆောင် တိပိဋကဆရာတော် ၄ ပါးကိုလည်း စပွန်ဆာပေးပြီး ပင့်လာခဲ့သည်အတွက် နိုင်ငံတကာ ဗုဒ္ဓဘာသာအဖွဲ့အစည်းကြီးများက ချီးကြူးထောမနာ ပြုကြသည်၊ ဒီပွဲကြီးအတွက် ထိုအရှင်မြတ်များ ပါဝင်လာခြင်းကြောင့် ပိုမို ဂုဏ်ရောင်တက်လာသည်ဟုလဲ အခမ်းအနားဖွင့်ပွဲတွင် ပြောကြားသွားသည်။ သီတဂူဆရာတော်ကြီးကိုယ်တိုင်ပဲ မဟာဗောဓိပင်အောက်မှာ ညပိုင်း အင်္ဂလိပ်ဘာသာဖြင့် တစ်ည၊ မြန်မာဘာသာဖြင့် တစ်ည တရားများ ဟောကြားခဲ့သည်။ နှစ်စဉ်နှစ်တိုင်း အိန္ဒိယတက္ကသိုလ်အသီးအသီးတွင် ကျောင်းတက်နေကြသော မြန်မာရဟန်းတော် ၅၆၀ ပါးကို တစ်ပါးလျှင် အမေရိကန် ဒေါ်လာ တစ်ရာနှုံးဖြင့် ဒေါ်လာ ငါးသောင်း ခြောက်ထောင် (၅၆၀၀၀)ကို သီတဂူဆရာတော်နှင့် တပည့်ဒကာဒကာမများက ၅သောင်း ငါးထောင်နှင့် ကိုသီဟ မိသားစု (နယူးဒေလီ)က ငါးထောင် လှူဒါန်းခဲ့သည်။ ဒီအလှူပွဲအတွက် မန္တလေး သီတဂူကမ္ဘာ့ဗုဒ္ဓတက္ကသိုလ် ကျောင်းအမကြီး ဒေါ်ညွှန့်ညွှန့်အေးက တော်တော်များများ စိုက်ထုတ်လှူသည်ကို တွေ့ရသည်။ ၂၀၁၁ခုနှစ်က အိန္ဒိယရောက် မြန်မာကျောင်းသား ရဟန်းတော် ၅၂၈ ပါးကို သူတစ်ယောက်တည်းက လှူဒါန်းခဲ့သည်။

(သီတဂူဂီတဉ္စလီရဲ့ တင်ဆက်မှုကို အားပေးနေသော သီတဂူအဖွဲ့တော်သားများ)

သီတဂူဂီတဉ္စလီနှင့် ဗုဒ္ဓဂယာ
သီတဂူဆရာတော်ကြီး၏ စီမံမှုဖြင့် ဒီနှစ်မှာ ထူးထူးခြားခြား နိုင်ငံတကာတိပိဋက ရွတ်ဆိုပူဇော်ပွဲတွင် မြန်မာယဉ်ကျေးမှု အဆိုအက အလှနှင့် ဗုဒ္ဓ၀င်ပြခန်းများကို ထည့်သွင်း ဖျော်ဖြေသည်။ ထိုဖျော်ဖြေပွဲကို အလင်္ကာဝတ်ရည် ဦးမောင်မောင်အေးက ဦးဆောင်ပြီး အဆိုအက ကျွမ်းကျင်သူများဖြင့် သီတဂူဂီတဉ္စလီအဖွဲ့ ဖွဲ့စည်းပြီး ကပြ ဖျော်ဖြေသည်၊ လာရောက်အားပေးသည့် ပရိသတ်များ၏ အားပေးမှုကို ရရှိသည်၊ ဤကော်မတီကြီးကို ဦးဆောင်သူ မစ်စ်ဝမ်မိုက ဒီလို အဆို အက တင်ဆက်မှုမျိုး တစ်ခါမှ မမြင်ဖူးဘူး၊ အလွန်အားရ ကျေနပ်မိကြောင်းပြောကြားသည်၊ နောင်နှစ်တွေမှာ နိုင်ငံခြားသားများ ပိုမိုနားလည်စေရန် အင်္ဂလိပ်စာတမ်းထိုးကိုပါ ထည့်သွင်းစေရန် အကြံပြုသေးသည်။ အဆိုရော အကရော သရုပ်ဖော်ရော ပညာရှင်များ ဖြစ်သဖြင့် အလွန်သေသပ်သည်၊ ပီပြင်သည်။ ဒီအဖွဲ့ နိုင်ငံတကာ အတွေ့အကြုံလည်းရှိထားသည်၊ မြန်မာပြည် အလှူမင်္ဂလာပွဲတွေမှာလဲ ဖျော်ဖြေသည်။ နိုင်ငံတကာဗုဒ္ဓဘာသာ အလယ်မှာ မြန်မာပြည်ရဲ့ အောင်မြင်မှုတစ်ရပ်ပင်ဖြစ်သည်။ နောင်နှစ်တွေမှာ နိုင်ငံတကာ ဖျော်ဖြေရေး အပြိုင်အဆိုင်မှာတော့ မြန်မာက ဘယ်လို တင်ဆက်မှုတွေနဲ့ ပါဝင်မလဲဆိုတာ မျှော်ကြည့်ကြမည်။ သီတဂူဂီတဉ္စလီအကြောင်းကို ပြောပြတဲ့အခါ ထိုအဖွဲ့ကို ဦးဆောင်သူ သီတဂူ ဦးမောင်မောင်အေး (အလင်္ကာဝတ်ရည်)အကြောင်းကို ထည့်သွင်း ဖော်ပြဖို့လိုသည်။ စိတ်ဝင်စားဖို့ကောင်းသည်။

ဗုဒ္ဓဂယာရောက် မစိုးရိမ်ဆရာတော်ကြီးအား သွားရောက် ကန်တော့၊ အမှတ်တရ သီတဂူစတား၊ ကိုနိုင်အေး၊ ဦပီကေဆင်)

 သီတဂူဆရာတော်နှင့်အတူပါလာသည့် အဖွဲ့တွေက များပြားသဖြင့် စာရေးသူကို ဂီတဉ္စလီအဖွဲ့၏ ကိစ္စအ၀၀ကို တာဝန်ယူရန် ပေးသသည်။ စာရေးသူလဲ သူတို့နဲ့အတူ ပွဲအစအဆုံး ရှိနေသည်၊ သံဝေဇနိယ ၄ ဌာနသို့လည်း ဘုရားဖူးလိုက်ရသည်။ စာရေးသူကိုယ်တိုင်က ဗုဒ္ဓဂယာ အကြိမ်အကြိမ်ရောက်ခဲ့ဖူးပေမဲ့ ဘုရားရှင်မွေးဖွားရာ လုမ္ဗိနီ (နီပေါနိုင်ငံ) ကိုတော့ နှစ်ကြိမ်မြောက်ပဲရောက်ဖူးသည်။ ဒါပေမဲ့ ကိုယ်က လိုက်ပို့သူ မဟုတ်ဘဲ သူတို့နောက်လိုက်သူ ဖြစ်နေသည်၊ သွားမည့်လမ်းကြောင်း သိပ်မကျွမ်းကျင်။ ပါလာတဲ့ အဆိုအက အဖွဲ့ ၂၆ ယောက်စာကို စားစရိတ် သွားစရိတ်၊ နေစရိတ်တွေက အစ သီတဂူ ဦးမောင်မောင်အေး (အလင်္ကာဝတ်ရည်)ကပဲ တာဝန်ယူသည်။ ဒါ့ပြင် သူတို့အတွက် မုန့်ဖိုး ဒေါ်လာ ၅၀၀ ကျော်စီလဲ ပေးသေးသည်။ သူတို့တစ်တွေလဲ ခေါင်းဆောင်ကောင်းတစ်ယောက်ရဲ့ မေတ္တာ စေတနာတွေကြောင့် ပျော်နေပုံရသည်။ မလှူဘဲ မနေနိုင်တဲ့ မြန်မာလူမျိုးတို့ရဲ့ ထုံးစံအတိုင်း ရောက်ခဲ့သည့် နေရာတိုင်းမှာလဲ လှူဒါန်းခဲ့ကြသေးသည်။

သီတဂူ ဦးမောင်မောင်အေး (အလင်္ကာဝတ်ရည်)က သီတဂူဆရာတော်ကြီးအနား ရောက်နေသည်မှာ ကြာပြီ ဖြစ်သည်။ စာရေးသူလည်း ဘလော့ဂ် စရေးခါစက သီတဂူဆရာတော်ကြီးရဲ့ နာဂစ်အလှူတော်အတွက် ရမိသမျှလေးတွေ ရေးပြီးတင်လေ့ရှိရာက သီတဂူ ဦးမောင်မောင်အေး (အလင်္ကာဝတ်ရည်)ကို သတိထားမိလာသည်။ စာရေးသူ စုစည်းတဲ ဓာတ်ပုံတွေထဲမှာ သူက နေရာတော်တော်များများမှာ ပါနေသည်။ စာရေးသူ အမ်အေ (M.A Philo) အပြီး၊ Ph.Dအတွက် စောင့်ရင်း ရန်ကုန် သီတဂူကမ္ဘာ့ဗုဒ္ဓတက္ကသိုလ်မှာ စာချနေရင်းက ဦးမောင်မောင်အေး အကြောင်းကို တော်တော်လေးသိလာသည်၊ အထူးသဖြင့် သီတဂူကပ္ပိယ ကိုကျော်ရှိန်နဲ့ ဒေါ်အေးတို့က ပြောသည်။ စာရေးသူမှာ သူ့အကြောင်းတွေ တော်တော်များများ သိနေပေမဲ့ သူနဲ့ စကားမပြောဖူးသေး၊ ခင်လဲ မခင်သေး။ ကံကောင်းချင်တော့ သူဦးဆောင်သော ဂီတဉ္စလီအဖွဲ့ အိန္ဒိယသို့ရောက်လာသည်။ တိုက်ဆိုင်ချင်တော့လဲ ဒီအဖွဲ့ကို တာဝန်ယူပေးဖို့ စာရေးသူအား ဒေါက်တာကုမာရက ညွှန်ကြားသည်။ သူနဲ့စကားပြောခွင့်ရသည်။ သူ၏ စိတ်နေစိတ်ထား သဘောထားတွေ ကိုယ်တွေ့ သိခဲ့ရသည်။ သီတဂူဆရာတော်ကြီး အလွန့်အလွန် ကြည်ညိုသူဖြစ်သည်၊ သီတဂူဆရာတော်ကြီး၏ သာသနာရေး၊ လူမှုရေးအလုပ်တွေကို အများစု ပါဝင်သူ ဖြစ်နေသည်။

အလွန်ရိုးရှင်းသူတစ်ယောက် ဖြစ်သည့်အားလျှော်စွာ စိတ်ရှင်းသည်၊ အပြောရှင်းသည်၊ အလုပ်ရှင်းသည်။ တည်တည်ငြိမ်ငြိမ်နဲ့ ဘာဂုဏ် ရာထူး နေရာကိုမှ မမက်မောဘဲ သာသနာတော်ကို ကြည်ညိုရုံ၊ သီတဂူဆရာတော်ကြီး သာသနာစိတ်ဓာတ်ကို ကြည်ညိုရုံနဲ့ပဲ ရိုးရှင်းစွာ ရှာဖွေစုဆောင်းထားတဲ့ စည်းစိမ်တွေကို သာသနာတော်အား စွန့်လွတ်လှူဒါန်းသူဖြစ်သည်။ သူ၏ နယ်မှာလဲ ဆေးရုံကြီးတစ်ခု တည်ဆောက်ထားပြီး ထိုဆေးရုံအတွက် လိုလေသေးမရှိ ထောက်ပံ့နေဆဲဖြစ်သည်။ သီတဂူဆရာတော်ကြီး၏ ဆုံးမ ညွှန်ကြားမှုအတိုင်း ဆောင်ရွက်လေ့ရှိသူဖြစ်သည်၊ ဥာတတ္ထစရိယ-နယ်မှရှိတဲ့ ဆွေးမျိုးတွေအတွက် တက်နိုင်သလောက် ထောက်ပံ့သည်၊ လောကတ္ထစရိယ-သာသနာအတွက် လောကအတွက် ဆရာတော်ကြီးနဲ့လက်တွဲကာ ဆောင်ရွက်လျှက်ရှိသည်။ သူသည် သာသနာအတွက် လောကအတွက် ဆောင်ရွက်ပေးနေရုံမက တစ်ဖက်ကလည်း သူဝါသနာပါသည့် စာပေအလုပ်၊ အနုပညာ အလုပ်ကို အောင်မြင်စွာလုပ်ကိုင်လျှက်ရှိသည်။ သူကိုယ်ပိုင် အလင်္ကာဝတ်ရည်၊ န ဘယံ မဂ္ဂဇင်း စာစောင်များလည်း သူကိုယ်ပိုင် ပုံနှိပ်လုပ်ငန်းမှ လစဉ် ထုတ်ဝေလျှက်ရှိသည်။ အလုပ်ရှားပါးသည့်ခေတ်မှာ သူဝါသနာပါသည့်လုပ်ငန်းက စားဝတ်နေရေးအတွက် ၀န်ထမ်းလေးတွေကိုလည်း တစ်ဖက်တစ်လမ်းက အလုပ်ပေးနေသည်။ ဒါသည်ပင် လောကတ္ထစရိယ ဖြစ်နေသည်။

(မြေမြတ်မဟာမှာ လာရောက် လှူဒါန်းကြသော ဗီယတ်နမ်အဖွဲ့တစ်ဖွဲ့)

မြတ်ဗုဒ္ဓဖြစ်ခဲ့ရာ မြေမြတ်မဟာများကို လှည့်လည် သွားလာရင်း သူနဲ့စကားပြောရသည်မှာလဲ စာရေးသူအတွက် များစွာ ဗဟုသုတရသည်။ စာပေအလွန်ဝါသနာပါသည်၊ စာပေပေါင်းစုံကို ဖတ်ထားသဖြင့် စာကြည့်တိုက်ကြီးသဖွယ်ဖြစ်နေသည်။ လူမှုရေးအကြောင်းပြောမလား၊ နိုင်ငံရေးအကြောင်းပြောမလား ထဲထဲဝင်ဝင် သိနေသည်။ ဘာသာရေးအကြောင်း ပြောမလား ကောင်းကောင်းပြောနိုင်သည်။ စီးပွားရေးမှာ အောင်မြင်သူ တစ်ယောက်ဖြစ်နေသည်အတွက် စီးပွားရေးအကြောင်း ပြောမလား ကျယ်ကျယ်ပြန့်ပြန့်ကို ပြောနိုင်သည်။ ဒါ့ကြောင့် စာပေလောက၊ အနုပညာလောက၊ စီးပွားရေးလောက၊ လူမှုရေးလောက၊ ဘာသာရေးလောကတွေမှာ သူ့ကို အသိများကြသည်မှာ မဆန်းပါ။ စာရေးသူလည်း သူတို့နဲ့လိုက်ပါသွားခြင်းကြောင့် ဒေသန္တရဗဟုသုတရော ထိုသူတည်းဟု စာကြည့်တိုက်ထဲက ဗဟုသုတများစွာ ရယူလိုက်သည်အတွက် များစွာ ပီတိဖြစ်ရသည်။ ပြန်မည့်ရက်က “သူကိုယ်တိုင်ကလဲ တပည့်တော်တို့ကို သီတဂူမိသားစုအဖြစ် သတ်မှတ်တော်မူပါ”ဟု လျှောက်ထားသဖြင့် စာရေးသူတို့အတွက် ပိုမိုအားတက်ရသည်။ အားလုံးရဲ့ စိတ်ထဲမှာလဲ တကယ့်မိသားစုလိုပဲ နွေးနွေးထွေးထွေးရှိလှသည်။ သီတဂူဂီတဉ္စလီအဖွဲ့ရဲ့ အောင်မြင်မှုက မသေးလှ။ နှောင်နှစ်တွေမှာ တခြားနိုင်ငံပေါင်း ကိုးနိုင်ငံကပါ ဒီလို ကိုယ့်နိုင်ငံကိုယ်စား ယဉ်ကျေးမှုတင်ဆက်မှုမျိုး ပါဝင်နိုင်အောင် စည်းရုံးနိုင်ခဲ့သည်၊ နောင်နှစ်မှာတော့ ဒီမြေမြတ်မဟာ မဟာဗောဓိပင်အနီးမှာ နိုင်ငံတကာယဉ်ကျေးမှု နှီးနောဖလှယ်ပွဲကြီး ပေါ်ပေါက်စေခဲ့သည်အထိ အောင်မြင်ခဲ့သည်။

 

(အောင်ပွဲ အခမ်းအနားတွင် ကျေးဇူးတင်ထိုက်သူများကို ကျေးဇူးတင်နေသော မစ်ဝမ်မိုး)

ကျေးဇူးတင်စကား
အခမ်းအနားတွင် ကော်မတီကို စတင်တည်ထောင်သူ မစ်ဝမ်မိုးက ဒီပွဲတော်ကြီးအတွက် ပူးပေါင်းပါဝင်သူအားလုံး ကျေးဇူးတင်စကား ပြောကြားသည်။ သီတဂူဆရာတော်ကြီးနှင့် ဆရာတော်ကြီး၏ သာသနာရေးလုပ်ငန်း လူမှုရေးလုပ်ငန်းများအကြောင်းပြောရင်း ကျေးဇူးတင်ကြောင်း ထပ်ခါထပ်ခါပြောကြားသည်။ အရေးထဲ မြန်မာအဖွဲ့တစ်ဖွဲ့က ကျေးဇူးတင်စကားထဲမှာ သူတို့အဖွဲ့ကို ထည့်ပြီး မပြောလို့ဆိုပြီး ပွတ်လောရိုက်သွားသေးသည်။ ကျေးဇူးတင်စကားက အရေးကြီးနေလား အလုပ်က အရေးကြီးနေလားဆိုတာ မခွဲခြားတတ်၊ သူ့အတွက် အလုပ်ထက် ကျေးဇူးတင်စကားက ပို အရေးကြီးနေပုံရသည်။ ဒါ ဒို့မြန်မာကွလို့ ကြွေးကြော်ပေးရမည့်ပုံ။ နောက်နေ့တွေမှာတော့ သူ့အတွက်ပါ ထည့်ပြောသွားသတဲ့။ ဒီလိုနဲ့ ပွဲတော်ကြီးပြီးဆုံးလို့ အခမ်းအနားသိမ်းပွဲ ကျင်းပ။ အခမ်းအနားသိမ်းပွဲမှာလဲ သူမကရော နိုင်ငံတကာက ခေါင်းဆောင်များကပါ မြန်မာကို အထူးကျေးဇူးတင်ကြောင်း ပြောသွားကြသည်။ သီရိလင်္ကာ ရဟန်းတော်တစ်ပါးက “ယနေ့ တကမ္ဘာလုံးက ကမ္ဘာကြီးပျက်မည်ဟု” ပူဆွေးသောကရောက်နေချိန်၊ ကြောက်ရွံ့နေကြချိန် ဗုဒ္ဓဘာသာဝင်များကတော့ တည်ငြိမ် အေးချမ်းလျှက် ပူလောင်နေသော ကမ္ဘာကြီးအေးချမ်းအောင် ကောင်းမှုများ ပြုလျှက်ရှိသည်။ ကျေးဇူးတင်ကြောင်းပြောသည်မှာလဲပဲ ပြည်နယ်ဝန်ကြီးက အစ၊ အလှူရှင်အားလုံး၊ အလုပ်လုပ်သူအားလုံး၊ လုံခြုံရေး အမိုက်ရှင်းကအစ ကျေးဇူးတင်ကြောင်းပြောသည်မှာလဲ အလွန်ကောင်းပါသည်။ တကယ်ဆို ဒီလိုစကားမျိုးတွေကို ဦးဆောင်ဦးရွက်ပြုနေတဲ့ မြန်မာနိုင်ငံက ပြောရမည်ဖြစ်သည်။ မြန်မာက မပြောနိုင်ဘဲ တခြားနိုင်ငံကလူက ဒေါင့်စေ့အောင် ပြောပြနေသည်မှာလဲ စဉ်းစားစရာဖြစ်သည်။ ဒီကနေ့ နိုင်ငံတကာ တိပိဋကရွတ်ဆိုပွဲကြီးတွင် ပါဝင်ကြသော မြန်မာနိုင်ငံမှ အဖွဲ့အားလုံးတို့သည် မြန်မာ့ဂုဏ်ကိုလဲ ဆောင်နိုင်ခဲ့သည်၊ သာသနာတော်ကြီးကိုလည်း အကြီးအကျယ် ထောက်ပံ့နိုင်ခဲ့သည်အတွက် များစွာ ကျေးဇူးတင်ရှိပါကြောင်းးးးးးးးးးးး။

သိသလောက် မှတ်သလောက် မြင်သမျှ ကြားသမျှလောက်ကိုသာ မှတ်တမ်းတင်ထားပါသည်၊ ကျန်နေသော အဖွဲ့၊ စကားအမှားများအတွက် ခွင့်လွတ်တော်မူကြပါရန် မေတ္တာရပ်ခံပါသည်။

ရွှင်လန်းချမ်းမြေ့ပါစေ
သီတဂူစတား
၂၀-၁၂-၂၀၁၂

Read more »

ဘုံဘေအလှူ (၂-ကြိမ်မြောက်)

ဒုတိယ အကြိမ်ဆွမ်းစရိတ်အလှူတော်

(စောမယကောလိပ် ကျောင်းသားများ ကိုယ်စား အရှင်ဝိစိတ္တာလင်္ကာရ အလှူရှင်မိသားများထံမှ အလှူခံပေးနေစဉ်)

အိန္ဒိယနိုင်ငံ တောင်ပိုင်း၊ ဘုံဘေမြို့ (မွန်ဘိုင်း)၊ စောမယကောလိပ်တွင် Ph.Dအတွက် စာတမ်းပြုစုနေကြသော မြန်မာရဟန်းတော် အပါး ၂၀ ကျော်တို့အတွက် ဆွမ်းစရိတ်အလှူတော် အမေရိကန်ဒေါ်လာ ၅၀၀ တို့ကို အောက်ပါ မိသားစုများက (ဒုတိယ) အကြိမ်အဖြစ် လှူကြသည်။

၁။ ဒေါက်တာ ဦးမောင်မောင်ခင်+ဒေါ်ခင်အုန်း မိသားစု (ပြည်မြို့)             $ 200
၂။ ကိုအောင်နိုင်ဌေး+ ဒေါက်တာသော်သော် မိသားစု (ရန်ကုန်မြို့)            $ 100
၃။ ကိုပြည်ဆောင်+ မကြည်ကြည်ဝင်း မိသားစု (နယူးယောက်၊ အမေရိက)$ 100
၎။ ကိုပြည်စိုး+မမြမာလာသီ မိသားစု (စင်္ကာပူ)                                            $ 100

ထိုမိသားစုများကပဲ ပြီးခဲ့သည့်လက ပထမအကြိမ် အမေရိကန်ဒေါ်လာ ၇၀၀တို့ကို စောမယကောလိပ်တွင် Ph.Dအတွက် စာတမ်းပြုစုနေကြသော မြန်မာရဟန်းတော် အပါး ၂၀ တို့အား လှူဒါန်းခဲ့သေးသည်။

မြန်မာ၊ အမေရိက၊ စင်္ကာပူရှိ ဆွမ်းအလှူရှင်မိသားစု အားလုံးတို့အား ကိုယ်စိတ်နှစ်ပါး ကျန်းမာ ချမ်းသားလျှက် လောက-သာသနာ နှစ်ဖြာအလုပ်ကို စွမ်းစွမ်းတမံ ပြုလုပ်နိုင်ကြပါစေကြောင်း ဘုံဘေမြို့  စောမယကောလိပ်မှ မြန်မာရဟန်းတော်များက မေတ္တာပို့သနေပါကြောင်း---။

ရွှင်လန်းချမ်းမြေ့ပါစေ
သီတဂူစတား
၂၂-၁၂-၂၀၁၂

Read more »

သီတဂူအထူးတရားပွဲ (စင်္ကာပူ)

 

(မဟာဗောဓိပင်အောက် အခမ်းအနားဖွင့်ပွဲ)

 လာမည့် စနေနှင့် တနင်္ဂနွေနေ့  (၂၂-၁၂-၂၀၁၂နှင့် ၂၃-၁၂-၂၀၁၃) ညနေ စင်္ကာပူနိုင်ငံတွင် ကျင်းပမည့် သီတဂူဆရာတော်ဘုရားကြီး၏ တရားများပွဲကို အောက်ပါ ရုပ်သံလိုင်းများမှ အောက်ပါအစီအစဉ်အတိုင်း တိုက်ရိုက်ထုတ်လွှင့်ပေးပါမည်။

(၁) http://www.myaseintaung.net/live

(၂) http://dhammadownload.com/live1.htm

(၃) http://livedhamma.com/

သီတဂူဆရာတော်ဘုရားကြီး သည်

နေ့ ရက် ။ ။ ၂၂၊ ၁၂၊ ၂၀၁၂ (စနေနေ့ )

အချိန် ။ ။ စင်္ကာပူအချိန် ညနေ ၆း၃၀ မှ ၈း၃၀ အထိ (မြန်မာစံတော်ချိန် ညနေ၅း၀၀ မှ ၇း၀၀) GMT 10:30 am to 12:30 Pm

နေ့ ရက် ။ ။ ၂၃၊ ၁၂၊ ၂၀၁၂ (တနင်္ဂနွေနေ့ )

အချိန် ။ ။ စင်္ကာပူအချိန် ညနေ ၆း၃၀ မှ ၈း၃၀ အထိ (မြန်မာစံတော်ချိန် ညနေ၅း၀၀ မှ ၇း၀၀) GMT 10:30 am to 12:30 Pm

 

ဖေ့ဘုတ်သတင်းမှ ကူးယူဖော်ပြသည်

 

ရွှင်လန်းချမ်းမြေ့ပါစေ

သီတဂူစတား

၂၀-၁၂-၂၀၁၂

Read more »

နိုင်ငံတကာ ဗုဒ္ဓဘာသာအမွေအနှစ်ဆိုင်ရာ စာတမ်းဖတ်ပွဲ (သီတဂူ)

နိုင်ငံတကာ ဗုဒ္ဓဘာသာအမွေအနှစ်ဆိုင်ရာ စာတမ်းဖတ်ပွဲ (သီတဂူ)

 

(စာတမ်းဖတ်ပွဲအခမ်အနားဖွင့်ပွဲ သီတဂူဆရာတော်ကြီးနှင့် ဒုသမ္မတ ဆီမီးထွန်းပုံ)

(စုပေါင်း အမှတ်တရ)

ဗုဒ္ဓဘာသာအမွေအနှစ်ဆိုင်ရာ အပြည်ပြည်ဆိုင်ရာစာတမ်းဖတ်ပွဲ(International Seminar on Buddhist Cultural Heritage ) ဖွင့်ပွဲကို ဒီဇင်ဘာ ၁၅ ရက်၊ နံနက် ၈ နာရီ ၃၀ က သီတဂူကမ္ဘာ့ဗုဒ္ဓတက္ကသိုလ် (ရန်ကုန်) အတွင်းရှိ ဘွဲ့နှင်းသဘင်ခမ်းမဆောင် (ဓမ္မသဘာ)တွင် ကျင်းပခဲ့သည်။ ထိုစာတမ်းဖတ်ပွဲကြီးကို သီတဂူကမ္ဘာ့ဗုဒ္ဓတက္ကသိုလ်နှင့် အိန္ဒိယနိုင်ငံ ယဉ်ကျေးမူဆက်ဆံရေးကောင်စီတို့က ကြီးမူးကျင်းပသည်။

ဗုဒ္ဓအမွေအနှစ်စာတမ်းဖတ်ပွဲဖွင့်ပွဲသို့ နိုင်ငံတော်ဒုတိယသမ္မတ ဒေါက်တာစိုင်းမောက်ခမ်း၊ မြန်မာနိုင်ငံသို့ ချစ်ကြည်ရေးခရီးရောက်ရှိနေသည့် အိန္ဒိယနိုင်ငံ၊ ပြည်ပရေးရာဝန်ကြီး ဆယ်လ်မန်ခါရှစ်တို့လည်း တက်ရောက်ခဲ့သည်။

(သီတဂူကမ္ဘာ့ဗုဒ္ဓတက္ကသိုလ် (ရန်ကုန်) အတွင်း သီတဂူဆရာတော်ကြီး ဒု-သမ္မတနှင့်အဖွဲ့အား လိုက်လံပြသ)

 

(ဒု-သမ္မတနှင့်အဖွဲ့အား သီတဂူ အလုပ်အမှုဆောင်အဖွဲ့က ကြိုဆို)

ဒီဇင်ဘာ ၁၅ ရက်မှ ၁၇ ရက်အထိ သုံးရက်ကြာပြုလုပ်မည်ဖြစ်ပြီး အိန္ဒိယ၊ တောင်ကိုရီးယား၊ ထိုင်း၊ ကမ္ဘောဒီးယား၊ ဗီယက်နမ်၊ လာအို၊ ဗြိတိန်၊ သီရိလင်္ကာ၊ တရုတ်နိုင်ငံတို့မှ ပညာရှင်များနှင့် မြန်မာနိုင်ငံမှပညာရှင်များက ဗုဒ္ဓဘာသာအမွေအနှစ်ဆိုင်ရာ စာတမ်းများဖတ်ကြားကြမည်ဖြစ်ကြောင်း သတင်းရရှိသည်။

(အခမ်းအနားသို့ကြွရောက်လာ ဧည့်ပရိသတ်များ)

သတင်းဓာတ်ပုံများကို 7Days News Journalနှင့် Popular Myanmar News Journal တို့မှ ကူးယူ ကိုးကား ဖော်ပြသည်။

ရွှင်လန်းချမ်းမြေ့ပါစေ
သီတဂူစတား
၁၅-၁၂-၂၀၁၂

Read more »

သီတဂူဆရာတော် ဗုဒ္ဓဂယာရောက်

သီတဂူဆရာတော်ကြီး  ဗုဒ္ဓဂယာရောက်

သီတဂူဆရာတော်ကြီး ဒီဇင်ဘာ (၁)ရက်နေ့က ဗုဒ္ဓဂယာသို့ ရောက်ရှိလာသည်။ နိုဝင်ဘာ (၃၀)ရက် ည ရန်ကုန် တရားပွဲနှင့် ဒီဇင်ဘာ(၁) ရက်နေ့ ဗုဒ္ဓဂယာသို့ ကြွရန် ရန်ကုန်ရောက်နေစဉ် မုံရွာ ကြေးနီတောင် အရေးခင်းကြောင့် သံဃာ တော်တော်များများ ဒဏ်ရာ ပြင်းထန်စွာ ရသည်ကို ကြားသိရသဖြင့် ချက်ချင်း မုံရွာဘက်သို့အရောက်သွားခဲ့သည်၊ ဒဏ်ရာရ သံဃာများနဲ့ လူဝတ်ကြောင်များကိုပါ အားပေးစကား ပြောကြားခဲ့သည်၊ အလှူငွေများလဲ ပေးလှူခဲ့သည်။ ထိုအရေးနဲ့ပတ်သက်ပြီး (၃၀)ရက်နေ့ည ရန်ကုန်တရားပွဲတွင် ထည့်သွင်း ဟောကြားခဲ့သည်ဟု ဆရာတော်ကြီးက မိန့်သည်။ ထိုတရားနာယူနိုင်ပါသည်။ တခါ ချက်ချင်းပဲ ရန်ကုန်ပြန်လာပြီး နောက်နေ့မနက် ဗုဒ္ဓဂယာဘက်သို့ ရောက်လာခဲ့သည်။

(သီတဂူဆရာတော်ကြီးနဲ့အတူ မစိုးရိမ်ဆရာတော်ကြီး၊ နာလန္ဒာတက္ကသိုလ် ဒေါက်တာပန့်တို့ ဗုဒ္ဓဂယာ အခမ်းအနားတွင် တွေ့ရစဉ်)

၂-၁၂-၂၀၁၂ (၈) ကြိမ်မြောက် နိုင်ငံတကာ တိပိဋကရွတ်ဆို ပူဇော်ပွဲကို အစဉ်အလာ မပြတ် ကျင်းပလျှက်ရှိသည်။ အိန္ဒိယနိုင်ငံ ဗုဒ္ဓဂယာ မဟာဗောဓိပင်အောက်တွင် ဒီဇင်ဘာ (၂) ရက်နေ့မှ (၁၂)နေ့အထိ ကျင်းပသည်။ ထိုပွဲကြီးကို ဗုဒ္ဓဘာသာနိုင်ငံများမှ အလှည့်အကျ ဦးဆောင်ဦးရွက် တာဝန်ယူကာ ကျင်းပလေ့ရှိရာ ဒီ (၈)ကြိမ်မြောက်မှာတော့ မြန်မာနိုင်ငံက တာဝန်ယူ ကျင်းပသည်။ ထိုင်းနိုင်ငံကဲ့သို့ တခြားနိုင်ငံတွေမှာတော့ အစိုးရပိုင်းကပါ အကူအညီများပေးသည်ကို တွေ့ရပေမဲ့ မြန်မာနိုင်ငံအလှည့်မှာတော့ ကိုယ်ထူ ကိုယ်ထ ကုသိုလ်ရှင်များ ဖွဲ့စည်းလျှက် တာဝန်ယူ ကျင်းပသည်။
သီတဂူဆရာတော်ကြီးနှင့် တပည့်ဒကာဒကာမများ၊ သီတဂူဂီတဉ္စလီအဖွဲ့ (အလင်္ကာဝတ်ရည်) (အဆို၊ အက၊ ဗုဒ္ဓ၀င်ပြဇာတ်သရုပ် တင်ဆက်)၊ မဇ္ဈိမသံဃာ့မာတာ ကျောင်းအမဒေါ်မြရှင်နှင့်အဖွဲ့နှင့် အစိုးရမဟုတ်သော မြန်မာ့ပြည် စေတနာရှင်များက ပါဝင်ကုသုိုလ်ယူကြသည်ကိုလဲ တွေ့ရသည်။

သီတဂူစတား ဂယာရောက်
ထိုပွဲအတွက် ကြွရောက်လာသော သီတဂူဆရာတော်ကြီးကို ဖူးမျှော်လိုခြင်း၊ ဝေယျာဝေစ္စပြုလိုခြင်းနှင့် ဆရာတော်ကြီး၏ တပည့်ဒကာ ဒကာမများအတွက် လိုအပ်သည့်နေရာမှာ ၀ိုင်းဝန်းကူညီရန် သီတဂူစတားလဲ တခြားတပည့်များ နည်းတူ ဗုဒ္ဓဂယာသို့ နိုဝင်ဘာ (၂၈)ရက်နေ့ကထဲက ရောက်ရှိလာသည်။

 

(မြန်မာ့ရိုးရာ ဖျော်ဖြေရေး သီတဂူဂီတဉ္စလီအဖွဲ့နှင့် အမှတ်တရ) 

(မြန်မာ့ရိုးရာ ဖျော်ဖြေရေး သီတဂူဂီတဉ္စလီအဖွဲ့ရဲ့ တခါမှ မမြင်ဖူးသေးတဲ့ ဗုဒ္ဓ၀င်ပြဇာတ်သရုပ်ဖော် အဆို အကတွေကို သဘောကျ ကျေနပ်အားရကြောင်း၊ ကျေးဇူးတင် စကားပြောနေသော မစ်စ် ၀မ်မို)

 နိုင်ငံတကာ တိပိဋကရွတ်ဆို ပူဇော်ပွဲကို မြန်မာပြည်မှ ခမ်းနားထည်ဝါစွာ ကျင်းပနိုင်ခဲ့ပုံကို စာရေးသူ ဘုံဘေရောက်မှပဲ စာဖတ်သူများ ကြည်ညိုသဒ္ဓါပွားနိုင်ရန် တင်ပြပါဦးမည်။

ရွှင်လန်းချမ်းမြေ့ပါစေ
သီတဂူစတား
၃-၁၂-၂၀၁၂

Read more »

ရဟန်းခံပြုလိုသော ပဏ္ဍက (ပဏ္ဍုက်)များသို့

ရဟန်းခံပြုလိုသော ပဏ္ဍက (ပဏ္ဍုက်)များသို့

ဒီပို့စ်က စင်္ကာပူက ဒကာ သို့မဟုတ် ဒကာမတစ်ယောက်က မေးထားတဲ့ မေးခွန်းဖြစ်ပါတယ်။ သူ့ရဲ့ ပဏ္ဍက (ပဏ္ဍုက်)များကို ရဟန်းပြုခွင့်ပြုပါသလားဆိုတဲ့ မေးခွန်းနဲ့ ပတ်သက်ပြီး စာရေးသူ၏ ဆိုက်ထဲတွင် “သာသနာနှင့် ပဏ္ဍုက်” အမည်ဖြင့် ပို့စ်တစ်ခု တင်ပြီးဖြစ်သည်။ ပဏ္ဍုပ်ခေါ် gay များကို သာသနာမှာ သာမဏေ (ကိုရင်) အဖြစ်ကိုသော်၎င်း၊ ဘိက္ခု (ရဟန်း) အဖြစ်ကိုသော်၎င်း ဘာ့ကြောင့် ခွင့်မပြုသနည်း ဟူသော အကြောင်းကို ထိုပို့စ်တွင် ဖော်ပြပြီး ဖြစ်သည်။ ထိုကြောင့် ဤပို့စ်မှာတော့ ပဏ္ဍုက်အမျိုးစားနှင့် ရဟန်းဖြစ်ခွင့်ရှိသော ပဏ္ဍုက်အကြောင်းကိုသာ ဖော်ပြမည် ဖြစ်သည်။

မေးခွန်း
မေးခွန်းရှင် မေးထားတဲ့ အထဲမှာတချို့ စာအဖြစ်ရေးသင့် မရေးသင့် စဉ်းစားနေမိသေးသည်၊ ဘုရားရှင်တောင် မေထုနသိက္ခာပုဒ်ပညတ်ရာဝယ် အသေးစိတ် ဟောထားသဖြင့် “အော်--ဘုရားရှင်သည် သူ၏ သားတော် သမီးတော်များအတွက်၊ သာသနာအတွက် ဒီလို ယုတ်ရင်း ကြမ်းတမ်းသော စကားတွေကိုတောင် ပြောဆိုပြီး သိက္ခာပုဒ်တွေ ပညတ်ခဲ့ရပါလား” ဆိုပြီး ဘုရားရှင်အား ပိုလို့ ကြည်ညိုမိသည်။ ထို့ကြောင့် မေးခွန်းရှင်၏ မေးခွန်းများသည် သိသာ ထင်သာ မြင်သာလွန်း၍ စကားလုံးကြမ်းနေသည်ဟု ထင်စေကာမူ သာသနာတော်တွင်း ၀င်ရောက်လိုသူ၊ သာသနာတော်ကို ကြည်ညိုသူများ ဒီလိုမေးခွန်းမျိုးလဲ သိထားသင့်သည်ဟု ယူဆမိပါသည့်အတွက် မေးခွန်းကို မူရင်းအတိုင်း ဖော်ပြလိုက်ပါသည်။ နံပါတ် ၄-၅-၆ကိုတော့ စကားအသုံးအနှုံး အနဲပြင်းပြီး နံပါတ် ၄ ထဲမှာ တစ်ခုတည်းပေါင်ထားသည်။

အရှင်ဘုရား ..
ခေါင်းစဉ်မြင်တာနဲ့ ဘာကို မေးမယ်ဆိုတာ သိပြီးသား ဖြစ်မှာပါ။ အောက်ပါ အချက်တွေရှိနေတဲ့ လိင်တူဆက်ဆံတဲ့ ယောင်္ကျားက ရဟန်းပြုနိုင်ပါသလား..ဘုရား။

၁- ကိုယ်ခန္ဒာဖွဲ့စည်းပုံအားဖြင့် ယောက်ျား အစစ်ဖြစ်သူ (ယောက်ျား လိင်အင်္ဂါ ပြည့်စုံစွာပါရှိသူ)
၂- ယောက်ျားစိတ်ရှိပြီး သာမန်ယောင်္ကျားလို နေတတ်သူ (မိန်းမဆန်သော.. မိန်းမလို ပြောသော.. မိန်းမလို ဝတ်စားဆင်ယဉ်မှူမရှိသော)
၃- လိင်စိတ်အားဖြင့် ယောက်ျားချင်းကို သာ တတ်မက်သူ
၎-နည်းလမ်းမဟုတ်သော ပါးစပ်၊ စအိုအပေါက်တို့ဖြင့် လိင်ဆက်ဆံဖူးသူ
၅- မိန်းမ၊ ယောက်ျား နှစ်မျိုးလုံးဖြင့် လိင်ဆက်ဆံဖူးသူ
၆- ခြေလက်အင်္ဂါ ပြည့်စုံသော ယောက်ျားဖြစ်သူ
၇- သာမန် လူ အစစ်ဖြစ်သူ (သာမန် အသိစိတ်ရှိသူ၊ ရူးသွပ်မှုမရှိသူ)
၈- ဗုဒ္ဓတရားတော်ကို ကျင့်ကြံလိုသူ (သံသရာ မှ လွတ်မြောက်လိုသူ)
ဗုဒ္ဓတရားတော်မှာ ပဏ္ဍုက်ဆိုတဲ့ စကားကို တွေ့ဖူးပါတယ်ဘုရား။ မြတ်စွာ ဘုရား လက်ထက်တော်က အဲဒီလိုမျိုးလူမျိုးတွေ ရှိခဲ့ဖူးပါသလား ဘုရား။ ရဟန်းဝတ်လို့ ရနိုင်ပါသလား ဘုရား။ အထက်ပါ လူမျိုးက ရဟန်းဝတ်စဉ်မှာ မေးတဲ့.. သင် ယောင်္ကျား အစစ် ဟုတ်ပါရဲ့လား ဆိုတာကို ဟုတ်ပါတယ်လို့ ပြန်ဖြေနိုင်ပါသလား ဘုရား။ အရှင်ဘုရား အချိန်ပေးနိုင်မယ်ဆိုရင် ကျန်းဂန် အကိုးအကားနှင့် တကွ ဖြေကြားပေးစေလိုပါတယ် ဘုရား..။ အရှင်ဘုရားရဲ့ website မှာ ဖြေမယ်ဆိုလည်း website link ကို တပည့်တော်ဆီကို ပို့ပေးစေချင်ပါတယ် ဘုရား။

အမှန် အတိုင်း ဝန်ခံရမယ်ဆိုရင် အထက်ပါ အချက်တွေက တပည့်တော်နဲ့ ကိုက်ညီပါတယ် ဘုရား။ ခေတ်စကားနဲ့ ပြောရင် ဂေး (gay) ဖြစ်မယ်ထင်ပါတယ် ဘုရား။ တပည့်တော် ရဟန်း ဝတ်ချင်စိတ်လည်း ရှိပါတယ်ဘုရား။ တပည့်တော် အခု အသက် ၃၀ ကျော်ပါပြီ။ အင်္ဂျင်နီယာ အလုပ်နဲ့ မိဘဆွေမျိုးတွေကို တတ်နိုင်သလောက် ကူညီထောက်ပံ့ပါတယ်။ အိမ်ထောင် မရှိသေးပါဘူး ဘုရား။
အရှင်ဘုရား ဝဘ်ဆိုဒ်မှာ ရေးထားတဲ့ အောက်ပါ ဆုံးမ စကားအတွက် ကျေးဇူးပါပဲ ဘုရား။

(ဆန္ဒကို ကိုယ့်ရဲ့သိက္ခာနဲ့ ထိမ်းပါ၊ လူရဲ့စိတ်ဆိုတာ မကောင်းတဲ့ဘက်မှာ မွေ့လျော်တတ်သည်၊ ထိုသို့ မကောင်းတဲ့ဘက်မှာ ဆန္ဒရှိလာရင် ကိုယ့်သိက္ခာ၊ ကိုယ့်ဂုဏ်၊ ကိုယ့်အသိုင်းအ၀ိုင်းနဲ့ ထိမ်းပါ။)
ဒါပေမယ့် တပည့်တော် မိမိ အလိုဆန္ဒကို မထိန်းနိုင်သေးပါဘူး ဘုရား။ တပည့်တော်က မိဘဆွေမျိုးနဲ့ ဝေးတဲ့ အခြား ရပ်ဝေးမှာ နေတော့ လွတ်လပ်ပြီး အုပ်ထိန်းမယ့်သူ မရှိပါဘုရား။ မိမိကိုယ်မိမိလည်း တခါတရံသာ ထိန်းနိုင်ပြီး တခါတရံမှာ မထိန်းနိင်ပါဘူး ဘုရား။

တပည့်တော်ကို ဆုံးမစကားလည်း ချီးမြှင့် ပေးတော်မူပါဘုရား။ တပည့်တော် ရဟန်း ဝတ်နိုင်၊ မဝတ်နိုင်ကိုလည်း အကြောင်းပြန်ပေးပါဘုရား။ ဝတ်ခွင့်မရှိဘဲ ရဟန်းဝတ်လို့ အကုသိုလ်ဖြစ်နေမှာကိုလည်း စိုးရိမ်ပါတယ်။ မိမိရဲ့ စိတ်ကို မိမိသာ အသိဆုံးမို့ ကိုယ့်ကိုယ်လည်း လေးစားလို့ မရသေးပါဘူးဘုရား။ တပည့်တော်ရဲ့ မေးခွန်းတွေကို အခြား တပည့်တော်လို ဘဝတူသူတွေ ဗဟုသုတရနိုင်အောင် အရှင်ဘုရားရဲ့ ဝဘ်ဆိုဒ်မှာ တင်မယ်ဆိုလည်း အရှင်ဘုရား သဘောပါဘုရား။
အရှင်ဘုရား ကျန်းမာ၊ချမ်းသာစွာ ဖြင့်သာသနာ ပြုနိုင်ပါစေ ဘုရား။
လေးစားစွာဖြင့် ..
မောင်မောင်

+++++++++++

စာရေးသူ၏ပြန်ကြားစာ

ဒကာတော်လို့ပဲ ခေါ်ရမလား ဒကာမလို့ပဲ ခေါ်ရမလား၊ ဒါမှ မဟုတ် ဒကာ-ဒကာမ ပေါင်းပြီး ခေါ်ရမလား pppppp၊ ရဟန်းပြုချင်သူဆိုတော့ ဒကာရေလို့ပဲ ခေါ်လိုက်မယ်။ ဒကာမေးတဲ့ မေးခွန်းကို ဘုန်းဘုန်းဆိုက်မှာ “သာသနာနှင့်ပဏ္ဍုက်” လို့ အမည်ပေးပြီး ရေးထားတယ်၊ အဲဒါကိုလဲ ဖတ်စေချင်တယ်၊ ဒကာ မေးတဲ့ မေးခွန်းကို စာပေမှာ ပြထားတာကို ဖော်ပြပေးလိုက်မယ်၊ ဒကာအနေအနဲ့ ဘယ်လိုလုပ်သင့်လဲ ဆိုတာ သိသာသွားလိမ့်မည် ထင်ပါတယ်။

ပုံမှန်မဟုတ်တဲ့ နည်းသုံးသူ
ဒကာမေးထားတဲ့ (၁)ကနေ (၄) အထိ မေးခွန်းနဲ့ပတ်သက်ပြီး သူက ပဏ္ဍုက်လို့ မယူဆပါဘူး၊ ရာဂကြီးသူ အလိုရမ္မတ်ကြီးသူလို့ပဲ ဆိုနိုင်ပါတယ်၊ ထိုပုဂ္ဂိုလ်မျိုးကို ရဟန်းမပြုရလို့ ပညတ်ထားတာ မတွေ့ရပါဘူး၊ ယောက်ျားစင်စစ်ဖြစ်သူ ဖြစ်ရကား ယောကျာ်းဟူ၍ ဖြေဆိုရမည်။ သို့သော်လဲ ကာမေသုမိစ္ဆာစာရ ကံကိုတော့ သတိမူသင့်တယ်၊ ကာမေသုမိစ္ဆာစာရနှင့်ပတ်သက်ပြီး ဘုန်းဘုန်းဆိုက်မှာပဲ ဖော်ပြပြီးဖြစ်သည်၊ ရှာဖွေ လေ့လာနိုင်ပါသည်။ အများစု သိထားတာက ထိုကံသည် သူများ သားမယား၊ ကာမပိုင် ရှိသူကို သားမယားကျင့်ခြင်းလို့ သိထားကြသည်။ သို့သော်လည်း ကိုယ့်မယားကိုပင် ကာမဆက်ဆံရာဝယ် တိရစ္ဆာန်များလို ပုံမှန်မဟုတ်တဲ့ နည်းတွေနဲ့ ပြုကျင့်ပါက ကာမေသုမိစ္ဆာစာရ ကံထိုက်သည်ဟု ဆိုထားသည်။ ထို့ကြောင့် ထိုနံပါတ်ပြထားတဲ့ အချက်တွေ လွန်ကျူးထားသူသည် ရဟန်းပြုခွင့်ရှိသူဟု ဆိုနိုင်သည်၊ ကာမေသုမိစ္ဆာစာရ ကံကိုတော့ ကျူးလွန်သူဟု ဆိုရမည်။

ပဏ္ဍုက်အမျိုးမျိုးနှင့် ရဟန်းပြုခွင့်ရသူများ
ဘုရားသာသနာမှာ ပဏ္ဍုက်များကို ရဟန်းပြုခွင့်မရ ဟု ဆိုထားပေမဲ့ အဋ္ဌကထာ ဆရာများရဲ့ အဆိုအရ တချို့ပဏ္ဍုက်တွေမှာ ရဟန်းပြုခွင့်ရနေသည်ကို တွေ့ရသည်။ ၀ိနည်းမဟာဝါ အဋ္ဌကထာမှာတော့ ပဏ္ဍုပ် ၅ မျိုး ပြထားသည်။

၁။ အာသိတ္တပဏ္ဍက- သူတပါးလိင်အင်္ဂါမှ သုက်သွေးကို မိမိပါးစပ်ဖြင့် စုပ်ယူလိုက်ခြင်းမျှဖြင့် အလိုရမ္မက်ပြေငြိမ်းသွားသူ။
၂။ ဥသူယပဏ္ဍက- သူတစ်ပါး လင်မယား သို့မဟုတ် သမီးရည်းစားတို့ သူတို့အလုပ် သူတို့လုပ်နေခြင်းကို ချောင်းမြောင်းကြည့်ရုံမျှဖြင့် အလိုရမ္မက် ငြိမ်းသွားသူ။
၃။ သြပက္ကမိကပဏ္ဍက- မျိုးဗီဇကို ထုတ်ပစ်ထားသူ၊ (နွားထီးများ ဝှေးစေ့ထုတ်ခြင်း၊ တရုတ် ကုန်းကုန်းများကဲ့သို့ ဝှေးစေ့ထုတ်ပစ်ထားခြင်းမျိုး ဖြစ်ဟန်တူ)
၎။ ပက္ခပဏ္ဍက-အကုသိုလ်ကံကြောင့် အခါအားလျော်စွာ စိတ်ပြောင်းသူ၊ လဆန်းပက္ခမှာ ပဏ္ဍုပ်ဖြစ်ပေမဲ့ လဆုတ်ပက္ခမှာ ပြေပျောက်သူ။
၅။ နပုံသကပဏ္ဍက- မွေးကထဲက နပုံးဖြစ်နေသူ၊ ယောက်ျားလဲ မဟုတ်၊ မိန်းမလဲ မဟုတ်သူ၊ ဗီဇ နှစ်ခုလုံး မထင်ရှားသူ။

အရှင်မဟာဗုဒ္ဓဃောသ (အဋ္ဌကထာဆရာ) အရ နံပါတ် (၁)နှင့် နံပါတ် (၂) ပဏ္ဍုက်အမျိုးစားကို ရဟန်းပြုခွင့်ရသည်။ ထိုအဆိုအရ ဒကာမေးခွန်းရဲ့ နံပါတ် တစ်ကနေ ခုနစ်အထိ နည်းလမ်းများဖြင့် ကျူးလွန်နေသောသူ ထိုပဏ္ဍုက်အမျိုးစားထဲပါဝင်နေရင်တောင် ရဟန်းပြုခွင့်ရ၊ ယောက်ျားစင်စစ်ဆိုရင်ကား ဆိုဖွယ်မရှိချေ။ ကုရုန္ဓိယအဋ္ဌကထာမှာတော့ နံပါတ် (၃) ပက္ခပဏ္ဍကကိုတော့ ပဏ္ဍုက်ပြေပျောက်ချိန် ပက္ခမှာတော့ ရဟန်းပြုခွင့်ရသည် ဟုဆိုထားသေးသည်။ ဒကာက ကိုယ့်ကိုယ်ကို ပဏ္ဍုက်လို့ ယူဆထားရင် ဘယ်ပဏ္ဍုက်ထဲပါဝင်သနည်းဆိုတာ ကိုယ့်ကိုယ်ပဲ အသိဆုံးဖြစ်မည်။

နောက်တစ်ခုက ယောက်ျားအင်္ဂါ၊ မိန်းမအင်္ဂါ နှစ်မျိုးလုံးပါနေသူကို ဥဘတောဗျဉ်း (ဥဘတောဗျဉ္ဇနက) ဟုခေါ်သည်။ မိန်းမ အင်္ဂါ ပိုထင်ရှား၍ ယောက်ျားအင်္ဂါ မထင်ရှားသော ဣတ္ထိဥဘတောဗျဉ်းနှင့် ယောက်ျားအင်္ဂါ ပိုထင်ရှား၍ မိန်းမအင်္ဂါ မထင်ရှားသော ပုရိသဥဘတောဗျဉ်းဟူ၍ နှစ်မျိုးရှိရာ ဣတ္ထိဥဘတောဗျဉ်းက ကိုယ်ကိုယ်တိုင်လည်း ကိုယ်ဝန်ဆောင်နိုင်သလို သူတပါးကိုလည်း မျိုးစေ့ပေးနိုင်သည်၊ ပုရိသဥဘတောဗျဉ်းကတော့ သူတပါးကိုပဲ မျိုးစေ့ပေးနိုင်သည်၊ ကိုယ်ကိုယ်တိုင်က ကိုယ်ဝန်မဆောင်နိုင်။ ထိုဥဘတောဗျဉ်းနှစ်မျိုးလုံး ကိုရင်ဘ၀ရော ရဟန်းဘ၀ကိုပါ ဖြစ်ခွင့်မရှိ။ ရဟန်းပြုခွင့်မရသော ပဏ္ဍုက်တို့ မိဘသတ်ဖူးသူတို့စသည်ဖြင့် သူတို့သည် ၀တ္ထုဝိပတ္တိဖြစ်ရကား ရဟန်းဖြစ်ခွင့် အင်္ဂါမစုံဟုဆိုသည်။

ဒကာမေးထားတဲ့ မေးခွန်းများသည်၊ ဘုရားရှင် လက်ထက်ကထဲက ရှိခဲ့ဖူးသည်၊ ကိုယ်ပြုခဲ့သော ကုသိုလ်ကံ အကုသိုလ်ကံကြောင့် ဘ၀မှာ ပုံသဏ္ဌာန်အမျိုး၊ ဘ၀ရဲ့ အနိမ့်အမြင့် ကွာဟသွားကြသည်။ ဘ၀မှာ လက်ရှိ ရတောင့်ရခဲလှတဲ့ လူ့ဘ၀ကို ဘယ်လို ဆက်ဖြတ်သန်းမလဲ ဆိုတာ ပို၍ အရေးကြီးသည်။ ရလာတဲ့ လက်ရှိဘ၀ကို တွယ်တာနေခြင်း မုန်းတီးနေခြင်းများ ဖြစ်နေမည့်အစား ပို၍ပို၍ ဘယ်လိုကောင်းအောင် လုပ်သင့်သလဲ ဆိုတာကိုပဲ စဉ်းစားရမှာ ဖြစ်သည်။

ဒကာတော်ရေ--ပဏ္ဍုက်နဲ့ပတ်သက်ပြီး ၀ိနည်းမဟာဝါ အဋ္ဌကထာ၊ ပရိဝါရအဋ္ဌကထာ၊ ကင်္ခါဝိတရဏီအဋ္ဌကထာ၊ ၀ိနယသင်္ဂဟအဋ္ဌကထာတို့မှာ ပါရှိသည်အတွက် အဲဒီစာအုပ်တွေမှာ လေ့လာနိုင်သည်။ မြန်မာလို ရှင်းရှင်းလင်းလင်းရေးထားတဲ့ သင်္ဂြိုဟ်ဘာသာဋီကာ၊ ပါတိမောက်ဘာသာဋီကာ (မဟာဂန္ဓာရုံဆရာတော်)တို့မှာ ဖတ်ရှုနိုင်ပါသည်။ ရဟန်းပြုချင်တဲ့စိတ်ရှိနေတာကိုက ယောက်ျားစိတ်ဖြစ်နေတယ်လို့ ယုံကြည်မိပါသည်၊ ယောက်ျားဖြစ်ထိုက်တဲ့ အချက်အလက်တွေ ပြည့်စုံပါက ရဟန်းပြုလိုချင်စိတ်ရှိတဲ့အခါ ရဟန်းပြုလိုက်ပါလို့ပဲ တိုက်တွန်းပါတယ်။ “ဆန္ဒကို ကိုယ့်ရဲ့သိက္ခာနဲ့ ထိမ်းပါ” ဆိုတဲ့ အချက်ကိုတော့ အမြဲနှလုံးသွင်းထားပါ။ မကောင်းတဲ့ စိတ်ဖြစ်တိုင်း သတိရှိပါ၊ သိပါ၊ ဒါဆို ထိမ်းနိုင်ပါလိမ့်မည်။ ဒီလောက်ဆိုရင် ဒကာသိချင်တဲ့ အချက် ပြည့်စုံမည် ထင်ပါသည်၊ မေးဖော်ရတဲ့အတွက်ရော ဘုန်းဘုန်းရဲ့ ဆိုက်ကို အားပေးသည့်အတွက်ပါ အထူးကျေးဇူးတင်ပါသည်။

ရွှင်လန်းချမ်းမြေ့ပါစေ
သီတဂူစတား
၂၂-၁၁-၂၀၁၂

Read more »

(၁၉)ခုမြောက် သီတဂူစက္ခုဒါနဆေးရုံ

(၁၉)ခုမြောက် သီတဂူစက္ခုဒါနဆေးရုံ

သီတဂူစက္ခုဒါန မျက်စိအထူးကုဆေးရုံကို ရှမ်းပြည်မြောက်ပိုင်း၊ မူဆယ်ခရိုင်၊ နမ့်ခမ်းမြို့၊ ဇေယျသုခဘုန်းတော်ကြီးသင် ပညာရေးကျောင်းဝင်းအတွင် တည်ဆောက် ဖွင့်လှစ်သည်။ ၂၀၁၂- နိုဝင်ဘာ ၁၄ ရက်နေ့တွင် သီတဂူစက္ခုဒါန ဆေးရုံဖွင့်ပွဲအခမ်းအနား ကျင်းပခဲ့သည်။

(သီတဂူစက္ခုဒါန ဆေးရုံဖွင့်လှစ်ပွဲ)

သီတဂူစက္ခုဒါနဆေးရုံတော်အတွက် မြေနေရာနှင့် အဆောက်အဦးကို ဇေယျသုခဘုန်းတော်ကြီးနှင့် တပည့် ဒကာ ဒကာမများက လှူဒါန်းသည်။ ထိုဆေးရုံတွင်တပ်ဆင်သော မီးစက်၊ ဆေးရုံသုံးပစ္စည်းအားလုံးကို သီတဂူဆရာတော်ကြီးနှင့် တော်ဝင်စင်တာမှ ဦးကိုကိုထွေး မိသားစု၊ ရာစုသစ်ရွှေဆိုင်ပိုင်ရှင် ဒေါ်ရွှေဥတို့နှင့် သီတဂူသာသနာပြုအဖွဲ့က လှူဒါန်းသည်ဟု သိရသည်။

သီတဂူသာသနာပြုအဖွဲ့၏ ၁၉ ခုမြောက်ဆေးရုံတော်ဖြစ်သော သီတဂူစက္ခုဒါန မျက်စိအထူးကုဆေးရုံ (နမ့်ခမ်း)ကို သီတဂူသာသနာပြုအဖွဲ့မှ ကျပ်သိန်းပေါင်း ၄၀၀၀ (လေးထောင်) ကျော် ပါဝင် လှူဒါန်းထားသည်ဟု သိရသည်။

ယခု ၂၀၁၂ခုနှစ်၊ နိုဝင်ဘာ ၁၁ ရက်နေ့က စပြီး မျက်စိဝေဒနာရှင်များကို အခမဲ့ စမ်းသပ်ခြင်း၊ စစ်ဆေးခြင်း၊ ကုသခြင်းများကို ပြုလုပ်နေပြီ ဖြစ်သည်။

(ဖွင့်ပွဲအခမ်းအနား မြင်ကွင်း)

ရွှင်လန်းချမ်းမြေ့ပါစေ
သီတဂူစတား
၂၁-၁၁-၂၀၁၂

Read more »

ကောလာဟလ သတင်းများ

ကောလာဟလ သတင်းများ

စာမိတ်ဆက်
တစ်နေ့က ဒကာမတစ်ယောက်က အီးမေလ်ကနေ ကောလာဟလ ငါးမျိုးအကြောင်းနဲ့ ပတ်သက်ပြီး မရှင်းတာလေးရှိလို့ မေးပါရစေဘုရားတဲ့၊ တပည့်တော်မ ကောလာဟလအကြောင်း ငါးမျိုးကို ဆရာတော်ကြီးတွေ ဟောတာ နာယူမှတ်သားဖူးတယ်ဘုရားတဲ့၊ ဒါပေမဲ့ အဲဒီ ငါးမျိုးထဲက တစ်ခုကိုတော့ ဘယ်ဆရာတော်မှ အကျယ်တ၀န့်ပြောမသွားဘူးဘုရား၊ တပည့်တော် ကျန်တာတွေကို အကျဉ်းအရိပ်ယောင်လောက်တော့ သိတယ်ဘုရား၊ တစ်ခုကိုတော့ မသိလို့ ရှင်းပြပေးပါဘုရားတဲ့။ အမှန်ပြောရရင် စာရေးသူလဲ အဲဒီ ကောလာဟလ ငါးမျိုးကို ကြားသာ ကြာဖူးသည်၊ သိပ်ပြီး ဂဃနဏ မသိလှဘူး၊ ထို ဒကာမ မေးမှပဲ ပြန်ကြည့်ဖြစ်တယ်၊ ထို့အတွက် ထိုဒကာမကို အထူးကျေးဇူးတင်မိသည်။ ကောလာဟလနဲ့ပတ်သက်ပြီး တက်နိုင်သလောက် စုစည်းပြီး တင်ပြလိုက်ရပါသည်။

ကောလာဟလ ၅ မျိုး
ကောလာဟာလဟူသည်ကား အုတ်အုတ်ကျက်ကျက်သော အသံဖြစ်လျှက် လောက၌ ကျော်စောခြင်းဖြစ်သတည်း။ ကောလာဟလကို အင်္ဂလိပ် အဘိဓာန်မှာတော့ Rumour ဟု ဆိုသည်။ ထို အင်္ဂလိပ် အဘိဓာန် အဆိုအရ လူတွေရဲ့ ဟိုအကြောင်း ဒီအကြောင်း ပြောတဲ့ သတင်းအစိတ်ပိုင်းတစ်ခု၊ ထိုသတင်းက မှန်ချင်မှ မှန်မည်၊ အတိအကျ သတင်းကား မဟုတ်။ စာရေးသူတို့ ငယ်ငယ်က ကြားဖူးသည်မှာ ကောလာဟလ ကြံကုန်ကြ ဒေ၀ မနုဿာတဲ့။ လူတွေ နတ်တွေ ကြံစည် စိတ်ကူးပြီး ပြောဆိုတဲ့ စကားကို ကောလာဟလ ဟုခေါ်သည်။

ကောလာဟလ အမျိုးအစားကိုတော့ အပါဒါန အဋ္ဌကထာ ပထမ-၅၈၊ ဗုဒ္ဓ၀ံသအဋ္ဌကထာ ၃၁၇၊ ဇာတကအဋ္ဌကထာ ပထမ-၅၆ နှင့် ၀ိသုဒ္ဓိမဂ်တို့မှာ-
၁။ ကပ္ပကောလာဟလ
၂။ ဗုဒ္ဓကောလာဟလ
၃။ စက္က၀တ္တိ ကောလာဟလ ဟု ကောလာဟလ သုံးမျိုးပဲ ပြထားသည်ကို တွေ့ရသည်။
ခုဒ္ဒပါဌအဋ္ဌကထာ နှာ-၁၀၁ နှင့် သုတ္တနိပါတ အဋ္ဌကထာ ဒုတိယအုပ် စာမျက်နှာ ၃တို့မှာတော့---
၁။ ကပ္ပကောလာဟလ
၂။ စက္က၀တ္တိ ကောလာဟလ
၃။ ဗုဒ္ဓကောလာဟလ
၎။ မင်္ဂလာ ကောလာဟလ
၅။ မောနေယျ ကောလာဟလ ဟု ကောလာဟလ ငါးမျိုးကိုပြထားသည်။

နောက်ထူးခြားမှုတစ်ခုမှာ သုံးမျိုးပြကောလာဟလ ရှေ့နောက် အစဉ်နှင့် ငါးမျိုးပြ ရှေ့နောက် အစဉ်တို့လဲ အထက်အောက်ပြောင်းနေသည်ကို တွေ့ရသည်။ ပြောင်းသည့်နံပါတ်မှာ နှစ်နှင့် သုံး ဖြစ်သည်။ သို့သော်လဲ အရေးမကြီးပေ၊ အများဆုံးပြ ငါးမျိုးကိုလေ့လာမည်၊ သုံးမျိုးပြ ငါးမျိုးပြ ကွဲပြားနေပေမဲ့ အတူပါသည့် သုံးမျိုးလုံး ရှင်းလင်းချက်ကိုတော့ အဓိပ္ပါယ် လုံးဝတူဖြစ်နေသည်။

၁။ ကပ္ပကောလာဟလ
ကပ္ပကောလာဟလ-ကမ္ဘာကြီးပျက်တော့မည့် ကောလာဟလသတင်းကို ကြွေးကြော်ကြခြင်း။ ကာမဘုံသား နတ်များတို့သည် ခေါင်းကို ငိုက်စိုက်ကျခြင်း၊ ဆံပင်တွေ ဖရိုဖရဲဖြစ်နေခြင်း၊ မျက်နှာ၌ မျက်ရည်တို့ကို သုတ်ခြင်း၊ ၀မ်းနဲခြင်းအထိမ်းအမှတ် အနီရောင် အ၀တ်အစားများကို ၀တ်ဆင်ခြင်း (ယနေ့ခေတ် ၀မ်းနဲခြင်း သင်္ကေတ အနက်ရောင်) စသည်ဖြင့် ငြိုးနွမ်းပင်ပန်း ၀မ်းနဲသော အသွင်ဖြင့် လမ်းမှာ တွေ့သမျှလူအားလုံးကို သတင်းစကား ပေးကြသည်။ သူတို့ ၀မ်းနဲစွာ ပြောသော စကားမှာ “အမောင်တို့--- အနှစ်တစ်သိန်းနောက်ပိုင်း ဒီကမ္ဘာကြီး ပျက်စီးလိမ့်မည်၊ သမုဒ္ဒရာရှိ ရေတွေ ခန်းခြောက်လိမ့်မည်၊ ဒီမဟာမြေကြီးနှင့် တောင်တွေ အားလုံး မီးဟုန်းဟုန်းတောက်လိမ့်မည်၊ ထိုမီးတောက်တို့သည် ဗြာဟ္မာပြည် ပထမဈာန်အထိ လောင်ကျွမ်းပြီး ကမ္ဘာကြီး ပျက်စီးလိမ့်မည်၊ ထို့ကြောင့် အချင်းအချင်း မေတ္တာပွားကြ၊ ကရုဏာထားကြ၊ မုဒိတာ ပေးကြ၊ ဥပေက္ခာ ရှုကြ၊ အမေ အဖေကို ပြုစုလုပ်ကြွေးကြ၊ ကြီးသူကို ရိုသေလေးစားကြ” ဟူသတည်း။ ဒါကိုပဲ ကပ္ပကောလာဟလ ခေါ်သည်။ ဒီလို ကောလာဟလမျိုးသည်၊ ကမ္ဘာပေါ်ရှိ သတ္တ၀ါတွေ ကိုယ်ကျင့်တရား လုံးဝပျက်စီးသွားပြီး၊ အဖေ အမေ၊ အစ်ကို အစ်မ မသဲကွဲတော့တဲ့အချိန်၊ ရှက်ခြင်း ကြောက်ခြင်းဆိုတဲ့ လောကပါလ တရားနှစ်ပါး ပျောက်ကွယ်သွားတဲ့ အချိန်၊ လူတွေရဲ့ သက်တမ်းသည်လည်း အနိမ့်ဆုံးသို့ ရောက်သွားသည့်အချိန်၊ လက်ဖြင့် စမ်းသပ် ကိုင်မိရာ အရာမှန်သမျှတို့သည် လူကို သေစေနိုင်သော လက်နက် ဖြစ်သည့်အချိန်မှာ ဖြစ်တတ်သည်။

၂။ စက္က၀တ္တိ ကောလာဟလ
စက္က၀တ္တိ ကောလာဟလ-စကြာဝတေးမင်း ပွင့်လိမ့်မည်ဟူသော ကောလာဟလ သတင်းပျံ့ခြင်း။ စကြာဝတေးမင်းဆိုတာလဲ အလွန်ထူးခြားသည့် လူသားတစ်ယောက် ဖြစ်သည်။ သူ့မှာ ပိုင်ဆိုင်သည့် သားကြီးရတနာ၊ မိန်းမရတနာ၊ ဂဟပတိ ရတနာ၊ စကြာရတနာ စတဲ့ ရတနာတွေကလဲ ဘယ်သူမှ မပိုင်ဆိုင်နိုင်သည့် ရတနာတွေဖြစ်သည်။ ပါရမီအမြင့်ဆုံးရောက် လူသားတစ်ယောက်သည် လောကီလူသား ဖြစ်လျှင် စကြာဝတေးမင်း ဖြစ်သည်၊ အကယ်၍ လောကီကို စွန့်လျှင်ကား ဘုရားဖြစ်မည်။ ထိုစကြာဝတေးမင်းသည် ဘုရားရဟန္တာတို့နှင့် တန်းတူ စေတီတည်ပြီး ကိုးကွယ်ထိုက်သည်ဟုတောင် ဆိုထားသေးသည်။ ဤကဲ့သို့ထူးခြားသည့် စကြာဝတေးမင်းသည် အနှစ် တစ်သိန်း ကျော်လွန်သွားရင် လောကကြီးထဲမှာ ထူးခြားစွာ ပွင့်တော်မူလိမ့်မည်ဟု နတ်တွေက ကြွေးကြော်ကြခြင်းသည် စက္က၀တ္တိ ကောလာဟလ မည်၏။

၃။ ဗုဒ္ဓကောလာဟလ
ဗုဒ္ဓကောလာဟလ- ဘုရားပွင့်မည်ဟုသော သတင်းစကား ကြွေးကြော်ကြခြင်း။ လောကပါလ နတ်တွေ၊ (တချို့နေရာမှာ) ဗြာဟ္မာအ၀တ်အစားတွေ ၀တ်ဆင်ပြီး သုဒ္ဒါဝါသ နတ်တွေက “ယခုချိန်မှ အနှစ်တစ်ထောင်လွန်လျှင် လောကကြီးထဲမှာ လောကအားလုံးကို သိတော်မူသော သဗ္ဗညု ဘုရား ပွင့်တော်မူလိမ့်မည်”ဟု မြို့ရွာတွေထဲမှာ လှည့်လည် ကြွေးကြော်ကြခြင်းကို ဗုဒ္ဓကောလာဟလ ဟုခေါ်သည်။ သဗ္ဗညု ဘုရား ပွင့်တော်မူလိမ့်မည်ဟုသော ကြွေးကြော်သံကို ယုံကြည်ကြသော တစ်သောင်းသော စကြာဝဠာရှိ နတ်အပေါင်းတို့က ဘယ်သူ ဘုရားဖြစ်ထိုက်သနည်း ဟု ဆွေးနွေးတိုင်ပင်ကြသတဲ့။ ထိုသို့ တိုင်ပင်ဆွေးနွေးပြီး ဘုရားဖြစ်ထိုက်သော တုသိတာနတ်ပြည်ရှိ နတ်သားကို ချဉ်းကပ်ပြီး တောင်းပန် လျှောက်ထားကြသတဲ့၊ “လူ့ပြည်သွားပြီး အချိန်၊ နေရာ၊ ကျွန်း၊ အမျိုး၊ အသက်အပိုင်းအခြားတို့ကို ဆင်ခြင်သုံးသပ်ပြီး ဘုရားအဖြစ် ပွင့်တော်မူပါ” ဟု တောင်းပန်ကြ၏။ ပါရမီပြည့်ဝပြီး ကမ္ဘာ့ခေါင်းဆောင်၊ လောက ဥသျှောင် ဖြစ်ထိုက်သူကို သာမန်လူသားတွေ မရွေးချယ်နိုင်၊ နတ်တွေကသာ ရွေးနိုင်သည်ဟု ဆိုရမည်။ လောကဥသျှောင်ကို နတ်တွေကပဲ ရွေးချယ်တင်မြောက်၊ နတ်ပြည်ရဲ့ ဒီမိုကရေစီ၊ လောကကြီးရဲ့ ဒီမိုကရေစီ အလား ဖြစ်ရသည်။ မှတ်မိသေးသည်၊ တလောက အမေရိကန် သမ္မတလောင်းနှစ်ယောက် ပြည်သူလူထုရှေ့မှာ နိုင်ငံတော်အတွက် စကားစစ်ထိုးပွဲ ပြိုင်ရသည်။ အမေရိကန် ဒီမိုကရေစီမှာတော့ သမ္မတဖြစ်ထိုက်တဲ့ ပါရမီရှင်များကို ပြည်သူက ရွေးချယ်ပြီး လူထုရှေ့မှာ အရည်အချင်း ပြိုင်စေပြီး လူထုကပဲ အရည်အချင်းစစ်၍ အမှတ်များသူကို သမ္မတအဖြစ် တင်မြောက်သည်။ ထူးခြားသည့် လူသားတစ်ယောက်ကို သာမန် လူသားတွေက ဤနည်းဖြင့် ရှာဖွေကြသည်။ ပါရမီ အထွဋ်အထိပ် ရောက်နေသော လောကဥသျှောင်ကိုတော့ သာမန်လူသားတွေ မရှာဖွေနိုင်၊ နတ်တွေ ဗြဟ္မာတွေကသာ ရှာဖွေနိုင်သည်။ ထို့ကြောင့် ခေါင်းဆောင်ဆိုတာ အာဏာမဟုတ်၊ သူ၏ပင်ကိုယ် အရည်အချင်းဖြစ်သည်။ ဤကား ဒီမိုကရေစီနည်းတည်း။

၎။ မင်္ဂလာ ကောလာဟလ
မင်္ဂလာ ကောလာဟလ- မင်္ဂလာအကြောင်း တောင်တောင်အီအီ တွေးတော ကြံစည်ကြခြင်း။ လောကမှာ မင်္ဂလာဆိုတာ ဘာလဲ? ဆိုတဲ့ မင်္ဂလာမေးခွန်းတစ်ခု လူ့ပြည်မှာ ကောလာဟလ ဖြစ်ခဲ့သည်။ တချို့က မင်္ဂလာဆိုတာ မြင်ရတဲ့ အရာကို မင်္ဂလာ (ဒိဋ္ဌမင်္ဂလာ) လို့ခေါ်တယ်၊ နောက်တစ်ယောက်တော့ မြင်အပ်ရာမှန်သမျှ မင်္ဂလာ မဖြစ်နိုင်ဘူး၊ ကောင်းတာရော၊ မကောင်းတာရော မြင်ရမည်၊ တင့်တယ်လှပတာရော မတင့်မတယ် မစင်ကိုလဲ မြင်ရမည့်အတွက် မြင်ခြင်း (ဒိဋ္ဌ)သည် မင်္ဂလာ မဖြစ်နိုင်တဲ့အတွက် ကြားတဲ့ အရာ (အကြေားအာရုံ)သည်ပင် မင်္ဂလာ (သုတမင်္ဂလာ) ဖြစ်သည်၊ နောက်တစ်ယောက်က ဒါလဲ မဖြစ်နိုင်ဘူး ကောင်းတာ မကောင်းတာ၊ သာယာတာ မသာယာတာတွေလဲ ကြားနိုင်လို့ မင်္ဂလာမဖြစ်နိုင်၊ မြင်ခြင်း ကြားခြင်း မရှိတဲ့ အနံ့သည်ပင် မင်္ဂလာ (မုတမင်္ဂလာ) ဖြစ်သည်။ ဤသို့ စသည်အားဖြင် လူတွေဟာ ထင်ရာ မြင်ရာတွေကို တွေးတော ကြံစည်ပြီး မင်္ဂလာဟု အငြင်းအပွား ဖြစ်နေကြသည်မှာ (၁၂) နှစ်တောင် ကြာသတဲ့။ ထို မင်္ဂလာနဲ့ပတ်သက်ပြီး အငြင်းအပွားဖြစ်လိုက်ကြတာ လူ့ပြည်ကနေ နတ်တွေ၊ နောက်ဆုံး တစ်သောင်းသော စကြာဝဠာအထိ မင်္ဂလာဆိုတာ တိကျတဲ့ အဖြေ မရနိုင်ဘဲ ၁၂ နှစ်အထိ ကြာမြင့်ခဲ့သည်။ နောက်ဆုံး လူ့ပြည်ကနေ ဗြဟ္မာ့ပြည်အထိ ရောက်သွားသော မင်္ဂလာ သတင်းသည် လူ့ပြည် ပြန်ရောက်လာပြန်သည်၊ ဘုရားရှင်ထံ ရောက်မှ မင်္ဂလာဆိုတာ အသေ၀နာ စ ဗာလာနံ အစချီသော ၃၈ ပါးသော မင်္ဂလာ သတင်း အတိကျကို ရရှိသွားကြသည်။ (၁၂) နှစ်တာ ကာလအတွင်း မင်္ဂလာဆိုတဲ့ စကားကို ပုံဖော်ခြင်းက လူ့ပြည်ကနေ ဗြဟ္မာပြည်အထိ အုတ်အုတ်သဲသဲ ဖြစ်သွားခြင်းကိုပဲ မင်္ဂလာ ကောလာဟလ ဟု ခေါ်သည်။

၅။ မောနေယျ ကောလာဟလ
နောက်ဆုံး ကောလာဟလ ကတော့ ထိုမေးခွန်းရှင် သိချင်နေတဲ့ မောနေယျ ကောလာဟလ ဖြစ်သည်။ ဒီကောဟလနဲ့ပတ်သက်ပြီး စာပေမှာလဲ အနဲအကျဉ်းမျှသာ ပြဆိုထားသည်၊ ထို့ကြောင့် ဓမ္မကထိကဆရာတော်များက အကျယ်တ၀န့် မဟောကြ။ ထိုမင်္ဂလာ ငါးပါးလုံး စုပြုံပြထားတဲ့နေရာမှာတော့ မောနေယျကောလာဟလဆိုတာ “၇ နှစ်ကြာရင် မထင်မရှားတဲ့ ရဟန်းတစ်ပါး ဘုရားရှင်နဲ့ ဆုံမိ၍ မောနေယျ အကျင့်ကို မေးလိမ့်မည်”ဟု သုဒ္ဓါဝါသ နတ်တွေက လူသွားလမ်းတွေမှာ လှည့်လည်ပြီး ပြောကြသတဲ့၊ ဒါကိုပဲ မောနေယျ ကောလာဟလ ဖြစ်သွားတော့သည်။ ပိုပြီး ရှင်းလင်းစေရန် မောနေယျ ဆိုတာ ဘာလဲ၊ မောနေယျ အကျင့်ဆိုတာ ဘာလဲ၊ ဘယ်လိုပုဂ္ဂိုလ် ကျင်တာလဲ ဆိုတာ သိဖို့လိုသည်။ မောနေယျနှင့်ပတ်သက်တာကို သီးသန့် ရှာဖွေလေ့လာရလိမ့်မည်။

မောနေယျအကျင့်ကို ကျင့်သူသည် ဘုရားတစ်ဆူမှာ တစ်ပါးသာ ပေါ်ထွန်း၏၊ အရှင်သာရိပုတ္တရာ၊ အရှင်မောဂ္ဂလာန်တို့နဲ့ မတူဘူးလားဆိုတော့ ကိလေသာကို ပယ်ခြင်းက တူ၏။ အကျင့်ကိုကား မတူဟု ဆိုရမည်။ မောနေယျ အကျင့်သည် အလွန်ပင်ပန်း၏၊ ထိုအကျင့်ကို ကျင့်ခြင်းဖြင့် ကိုယ်ခန္ဓာ ပိန်လှီ၏၊ အရိုးပြိုင်းပြိုင်းထ၏ ဟု ဆိုထား၏၊ အရှင်သာရိပုတ္တရာ၊ အရှင်မောဂ္ဂလာန်တို့လိုပဲ သူလဲ ဆုထူးပန် ဖြစ်ခဲ့သည်။ တခါက ပဒုမုတ္တရမြတ်စွာဘုရားလက်ထက်မှာ မောနေယျ အကျင့်ကို ကျင့်နေသော ရဟန်းတစ်ပါးကို ဖူးမြင်ရ၍ ငါလည်းပဲ ဒီလို ရဟန်းမျိုး ဖြစ်ချင်ဟု ဆုပန်ကာ ကမ္ဘာတစ်သိန်း ပါရမီ ဖြည့်သည်။ ဆုထူးပန်ရှင်သည် ဂေါတမ ဘုရားရှင်လက်ထက်မှာ အသိတ ရသေ့တစ်ပါး၏ တူ နာလက အမည်ရှိ ရသေ့တစ်ပါး ဖြစ်လာသည်။ သိဒ္ဓတ္ထမင်းသား ဘုရားဖြစ်ပြီး များမကြာမီမှာပဲ ဓမ္မစကြာတရားဟော၍ ပဉ္စ၀ဂ္ဂီ ၅ ဦးသော ရဟန်းတို့ ရဟန္တာဖြစ်ကြသည်။ ဓမ္မစကြာတရားဟောပြီး (၇) ရက်မြောက်နေ့မှာပဲ နာလက ရသေ့ မောနေယျအကျင့်ကို မေးပါတော့သည်။ မြတ်ဗုဒ္ဓသည် မောနေယျအကျင့်ကို ထင်ရှားစေဖို့ အာနန္ဒဇာတ် အစရှိသော ၀တ္ထု နှစ်ဆယ်တို့ကို ဟောတော်မူ၏။

မောနေယျ ဟူသည်
မောနေယျ ဆိုသည်မှာ မောနေယျဟူသည်ကား မဂ်ဉာဏ်လေးပါးကို ခေါ်ဆိုသည်၊ အထူးသဖြင့် အရဟတ္တမဂ်ဉာဏ်ကို မောနေယျဟူ၍ ခေါ်၏။ ထို့ ကြောင့် မဂ်ဉာဏ်လေးပါးသို့ ရောက်ကြောင်း ကောင်းမြတ် မှန်ကန်သော အကျင့်ကို မောနေယျပဋိပဒါ ဟုခေါ်သည်။ မောနေယျအကျင့် ပဋိပဒါနှင့် ဆက်စပ်ပြီး--------

“မောနေယျံ တေ ဥပညိဿံ၊ ဒုက္ကရံ ဒုရဘိသမ္ဘဝံ။
ဟန္ဒ တေ နံ ပဝက္ခာမိ၊ သန္ထမဿု ဒဠော ဘဝ။” ဂါထာ အစရှိသော ဂါထာ နှစ်ဆယ့်သုံးပုဒ်ရှိသည်။ (ဤနေရာ၌ မဖော်ပြတော့ပေ)။ ထိုမောနေယျအကျင့်ကို ပြုနိုင်ခဲသည်ကို ပြုစွမ်းနိုင်သော ဝီရိယဖြင့် မိမိကိုယ်ကို ကြံ့ခိုင်စွာ ထားပြီးလျှင် မလျော့သော လုလ္လဖြင့် မြဲမြံစွာ ကျင့်ကြံကြိုးကုတ် အားထုတ်ရသည်။

မောနေယျ ပုဒ်သည် မုနိ ပုဒ်မှ ဆင်းသက်လာသည်ဟု ဆိုနိုင်သည်၊ မုနိကို ရသေ့ ရဟန်း ဘာသာပြန်ကြသလို စကားမပြောဘဲ နေခြင်းကိုလဲ ဘာသာပြန်နိုင်သည်၊ တော်တော်များများ နေရာတွေမှာတော့ မုနိပုဒ်က ဘုရားကို ရည်ရွယ်သည်။ တချို့နေရာတွေမှာ စကားမပြောတဲ့ အကျင့် ကျင့်နေသည်ကို ကြားဖူးသည်။ ဓမ္မပဒအဋ္ဌကထာ ၂-နှာ ၂၅၀ မှာတော့ မောနေယျ အကျင့်ဆိုတာ စကားမပြောဘဲ နှုတ်ငုံပိတ်ခြင်းမျိုးကို မဆိုလို၊ မဂ်ဥာဏ်ကိုပဲ ဆိုလိုသည်။

ဣတိဝုတ္တအဋ္ဌကထာ၊ မောနေယျသုတ် အဖွင့်မှာတော့ မောနေယျ ဆိုတာ လက်ရှိဘ၀နဲ့ အနာဂတ် နောက်ဘ၀အတွက် မိမိအကျိုး သူတစ်ပါးအကျိုးကို သိသူ ဆောင်ရွက်သူ ရဟန္တာ မဟုတ်သေးသော်လဲ ကလျာဏပုထုဇဉ်၊ အောက်မဂ် အောက်ဖိုလ်များ ရပြီးသူများကို ဆိုလိုသည်။ ထိုသုတ်မှာပဲ ကာယမောနေယျ- ကာယဒုစရိုတ် သုံးပါးကို ပယ်ပြီးခြင်းနှင့် ကာယကို အကြောင်းပြုပြီး ကာယသင်္ခါရ ချုပ်ငြိမ်းကာ စတုတ္ထဈာန်ရသူ၊ ၀စီမောနေယျ- ၀စီဒုစရိုတ် ၄ ပါးကို ပယ်ပြီးခြင်း၊ နှုတ်ဝစီကို အကြောင်းပြုပြီး ဆန္ဒရာဂကို ပယ်ခြင်း၊ ၀စီသင်္ခါရ ချုပ်ငြိမ်းကာ ဒုတိယဈာန်သို့ ရောက်သူနှင့် မနောမောနေယျ-မနောဒုစရိုတ် သုံးပါးကို ပယ်ပြီးခြင်း၊ မနောနှင့်စပ်ပြီး ဆန္ဒရာဂကို ပယ်ခြင်း၊ စိတ္တသင်္ခါရတို့ ချုပ်ငြိမ်းပြီး သညာဝေဒယိတနိရောဓသို့ ရောက်သူတို့ဖြစ်သည်ဟုလဲ ပြဆိုထားသည်။ ထိုအဋ္ဌကထာ စုန္ဒသုတ် အဖွင့်မှာတော မုနိကို ဥာဏ်ဟုဆို၍ ထိုဥာဏ်နှင့် ပြည့်စုံသူကို သို့မဟုတ် ဥာဏ်အကျင့်ကျင့်သူကို မောနေယျဟုခေါ်သည်။

အထက်မှာ ပြဆိုထားသည့် နာလက ရသေ့သည် မြတ်စွာဘုရားထံ မောနေယျအကျင့်ကို မေးပြီးသည်မှ စ၍ တောအုပ်တစ်ခုကို နှစ်ရက် မနေတော့၊ သစ်ပင်တစ်ပင်အောက်မှာလဲ နှစ်ရက်မနေဘဲ တစ်တောဝင် တစ်တောထွက်၊ တစ်ရွာဝင် တစ်ရွာထွက် စသည်ဖြင့် လှည့်လည်နေတော့သည်၊ တစ်နေရာ တစ်ရက်ထဲပဲ နေသည်။ ဤနည်းအားဖြင့် တစ်တောဝင်တစ်တောထွက်ပြီး မောနေယျအကျင့်များကို ကျင့်ခဲ့သည်မှာ အထွဋ်အထိပ်သို့ ရောက်သွားသည်။ အသက်ရှင်ဖို့ရာ ၇ လပဲ ကျန်တော့သည်။ မောနေယျအကျင့်ကို ပြင်းပြင်းထန်ထန် ကျင့်လျှင် ၇ ရက်ပဲ အသက်ရှည်သည်၊ အလည်အလတ် ကျင့်ရင် ၇ နှစ် အသက်ရှည်ခွင့်ရှိသည်၊ အနိမ့်စား ကျင့်လျှင် ၁၆ နှစ် အသက်ရှင်ခွင့်ရှိသည်။ နာလက ရဟန်းတော်ကတော့ ပြင်းပြင်းထန်ထန်ကျင့်၍ ၇ လမြောက်နေ့မှာပဲ အာယုသင်္ခါရ လွတ်ဖို့ (ပရိနိဗ္ဗာန်ပြဖို့) သိသဖြင့် ရေမိုးချိုး၊ သင်္ကန်းကို သေသေသပ်သပ်ဝတ်၊ နှစ်ထပ်သင်္ကန်းကြီးကို ပခုံးပေါ်တင်ပြီး ဘုရားရှင်ရှိရာ ကျောင်းတော်သို့ မျက်နှာမူပြီး ထိခြင်းငါးပါးဖြင့် ဦးတိုက်ပြီး၊ လက်အုပ်ကလေးချီကာ မက်တက်ရပ်လျှက် ပရိနိဗ္ဗာန်စံတော်မူသည်၊ သူ၏ဈာပနအပြီး ဘုရားနှင့်သံဃာတော်များက အရိုးတော်ဓာတ်တော်များကို စုပြီး စေတီတည်ပေးသည်။ ဘုရားတစ်ဆူမှာ တစ်ပါးသာ ရှားရှားပါးပါး ပေါ်သော မောနေယျအကျင့်ရှိသူကို ဘုရားကိုယ်တိုင် စေတီတည်ပေးသည်။

ထူးခြားသည့် ကျင့်စဉ်
မေးစရာရှိသည်မှာ ရဟန္တာချင်းတူပါလျှက် ရဟန္တာဖြစ်နိုင်တဲ့ နည်းလမ်းတွေ အများကြီးရှိရက်သားနဲ့ သူများနည်းတူ အားမထုတ်ဘဲ ဘာဖြစ်လို့ ဆင်းရဲ ပင်ပန်းသော မောနေယျအကျင့်ကို ကျင့်ရသနည်း။ ရှေးဘုရားလက်ထက်က မောနေယျအကျင့် ကျင့်သူကို အားကျ၍ ဆုထူးပန်ခဲ့ခြင်း၊ တရားတော်များကို စောင့်ရှောက်လိုခြင်း ဖြစ်ဟန်တူသည်။ တရားတော်ကို စောင့်ရှောက်ခြင်းဆိုသည်မှာ အရှင်မဟာကဿပနဲ့ ယှဉ်၍ နားလည်နိုင်သည်။ အရှင်မဟာကဿပသည် ရဟန္တာဖြစ်ပြီး ဖြစ်ပါလျှက် အဘယ့်ကြောင့် ပင်ပန်းဆင်းရဲတဲ့ ဓုတင် ၁၃ ပါးကို ကျင့်သနည်း၊ တကယ်တော့ အရှင်မဟာကဿပလဲ အလားတူပင် ဆုထူးပန်ဖြစ်ခဲ့သည်၊ ရဟန္တာဖြစ်ပြီး၍ သူကျင့်သမျှ သူလုပ်သမျှတို့ သည် သူ့အတွက်မဟုတ်တော့၊ သာသနာအတွက်သာ ဖြစ်သည်၊ နောင်လာနောက်သားများအတွက်သာ ဖြစ်သည်၊ တရားတော်ကို စောင့်ရှောက်ရန်အတွက်သာ ဖြစ်သည်။ နာလက မထေရ်လဲ ဘာ့ကြောင့် မောနေယျ အကျင့်ကျင့်သနည်း ဆိုရင် ထိုအဖြေအတိုင်းပင် ဖြစ်ပါလိမ့်မည်။

မောနေယျအကျင့်များကို စာမျက်နှာများသွားမှာကို မလိုလား၍ ဤနေရာ၌ မဖော်တော့ပဲ ဖော်ပြထားသည့် ဆိုက်ကိုပဲ လင့်ခ်ပေးပါမည်။ မောနေယျ အကျင့် ဂါထာများ အနက်မြန်မာပြန်ကို ဤမှာဖတ်ရှုနိုင်သည်။ ဒကာမ မရှင်းသော မောနေယျကောလာဟလ သည် ဤမျှလောက်ဖြင့် အဆင်ပြေမည်ထင်ပါသည်။

နိဂုံး
ကောလာဟလ ဆိုပေမဲ့ နောက်ဆုံးတော့ တကယ် အဖြစ်မှန်တွေ ဖြစ်လာတော့သည်။ ကောလာဟလ ငါးမျိုးက စာရေးသူတို့ ဓမ္မမိတ်အပေါင်းကို ဘာတွေ ပေးသလဲ၊ ကပ္ပကောလာဟလ- ကမ္ဘာကြီးပျက်စီးတော့မည်ဆိုတဲ့ သတင်းစကားကတော့ လောကမှာ ဘာမှ မမြဲပါလားဆိုတဲ့ သတိသံဝေကို ပေးသည်၊ ထိုသတိသံဝေဖြင့် တစ်ယောက်ကို တစ်ယောက် မာနတွေ၊ ဒေါသတွေ အာဃာတတွေ မထားဘဲ အချင်းအချင်း အပြန်အလှန် လေးစားခြင်း၊ မေတ္တာပွားခြင်း၊ ကရုဏာထားခြင်းဆိုတဲ့ စိတ်ဓာတ်မြင့်မားရေးတို့ကို ကပ္ပကောလာဟလက ပေးသည်။ ဗုဒ္ဓကောလာဟလ-ဖြင့် လောကမှာ ဖြစ်ပေါ်ခဲ၊ ပွင့်တော်မူခဲတဲ့ ပုဂ္ဂိုလ်ထူးကို ဖူးမျော်ခွင့်ရလေးခြင်းဆိုတဲ့ ဗုဒ္ဓါနုဿတိဖြစ်စေသည်။ မင်္ဂလာကောလာဟလက (၁၂) နှစ်တိုင်တိုင် ရှာဖွေးရင်း ဘုရားနဲ့တွေ့မှ သိခွင့်ရသည့် မင်္ဂလာတရား၊ ပွင့်ပေါ်ခဲသော ဓမ္မ၊ ကြားနာခဲသော မင်္ဂလာတရားတော်များကို နာခွင့်ရခြင်း၊ ကြားခွင့်ရခြင်းဆိုတဲ့ ဓမ္မာနုဿတိကို ပေးသည်။ မောနေယျကောလာဟလ ကတော့ ပွင့်တော်မူခဲသော ဘုရားသားတော်တွေသည် ဤကဲ့သို့ သာမန်လူတွေ ကျင့်နိုင်ခဲသော အကျင့်ထူးကို ကျင့်နိုင်ကြပါပကောလားဟု သော သံဃာနုဿတိကို ပေးသည်။ ကောလာဟလ ၅ မျိုးက “ဤသို့အားဖြင့် သံဝေဂပွားခြင်း၊ မေတ္တာတရား ဂရုဏာတရားတွေ ထားခြင်း၊ ပွင့်ပေါ်ခဲသော ဘုရား၊ တရား၊ သံဃာရတနာများဖြင့် ကြုံခိုက်၊ ရခဲတဲ့ လူ့ဘ၀ကို ရခိုက်၊ မကောင်းမှုရှောင် ကောင်းမှုဆောင်ဖို့ မမေ့ကြရန်” တိုက်တွန်းနှိုးဆော်လိုက်ပါတော့သတည်းးးးးးး။

ရွှင်လန်းချမ်းမြေ့ပါစေ
သီတဂူစတား
၁၄-၁၁-၂၀၁၂

Read more »

မဖြတ်သင့်သည်ကို ဖြတ်မိခြင်း

မဖြတ်သင့်သည်ကို ဖြတ်မိခြင်း

စာမိတ်ဆက်
သာသနာတော်မှာ မဖြတ်သင့်တာကို ဖြတ်မိခြင်းကြောင့် ဘုရားရှင်က သိက္ခာပုဒ်တွေ ပညတ်ရ၊ တရားဓမ္မတွေကို ဟောရပြောရသည်၊ အခါတပါး ကမ္မဋ္ဌာန်းတရားကို ပြင်းပြင်ထန်ထန် အားထုတ်ခြင်းကြောင့် လောကီဈန်တွေ ရသွားသော ရဟန်းတော်တပါးရှိခဲ့ဖူးသည်။ ရောဂါကြောင့် ထိုရပြီးဈာန်များမှ အောက်အောက်သို့ လျှောကျခဲ့သည်၊ ၆ ကြိမ်တိုင်တိုင်အားထုတ်သောလည်း ကျမြဲကျမြဲ ဖြစ်နေသည်၊ ဈာန်ဂတိသည်လည်း မမြဲပါလားဟု တွေးသည်၊ အနီးအနားရှိ ခေါင်းရိပ်ဓားဖြင့် မိမိရဲ့ လည်ပင်းကို လှီးဖြတ်သည်၊ သို့သော်လည်း ထိုရဟန်းတော်သည် ထိုဝေဒနာနုပဿနာ ကမ္မဋ္ဌာန်းမှ ဆက်လက် အားထုတ်လိုက်ရာကနေ တဏှာကိုလည်း အမြစ်ပြတ် ဖြတ်နိုင်သည်၊ တပြိုင်တည်း လည်မျိုးလည်းပြတ် တဏှာလည်းပြတ်ဟု ပြောရမလို ဖြစ်သည်။ တပြိုင်တည်း ရဟန္တာဖြစ်သွားသည်ဟု ဆိုသည်။ ထူးခြားသည့် ရဟန္တာဖြစ်ပုံစံတည်း။ သဒ္ဓါတရား ပြင်ထန်သော ရဟန်းတော်များ၏ မိမိရဲ့ အသက်ကိုတောင် ငဲ့ကွက်ခြင်း တွယ်တာခြင်း မရှိဘဲ ရဟန်းတရားအားထုတ်သည်ဟု ပြဆိုသည်။

တချို့နေရာတွေမှာတော့ ရဟန်းတော်များသည် သာသနာတော်မှာ မပျော်မွေ့ ဖြစ်လာလျှင် သို့မဟုတ် ကိလေသာ ရာဂပိုးထလာလျှင် အသုဘဘာဝနာ၊ ဗုဒ္ဓါနုဿတိကမ္မဋ္ဌာန်းစသော ကမ္မဋ္ဌာန်းတစ်ခုခုကို ပွားများရမည့်အစား နီးစပ်ရာ မိမိရဲ့ ခန္ဓာကိုယ်ကို နာကျင်အောင် နိပ်စက်သည်၊ တချို့ ကိုယ့်ပေါင်ကို တစ်ခုခုနဲ့ ရိုက်သည်၊ တချိုကတော့ ဓားနဲ့တောင် ထိုးသည်၊ ဖြစ်နေတဲ့ ကာမရာဂစိတ်ကို နာကျင်သော ဝေဒနာဖြင့် ပြောင်းလိုက်ခြင်းပင်ဖြစ်သည်။ သို့သော် အတ္တကိလမထာနုယောဂ အစွန်းရောက်သော အကျင့်မျိုးဖြစ်ရာကား ဘုရားရှင်၏ နည်းလမ်းမဟုတ်ပေ၊ ထိုကဲ့သို့ ရာဂစိတ်ဖြစ်လာလျှင် တခြား အာရုံတစ်ခုကို ယူလိုက်ခြင်းဖြင့် တဒင်္ဂပျောက်နိုင်သည်အတွက် အကုသိုလ်စိတ်တွေ ဆက်မဖြစ်တော့ပေ။ သို့မဟုတ် ကိုယ့်မှာ ဖြစ်ပေါ်တိုင်းသော စိတ်ကို ကမ္မဋ္ဌာန်းအာရုံအဖြစ် ယူကာ သတိဖြင့်စောင့်ရှောက်ရပါသည်။ ဤကဲ့သို့သောအားဖြင့် နည်းများစွာရှိသည်။
စာရေးသူ ဗုဒ္ဓဂယာဘက်ကို ဒီတစ်ခေါက် ရက်အတော်ကြာ နေခဲ့သည်၊ ရက်ပေါင်း ၂၂ ရက်လောက်ရှိမည်ထင်သည်၊ များစွာ ဗဟုသုတတွေ ရခဲ့သည်၊ အထူးသဖြင့် မြန်မာနှင့် ဗုဒ္ဓဂယာ၊ တခြားတိုင်းပြည်တွေနှင့် ဗုဒ္ဓဂယာ၊ မဂဓ တက္ကသိုလ်၊ ထိုဂယာရှိ ပတ်ဝန်းကျင်အကြောင်း များစွာ လေ့လာ အကဲခတ်မိသည်၊ ပြောမကုန်အောင်သော သတင်းတွေလဲ ကြားခဲ့ရသည်။ ရှိစေတော့- ကျောင်းသားများကျောင်းဆောင်မှာ တည်းခိုသည်၊ မိတ်သစ် ဆွေသစ်တွေလည်း ရသည်၊ မိတ်ဟောင်း ဆွေဟောင်းများကိုလည်း တွေ့ရသည်။

တနေ့တော့ မဂဓတက္ကသိုလ်ရှိ သူငယ်ချင်းတပါးနဲ့ ဟိုအကြောင်း ဒီအကြောင်း စကားစပ်မိရာက သူ၏ ရွာက ဇာတ်လမ်းလေး တစ်ပုဒ်အကြောင်း ပြောပြသည်။ ထိုဇာတ်လမ်းအကြောင်းကြား ပြီး စိတ်မကောင်းတာတွေရော ဖြစ်မိသည်။ ဘုရားလက်ထက်က ထိုအဖြစ်မျိုး ဖြစ်ရပ်မှန်တစ်ခုကို သွားသတိရမိလိုက်သေးသည်။

ဖြစ်ရပ်မှန် ဇာတ်လမ်းလေးတစ်ပုဒ်
တောရွာများ ထုံးစံအတိုင်း ရွာတစ်ရွာမှာ ဘုန်းတော်ကြီးကျောင်း တစ်ကျောင်းသာ အရှိများသည်၊ အိမ်ခြေများစွာရှိသော ရွာများကလွဲ၍ အများစုက တစ်ကျောင်းပဲ ရှိသည်၊ တချို့ရွာတွေမှာဆို ဘုန်းကြီးကျောင်းတောင် မရှိဘူးဖြစ်နေတယ်။ သူငယ်ချင်း၏ ရွာကလေးမှာလဲ ဘုန်းကြီးကျောင်းတစ်ကျောင်းသာ ရှိသည်အတွက် တရွာလုံးက ကြည်ညိုကြသည်၊ ဘုန်းကြီးကို ချစ်ကြောက် ရိုသေကြသည်၊ ဘုန်းကြီး အလိုရှိတာမှန်သမျှ ဖြည့်ဆည်းပေးနိုင်ကြသည်။
သို့သော် ထိုဘုန်းကြီးကျောင်းမှာကား ဒကာမတစ်ယောက် ရှိနေသည်ကို ရွာသူရွာသားများက မကြိုက်ကြ။ ထိုဒကာမသည် ဆင်းရဲနွမ်းပါးသူ ဖြစ်သည်၊ ဘုန်းကြီးကျောင်းမှာပဲ ပုဂံဆေး ခွက်ဆေး တံမျက်စည်းလှည်းခြင်းဖြင့် သူ့ဘ၀ အသက်ရှင်ရေးအတွက် နေရရှာသည်။

ကြိုခြင်းငြိ
အိုခြင်းထားတော့ အိုခြင်းထိ၊ ကြိုခြင်းထားတော့ ကြိုးခြင်းငြိ ဆိုတာလိုပဲ သူတို့လဲ ကာမသတ္တ၀ါတွေပဲ ဘာခံနိုင်မလဲ ကြာလာတော့ ဘုန်းကြီးနဲ့ ဒကာမ သံယောဇဉ်ကြိုးလေး ငြိမိနေကြသည်။ ရွာသူရွာသားတွေကလည်း သိနေပေမဲ့ ဘုန်းကြီးကို ချစ်ကြောက် ရိုသေလွန်းသောကြောင့် မလျှောက်ရဲကြ၊ ထိုဒကာမကို ဒီကျောင်းက ထွက်သွားအောင် ဘယ်လို လုပ်ရမလဲဆိုတာကိုသာ တစ်ရွားလုံး ဆွေးနွေနေကြရတော့သည်။

တနေ့ ရွာကဘုန်းကြီး ကျောင်းအတွက် ၀ယ်စရာကိစ္စနဲ့ မြို့ပေါ်တက်သွားခိုက် ရွာမှ လူတချို့ ကျောင်းရောက်လာသည်၊ ဒကာမနဲ့တွေ့သည်၊ ဒကာမကို စကားနှစ်ခွန်းပြောပြီး ပိုက်ဆံပေးသည်၊ ထိုစကားမှာ ‘‘ ခင်များ ဒီပိုက်ဆံတွေ ယူပြီး ဒီရွာက ထွက်သွားပါ၊ ဒီလိုမှ မဟုတ်ရင် ခင်များ အသက် အာမ မခံနိုင်’’ ဟူသတည်း။ ဒကာမလဲ ရွာသားတွေ စုပေးလိုက်သည့် ပိုက်ဆံသည် သူမ ဘ၀တစ်သက်စာ လုံလောက်နေသည် အတွက် ရွာမှ အသာတကြည် ထွက်သွားရှာသည်။

ဘုန်းကြီးလဲ မြို့ကပြန်ရောက်လာသည်၊ ထိုဒကာမကို မတွေ့၊ မနက် အရုဏ်ဆွမ်းကပ်ချိန်၊ နေ့လည် ဆွမ်းကပ်ချိန်၊ ညနေ အအေးကပ်ချိန်တို့၌ ထိုဒကာမကို မတွေ့ရသဖြင့် စိတ်မကောင်း ဖြစ်နေသည်၊ ကြာလာတော့လည်း သူ၏ သန္တာန် ကိန်းနေတဲ့ အချစ်စိတ် (အနုသယစိတ်)တွေ ရိုးတို့ရွတ ဖြစ်နေသည်၊ သူမရှိတော့မှ သူ့အတွက် သူမက အရေးကြီးလာမှန်း သိလာသည်၊ နေ့စဉ် သတိတရ ဖြစ်နေသည်။

ဖြတ်သင့်တာ မဖြတ်
ကြာလာတော့ ထိုရောဂါ ကြီးထွားလာသည်၊ တနေ့တော့ ကိုရင်တွေကို သူ့အခန်းထဲ မ၀င်ရဟု အမိန့်ထုတ်ထားသည်၊ နောက်တနေ့ နေလည် ဆွမ်းစားပြီး အချိန်လောက်မှာ အခန်းထဲဝင်ပြီး ပြန်မထွက်တော့ဘဲ အခန်းအောင်းနေတော့သည်၊ ကိုရင်တွေလဲ ဘုန်းကြီး အပြင်မထွက်တာ ကြာပြီး အခန်းထဲ ဘာဖြစ်မှန်းမသိဘူး၊ အခန်းအနား ကပ်ပြီး နားထောင်ကြည့်တော့ ဘုန်းကြီးက တဟီးဟီးနဲ့ နာကျင်ခံစားရတဲ့ ဝေဒနာကြောင့် ငြီးနေသည်၊ ဘုန်းကြီးဘုရား ဘုန်းကြီးဘုရားဟု အော်ခေါ်သော်လည်း ဘုန်းကြီး ပြန်မထူးဘဲ ငြီးနေတော့သည်၊ သွေးတွေက တံခါးအပြင်ဘက်သို့ စီးလာတာကို မြင်တော့မှ ‘‘ဟာ----- သွေးတွေ သွေးတွေ’’ဟု အော်ဟစ်ကြသည်၊ ရွာကလူတွေလဲ ရောက်လာကြသည်၊ တံခါးကို သံထုတ်တွေနဲ့ အတင်း ထုရိုက် ဖွင့်လိုက်တော့မှ ဘုန်းကြီး၏အဖြစ်ပျက်ကို မြင်ကြ၍သဖြင် ‘‘ဟာကနဲ၊ ဟင်ကနဲ’’ ဖြစ်သွားကြသည်၊ အံ့သြခြင်း ကြောက်ရွံ့ခြင်း ထိတ်လန့်ခြင်းများ ဖြစ်သွားကြသည်။

အကြောင်းမူကား ဘုန်းကြီးသည် သူ၏ မွေးရာပါ ယောက်ျားအင်္ဂါအစိတ်ပိုင်းကို အရင်းကနေ ဖြတ်ပြစ်လိုက်ခြင်း ဖြစ်သည်၊ သွေးများ စီးကျနေသဖြင့် သင်္ကန်းဖြင့် အုပ်ထားပြီး နာကျင်စွာ ခံစားနေရသည်၊ ဒီလိုနဲ့ ဘုန်းကြီးကို ပွေ့ပြီး မြို့ပေါ် ဆေးကုသရန် ခေါ်သွားကြသည်၊ အရေးထဲ ရဲက သွေးထွက်သံယို ဖြစ်မှုနဲ့ စစ်ဆေးနေသေးသည်၊ ကျောင်းမှာလဲ အချိန်ကြာခဲ့ပြီး ရဲစခန်းမှာ အချိန်ထက်ကုန်ပြန်ပြီ၊ ဒီလိုနဲ့ သွေးထွက်လွန်သွားသဖြင့် ဘုန်းကြီးအသက် ဆေးရုံတောင် မရောက်နိုင်တော့ပေ။

ယုံကြည်ချက်များ
လူတစ်ယောက် ဘာ့အကြောင်းကြောင့်ပဲ ဖြစ်ဖြစ် အသက်ဆုံးပြီဆိုရင် သဂြ်ိုဟ်တဲ့ အခါ (နောက်ဆုံးအချိန်မှာ) နာရေးရှင်တွေက ကိုယ့်လူကို မျက်စိ နား နာ စတဲ့ အင်္ဂါ ခြေ လက် စုံစုံပါသွားစေချင်ကြသည်၊ နောက်ဘ၀မှာ ဒီလို မပြည့်မစုံ ပါသွားပါက ဒီလိုမပြည့်မစုံနဲ့ ပြန်ဖြစ်လာမည်ဟု ယူဆထားကြသည်။ ဤကား သဿတဒိဋ္ဌိ အယူထဲ ပါသွားနိုင်သည်။ တကယ်တော့ ထိုကဲ့သို့မဟုတ်၊ ကိုယ်ပြုခဲ့သော ကုသိုလ် အကုသိုလ်တို့၏ သတ္တိကသာ နောက်ဘ၀အထိ ပါသွားမည်၊ ခန္ဓာကိုယ် အနေအထားကား ပါသွားမည် မဟုတ်။

စာရေးသူ ပူနေးတက္ကသိုလ် ဒဿနိကဗေဒမှာ Bio Ethic ဘာသာရပ် သင်ခဲ့ရဖူးသည်၊ အဲဒီအထဲမှာ လူတစ်ယောက် သူ့ရဲ့ ခန္ဓာကိုယ်ကို ဆေးရုံသို့ လှူထားသည်၊ သူ တစ်စုံတစ်ခုကြောင့် အသက်ဆုံးရှုံးသွားခဲ့သော် သူ၏ခန္ဓာကိုယ် အစိတ်ပိုင်းမှ လိုအပ်တာကို အလှူခံနိုင်ရန် လှူထားသည်၊ ဒါပေမဲ့ ဘာသာရေးအရပဲ ဖြစ်ဖြစ် ယုံကြည်ချက်ကြောင့်ပဲ ဖြစ်ဖြစ် မိဘ ဆွေမျိုးများက သူတို့ရဲ့ လူ နောက်ဆုံးခရီးမှာ အင်္ဂါခြေလက် အပြည့်စုံပါသွားစေချင်ကြသောကြောင့် ဥပဒေအရ ခွင့်လွတ်ထားပေမဲ့ ဘာသာရေးအရ ခွင့်လွတ်မထားရကား ထိုလူနာ၏ အစိတ်အပိုင်းကို ယူခွင့်မရှိ။ ဥပဒေအရရော ဘာသာရေးအရပါ ညှိရသည်။ တချို့ဘာသာရေးတွေ မှာ ဒီဘ၀မှာ အင်္ဂါခြေလက် အစုံမပါသွားရင် နောင်ဘ၀လဲ ဒီလိုပဲ ဖြစ်လိမ့်မည်ဟု ယူဆထားကြသည်။

စာရေးသူတို့ ဗုဒ္ဓဘာသာမှာတော့ ဒီလို အင်္ဂါအစိတ်အပိုင်း အလှူမျိုးက ဒါနထဲမှာ အမြတ်ဆုံး ဒါနပါရမီဟု ဆိုထားသည်၊ ဘုရားအလောင်းများသာ ဖြည့်ကျင့်နိုင်သော အလှူဒါနမျိုးဖြစ်သည်၊ အင်္ဂပရိစ္စာဂ-ကိုယ်အင်္ဂါ အလှူ၊ ဇီဝိတပရိစ္စာဂ-အသက်အလှူ ဖြစ်သည့်အတွက် ဒါနပရမတ္ထပါရမီ မည်သည်။ ဗုဒ္ဓတရားတော်အောက်မှာ မွေးဖွားလာကြသော စာရေးသူတို့ ဗုဒ္ဓဘာသာ မြန်မာနိုင်ငံမှာ သွေးအလှူအသင်းအဖွဲ့တွေ ပေါ်ပေါက်လာတာဟာ ဒါနပရမတ္ထပါရမီ အတွက်ပဲ ဖြစ်သည်၊ အမွန်မြတ်ဆုံး အလှူဖြစ်သည်၊ ဇီဝိတဒါန အာယုဒါန ဆေးရုံတွေ၊ နာရေးကူညီမှုအသင်းတွေ ပေါ်ပေါက်လာခြင်းသည်လည်း ဘုရားအလောင်း၏ ဒါနပါရမီခန်းကို အားကျ၍ပင် ဖြစ်သည်။ လူသာဓုခေါ် နတ်သာဓုခေါ်သည့် အလုပ်များပင် ဖြစ်သည်၊ သူတို့ရဲ့ ခန္ဓာကိုယ်ကို ဆေးရုံသို့ လှူဒါန်းထားသူများလည်း စာရေးသူတို့ မြန်မာနိုင်ငံမှာ အမြောက်အမြား ပေါများသည်။

သေလျင် ပြစ်ခဲ့ရမည့် ဘာမှ တန်ဖိုးမရှိမည့် ခန္ဓာကိုယ်ကို မတွယ်တာဘဲ မိမိတို့ အင်္ဂါအစိတ်ပိုင်းများသို့ လှူခဲ့သောကြောင့် အသက်ဆက်ရှင်ပြီး လောကအကျိုး သာသနာအကျိုး ဆောင်ရွက်မည့် လူနာများကို နှလုံး၊ မျက်ကြည်လွာ စသည်များကို အသက် ဆက်ပေးခဲ့ကြသည့် မွန်မြတ်သာ ပုဂ္ဂိုလ်များလည်း များစွာရှိသည်။

အင်္ဂါစုံတဲ့ ဘုန်းကြီးအတွက် ဈာပန
ဒါပေမဲ့ တချို့မှာတော့ မွန်မြတ်သော အလုပ်ဟု ဆိုစေကာမူ နောင်ဘ၀အတွက် အင်္ဂါခြေလက် မစုံမှာကို စိုးရိမ်နေကြသည့် သဿတဒိဋ္ဌိ အယူကား ရှိနေသေးသည်။ ဘုန်းကြီးအတွက် ဈာပနလုပ်ဖို့ စီစဉ်ရတော့သည်၊ အင်္ဂါက မစုံဖြစ်နေသည်၊ ဘုန်းကြီးမှာ မွေးရာပါအင်္ဂါက ဖြတ်ထုတ်ထားတာ ဆိုတော့ အခက်တွေ့နေသည်၊ ဒီလိုနဲ့ သူနေတဲ့ အခန်းမှာ လိုက်ရှာကြသည်၊ ကံကောင်းချင်တော့ တံခါးကြားမှာ ညပ်နေသည်၊ ပုရွက်ဆိပ် ချီသွားတာလား ကြွက်ချီသွားတာလား မသိ၊ ၂ ရက် ၃ ရက်ဆိုတော့ ခြောက်သွေ့နေသည်။ ဒီအဖြစ်တွေကို တွေးပြီး ရွာသူရွာသားတွေလဲ စိတ်မကောင်း ဖြစ်ကြသည်၊ ဘုန်းကြီးကိုလည်း အလွန်သနားမိသွားကြသည်။

စာရေးသူကတော့ အော်-- ဖြတ်သင့်တာကို မဖြတ်ဘဲ မဖြတ်သင့်တာကို ဖြတ်လိုက်တာပါလားလို့ သံဝေဂပွားမိသည်။ ဒီဇာတ်လမ်းလေးကို ကြားရတော့ ထိုဘုန်းကြီးအတွက် စိတ်မကောင်း ဖြစ်မိသလို ဘုရားလက်ထက်က ဒီလို အဖြစ်မျိုးကို အမှတ်ရမိသည်။

ဖြတ်သင့်တာက
စာရေးသူ သာမဏေကျော်တန်း ၀င်တုန်းက ၀ိနည်း ၅ကျမ်းတွင် စူဠ၀ါပါဠိတော်ဆိုတာ ရှိသည်၊ ထိုစူဠ၀ါပါဠိတော်ထဲတွင်- ရဟန်းတော်တစ်ပါးသည် ထိုကဲ့သို့သော သံယောဇဉ် အချစ်တွေကြောင့် သာသနာတော်၌ မမွေ့လျော်ဖြစ်နေသည်၊ ထိုသို့သော မမွေ့လျော်ခြင်းက တနေ့တနေ့ နှိပ်စက်ဖန်များတော့ ခံနိုင်ရည်မရှိဖြစ်လာသည်၊ ထို့ကြောင့် သူ၏ မွေးရာပါ ယောက်ျားအင်္ဂါအစိတ်ပိုင်းတစ်ခု ကို ဖြတ်ပြစ်လိုက်သည်။ ဘုရားထံရောက်တော့ ဘုရားက မဖြတ်သင့်တာကို ဖြတ်၊ ဖြတ်သင့်တာကို မဖြတ်လို့ ရှုံ့ချ အပြစ်တင်တယ်။ ဖြတ်ရမှာက တဏှာရာဂဖြစ်သည်၊ ထိုတဏှာသည်သာ ဖြတ်သင့် ဖြတ်ထိုက်သည်ဟု ဆိုသည်။ ထို့နောက် ရဟန်းတော်များ ကိုယ့်အင်္ဂါဇာတ်ကို မဖြတ်ရ၊ ဖြတ်လျင် ထုလ္လဇဉ်းအာပါတ် သင့်စေ ဟု ဥပဒေတစ်ရပ် ပညတ်လိုက်သည်။

ဖြတ်သင့်တာကို ဖြတ်မှ ချမ်းသာမည်၊ မဖြတ်သင့်တာကို ဖြတ်က ချမ်းသာအစစ် မရနိုင်၊ ဆင်းရဲခြင်း၊ ၀မ်းနဲခြင်းများကိုသာ တိုးပွားစေသည်၊ တကယ်ဖြတ် တကယ်ချမ်းသာရမှာက ရာဂ၊ ဒေါသ စတဲ့ ကိလေသာများကို ဖြတ်နိုင်ခြင်းကသာ ချမ်းသာအစစ်ဖြစ်သည်။ အခါတစ်ပါး နတ်သားတစ်ယောက် ဘုရားထံရောက်လာသည်၊ “အရှင်ဘုရား--လောကမှာ ဘာကိုဖြတ်မှ ချမ်းသာမလဲ ဘုရား၊ ဘာကိုဖြတ်ရင် စိုးရိမ်ပူပန်မှု သောက မရှိနိုင်သနည်းဘုရား”ဟု မေးလျှောက်တော့ “ကောဓံ ဆေတွာ သုခံသေတိ- အမျက်ဒေါသကို ဖြတ်နိုင်ခြင်းသည် ချမ်းသာ အစစ်ဖြစ်သည်၊ ကောဓံ ဆေတွာ န သောစတိ- အမျက်ဒေါသကိုဖြတ်နိုင်ခြင်းသည် စိုးရိမ်ပူပန်ခြင်း၊ ကြောက်ရွံ့ခြင်း သောကကို ဖြတ်ရာ ရောက်သဖြင့် ချမ်းသာ၏” ဟု မိန့်သည်။ တစ်ခါ ဓမ္မပဒမှာတော့ “ဆေတွာ ရာဂဉ္စ ဒေါသဉ္စ၊ တတော နိဗ္ဗာနမေဟိတိ- ရာဂ ဒေါသတို့ကို ဖြတ်နိုင်ပြီးမှသာ ချမ်းသာအစစ် နိဗ္ဗာန်ကို ရောက်နိုင်မည်” ဟူသတည်း။

စာရေးသူတို့လို သာမန်ပုထုဇဉ်တွေ အတွက် ရာဂ ဒေါသဆိုတာ ရှိနေမှာ ဖြစ်သည်။ အချစ်တို့ သံယောဇဉ်တို့ဆိုတာတွေ ရှိနေမှာ အမှန်ပင်ဖြစ်သည်၊ အကြောင်းတရား တိုက်ဆိုင်လာလို့ ထိုသံယောဇဉ်တွေ အချစ်တွေနဲ့ ရင်ဆိုင်လာသည့်အခါ ဘာလုပ်မလဲ? မြတ်ဗုဒ္ဓရဲ့ နည်းလမ်းကတော့ ဣန္ဒြိယသံဝရပင် ဖြစ်သည်။

ဒီဇင်ဘာ၊၂၀၁၁မှာတုန်းက ရွှေကျင်သာသနာပိုင် ၀ါဆိုဆရာတော်ကြီးက ဗုဒ္ဓဂယာ ကျောင်းသားတွေကိုကို မိန့်ဖူးတဲ့ စကားတစ်ခွန်းရှိသည်၊ ‘‘ကောင်မလေးက အရှင်ဘုရားကို မရရင် သေရပါတော့မယ်ဆိုရင် ထွက်သာ ယူလိုက်တဲ့၊ ဒါပေမဲ့ ကောင်မလေးနဲ့ မတွေ့မချင်းတော့ စာအံ စာကျက်ကြ’’တဲ့။ ဆိုလိုတာ အမြဲတမ်း စာအံ စာကျက်နေဖို့ရန် ဗုဒ္ဓဂယာမှာ စာသင်သားများအား ပေးသည့် သြ၀ါဒ ဖြစ်သည်။ စာအံ စာကျက်နေခြင်းကလည်း ဣန္ဒြိယသံဝရပင် ဖြစ်သည်။

ထို့ကြောင့် တကယ်ချမ်းသာလိုလျှင် တကယ်ဖြတ်သင့်တာကို ဖြတ်နိုင်ကြပြီး တကယ့် ချမ်းသာအစစ်ကို ရနိုင်ကြပါစေကုန်သတည်းးးးးးးးး။


ရွှင်လန်းချမ်းမြေ့ပါစေ
သီတဂူစတား
၂၁-၁၂-၂၀၁၁

Read more »

သီတဂူအလှူ (အိန္ဒိယ၊ ဘင်္ဂလားဒေးရှ်)

 

(ဓာတ်ပုံ=သီတဂူစတား (ဒီဇင်ဘာ၊၂၀၁၁ က ရိုက်ခဲ့)

 

(က) ဗုဒ္ဓဂယာအလှူ
ဒီဇင်ဘာ ၂ ရက်နေ့ကနေ ၁၂ ရက်နေ့ အထိ (၁၀) ရက်တိုင်တိုင် နိုင်ငံတကာ တိပိဋက ရွတ်ဘာသ် ပူဇော်ပွဲကို ဗုဒ္ဓဘာသာနိုင်ငံများက အလှည့်ကျ ဦးဆောင်၍ အိန္ဒိယနိုင်ငံ ဗုဒ္ဓဂယာ မဟာဗောဓိပင်အောက်တွင် နှစ်စဉ် ကျင်းပလေ့ရှိသည်။ ယခုနှစ် ၂၀၁၂ ပွဲကို မြန်မာနိုင်ငံက ဦးဆောင်ကျင်းပမည်ဖြစ်သည်။ ထိုပူဇော်ပွဲကို သီတဂူဆရာတော် ဦးဆောင်၍ တိပိဋကဆရာတော်များနှင့် ၆၆ ယောက်ပါ တပည့် ဒကာ-ဒကာမများ ထိုမြေမြတ်မဟာသို့ သွားရောက် ပူဇော်ကြမည် ဖြစ်သည်။ ထိုပွဲအတွက် သီတဂူသာသနာပြုအဖွဲ့က အမေရိကန် ဒေါ်လာ (၁) တစ်သိန်း လှူဒါန်းမည် ဖြစ်သည်။

(နှစ်စဉ် အိန္ဒိယတက္ကသိုလ် အသီးအသီးတွင် ပညာသင်ကြားနေကြသော မြန်မာရဟန်းတော် ၆၀၀ ခန့်ကို ပညာသင်စရိတ် ထောက်ပံ့သည့် အစီအစဉ်လဲ ပါရှိကြောင်း၊ သို့သော် သတင်းကား အတိအကျ မရသေး)

ထိုပူဇော်ပွဲနှင့်ပတ်သက်ပြီး “မဟာဗောဓိအသံ” အမည်ရှိ ပို့စ်တစ်ခုဖြင့် စာရေးသူ၏ဆိုက်တွင် နှိုးဆော်ခဲ့ဖူးသည်။

(မှတ်ချက်) သီတဂူစတား သည် ထိုနေ့ထိုရက်များတွင် ဗုဒ္ဓဂယာတွင် ရှိနေပါမည်)

( အိန္ဒိယရောက် မြန်မာ ရဟန်းတော်များ နိုင်ငံတကာ တိပိဋက ပူဇော်ပွဲတွင် ပါဝင်)

(ခ) ဘင်္ဂလားဒေ့ရှ် အလှူ
များမကြာမီက ဘင်္ဂလားဒေ့ရ်ှနိုင်ငံရှိ သမိုင်းဝင် ရှေးဟောင်း ဗုဒ္ဓဘာသာ ဘုရားကျောင်းဆောင်၊ ဘုန်းကြီးကျောင်းဆောင် အများပြားကို မီးရှို့ဖျက်ဆီးခံရသဖြင့် ဗုဒ္ဓဘာသာ လူအနဲစုသာ နေသော ထိုနိုင်ငံတွင် ပြန်လည်ထူထောင်နိုင်ဖို့ အလွန်ခက်ခဲသည်။ ထိုဗုဒ္ဓဘာသာ ကျောင်းဆောင်များ ပြန်လည်ထူထောင်ရေးအတွက် သီတဂူသာသနာပြုအဖွဲ့က အမေရိကန် ဒေါ်လာ တစ်သိန်းကို လှူဒါန်းမည် ဖြစ်သည်။

ရွှင်လန်းချမ်းမြေ့ပါစေ
သီတဂူစတား
၂၆-၁၀-၂၀၁၂

Read more »

Ph.D သိမ်

Ph.D သိမ် (သို့) ခရီးသွားမှတ်တမ်း

စာမိတ်ဆက်
ရှေးကတော့ ရဟန္တာများ သမုတ်တဲ့ သိမ်ကို ရဟန္တာသိမ်ဟု ခေါ်သည်၊ ရဟန္တာ အရှင်မြတ် အရှင်အရဟံ သမုတ်တဲ့ သိမ်ကို အရှင်အရဟံ သိမ်ဟု ခေါ်သည်၊ ဘုရားရှင်၏ အရဟံဂုဏ်တော်ကို ဂုဏ်ပြု၍ အရဟံသိမ်ဟုလဲ အမည်ပေးကြသည်။ စာရေးသူနေခဲ့တဲ့ မဟာဂန္ဓာရုံကျောင်းတိုက်မှာတော့ ပွဲကုန်းရပ်က ဆောက်လုပ်လှူဒါန်းလို့ ပွဲကုန်းသိမ်ဟု အမည်တွင်သလို မိုးကုတ်မြို့က လှူဒါန်းသော သိမ်ကိုတော့ မိုးကုတ်သိမ်ဟု ခေါ်ခဲ့ကြသည်။ ယနေ့တော့ Ph.D ကျောင်းသား ရဟန်းတော်များ သမုတ်ခဲ့လို့ Ph.D သိမ်လို့တောင် အမည်ပေးရတော့မလို ဖြစ်သည်။

ဘုံဘေမြို့ စောမယကောလိပ်ရှိ၊ စာရေးသူတို့အဖွဲ့သည် ၂၆-၁၀-၂၀၁၂ သောကြာနေ့ည သိမ်နုတ် သိမ်သမုတ်ခြင်း၊ ရဟန်းခံပေးခြင်း စတဲ့ သံဃာ့ကံကိစ္စနဲ့ နာဂပူမြို့သို့ ဒုတိယအကြိမ်ရောက်ခဲ့ပြန်သည်။ စာရေးသူကိုယ်တိုင်ကလဲ ထိုနာဂပူမြို့သို့ရောက်ခဲ့ပြီး ၁၂ ရက်တိုင်တိုင် နေခဲ့ပြီးသည်၊ “ကမ္ဘာ့အကြီးကျယ်ဆုံး ဘာသာရေးပြောင်းပွဲကြီး” ဆိုတဲ့ပို့စ်ဖြင့် ထိုဒေသအကြောင်း ရေးခဲ့ပြီးသည်။ စာရေးသူမှာလဲ supervisor နဲ့ စာရေးလိုက် စာပြလိုက် စာပြင်လိုက် အလုပ်များနေတဲ့ကြားက ထိုဒေသသို့ ရောက်ဖူးပေမဲ့ သံဃာ့ကံကိစ္စကြောင့် မဖြစ်မနေ လိုက်သွားခဲ့ရသည်။ အကျိုးများစွာလည်းရှိပါသည်။

 

(ထီးတော်တင်လှူပွဲ) 

(ထီးတော်တင်လှူရန် ထီးတော်အဆင့်ဆင့်များ ပင့်ဆောင်ခြင်း)

သာသနာအတွက် အရေးပါသည့်သိမ်
သိမ်ဆိုတာကတော့ သိတဲ့အတိုင်းပဲ သံဃာ့အရေးမှာ အရေးပါဆုံးဖြစ်သည်။ သူမရှိရင် မဖြစ် ဖြစ်နေသည်။ ထိုသိမ်ကပဲ ရဟန်းအဖြစ်ကို မွေးထုတ်ပေးနိုင်သည်၊ ထိုသိမ်မရှိက ရဟန်းဖြစ်ဖို့မလွယ်၊ ဒေါက်တာအမ်ဘေဒကာကြောင့် ဗုဒ္ဓဘာသာ အသက်ပြန်လည်ရှင်သန်လာသော နာဂပူမြို့မှာ သိမ်မရှိတဲ့အတွက် ရဟန်းတစ်ပါးဖြစ်ဖို့ရာ အလွန်ခက်ခဲနေသည်၊ လူဆိုတာ ခက်ခဲရင် ဘာမှ မလုပ်ချင်ကြ၊ အလွယ်တကူဖြစ်မှသာ လုပ်ချင်ကြသည်၊ အလွယ်ကို သိပ်ကြိုက်ကြသည်။ အထူးသဖြင့် ဘာသာရေးလို ကိစ္စမျိုးတွေမှာဆို ပိုလို့တောင် ဆိုးသေးသည်။ ဘုန်းကြီးကျောင်းကိုတောင် အနီးအနားမှာ အလွယ်တကူရှိမှ သွားချင်ကြသည်၊ ခက်ခဲရင် မရောက်ဖြစ်တော့၊ ဝေးနေရင် နှစ်ခေါက် သုံးခေါက်ရောက်ရမည့်အစား တစ်ခေါက်ပဲ ရောက်ဖြစ်တော့သည်။ အလားတူပဲ သိမ်အခက်ခဲကြောင့် သိမ်ရှိတဲ့ အလွန်ဝေးလံလှတဲ့ နေရာမှာ သွားပြီး ရဟန်းပြုဖို့ဆိုတာ သာမန် စိတ်ဓာတ်၊ သဒ္ဓါတရား ၀ိရိယတို့ဖြင့် မလွယ်ကူ။ ထိုဒေသမှာ သိမ်အလွယ်တကူ ရှိနေရင် အရင် တစ်ပါးကနေ နှစ်ပါး သုံးပါး အထိ တိုးလာနိုင်သည်။ ယနေ့ စာရေးသူတို့အဖွဲ့က သွားရောက်ပြီး သိမ်ကိစ္စကို စနစ်တကျ ဆောင်ရွက်ပေးလိုက်ခြင်းကြောင့် သာသနာအတွက် များစွာအထောက်ကူပြုသည်ဟု ဆိုနိုင်သည်။ ယခင်က ရဟန်းတစ်ပါး ဖြစ်ချင်ရင် ရထားဖြင့် တစ်ညအိပ် ခရီးသွားရတဲ့ ဗုဒ္ဓဂယာဘက်ထိ သွားပြီး ရဟန်းပြုကြရသည်။ အခုဆိုရင် အဲဒီအခက်အခဲကို စာရေးသူတို့အဖွဲ့က ဖြေရှင်းပေးလိုက်သည်။

ဘာမှ မသိရှာ သနားစရာ
တကယ်တော့ ထိုဒေသရှိ ဗုဒ္ဓဘာသာဝင်များသည် ရဟန်းတစ်ပါး ဖူးမြင်ရဖို့ အလွန်ခက်ခဲသလို ဗုဒ္ဓဘာသာနဲ့ပတ်သက်ပြီး ဘာမှ မသိရှာ၊ သိမ်အကြောင်း၊ ရဟန်းခံခြင်း၊ ကထိန်ခင်းခြင်း စတဲ့ ကံကြီးကံငယ်အကြောင်း သိဖို့ အတော်ကို ဝေးနေသည်။ ထိုဒေသမှာ လူဝတ်ကြောင် မပြောနဲ့ အိန္ဒိယဘုန်းကြီးတွေတောင် ယခုကဲ့ သိမ်နုတ်ခြင်း၊ သိမ်သမုတ်ခြင်းကို မြင်ဖူးမည် မထင်။ စာရေးသူတို့အဖွဲ့က သိမ်နုတ်ရန် အကွက်ရိုက်ခြင်း၊ သိမ်နုတ်ကမ္မ၀ါဆောင်ခြင်၊ သိမ်းနိမိတ်ကြားခြင်း၊ သိမ်သမုတ်ကမ္မ၀ါဆောင်ခြင်းကိစ္စများကို မြန်မာပြည်က လုပ်ရိုးလုပ်နည်းအတိုင်း စနစ်တကျ ဆောင်ရွက်ပေးလိုက်သဖြင့် သူတို့တတွေ အံ့သြ ၀မ်းသာ ပီတိ ဖြစ်နေကြသည်။ မြန်မာပြည်က အတိုင်းပဲ သိမ်ဆင်းပွဲတွေ ကျင်းပပေးလိုက်သည်၊ နောက်နေ့ အိန္ဒိယကျောင်းသားတစ်ယောက်အား ထိုသိမ်အသစ်မှာပဲ ပထမဆုံးအကြိမ် ရဟန်းခံပေးလိုက်သည်။ တစ်ချိန်တည်း တစ်နေရာတည်းမှာပဲ သိမ်နုတ်၊ သိမ်သမုတ်၊ ရဟန်းခံခြင်း ကံဆောင်မင်္ဂလာကို ချပြပေးလိုက်ခြင်းဖြင့် ဗုဒ္ဓဘာသာနဲ့ပတ်သက်ပြီး ဘာမှ မသိသေးတဲ့ ထိုဒေသရှိ သာသနာအတွက် များစွာ အားရစရာ ဖြစ်ရသည်။ ထိုသိမ်သမုတ်ပွဲနဲ့ ရဟန်းခံပွဲတွေမှာ နာဂပူက အကြီးဆုံး ဆရာတော်ကြီး (သံဃာ့နာယက) နှစ်ပါးလဲကြွလာသည်၊ စာရေးသူတို့အဖွဲ့ သွားရောက် ကန်တော့ကြသည်။ ဆရာတော်ကြီးများလဲ အားရ ကျေနပ်တော်မူကြသည်၊ မြန်မာရဟန်းတော်တွေ အလွန်နှုညံ့သိမ်မွေ့ကြတယ်၊ တော်လည်းတော်ကြတယ်ဟု အမိန့်ရှိသည်။ ကျောင်းထိုင်ဆရာတော်ကဆို တအားဝမ်းသာနေသည်၊ အရှင်ဘုရားများကို အရမ်းကျေးဇူးတင်တယ်ဘုရား၊ တပည့်တော်တစ်ပါးတည်းဆို ဘာမှ မလုပ်တတ်ဘူး၊ အရှင်ဘုရားများ ကျေးဇူးကြောင့် အကောင်းဆုံးနဲ့ အအောင်မြင်ဆုံးဖြစ်သွားတယ်ဘုရား၊ အဲဒီနေ့က အိန္ဒိယ ရုပ်သံကလဲ တိုက်ရိုက်ထုတ်လွင့်သည်။ ထိုနာဂပူမြို့၊ သာရိပုတ္တဗုဒ္ဓ၀ိဟာရကျောင်းရှိ သိမ်တော်ကို အိန္ဒိယနိုင်ငံ၊ ဘုံဘေမြို့ စောမယကောလိပ်ရှိ မြန်မာရဟန်းတော် Ph.D ကျောင်းသားများချည်း သမုတ်ခဲ့လို့ Ph.D သိမ်လို့ ဆိုချင်အံ့။

(မြန်မာနိုင်ငံမှ လှူဒါန်းလိုက်သော စိန်ဖူးတော်နှင့် ထီးတော်များ ပင့်ဆောင်လာစဉ်)

မြန်မာဆန်တဲ့ ဘုရားထီးတင်ပွဲ
စာရေးသူတို့ မြန်မာနိုင်ငံမှာတော့ နေရာအနံ့အပြားမှာ ဘုရားထီးတော်တင်ပွဲတွေ တွေ့နေရသည်၊ ထိုအတွက် ဗုဒ္ဓဘာသာနိုင်ငံတွေ အတွက် အထူးအဆန်းကား မဟုတ်တော့၊ သို့သော်လည်း ဗုဒ္ဓဘာသာနဲ့ဆိုင်ရာ ယဉ်ကျေးမှု လုံးဝနည်းပါး ပျောက်ကွယ်သွားသော အိန္ဒိယလို နေရာမျိုးမှာကတော့ အထူးအဆန်းဖြစ်လိမ့်မည်။ သိမ်ကိစ္စနဲ့ ရဟန်းခံပေးခြင်း ကိစ္စပြီး နောက်နေ့မနက် ၂၉ ရက်နေ့မှာတော့ ထိုမြို့ ထိုကျောင်းသုံထပ်ရှိ ခေါင်မိုးအပေါ်မှာ တည်ထားတဲ့ စေတီတော်ကို ထီး စိန်ဖူး၊ ငှက်မြက်နား စသည်များကို တင်လှူပူဇော်ပွဲ ဖြစ်သည်။ စေတီပုထိုးတောင် ကောင်းကောင်း မမြင်ဖူးတဲ့ ထိုဒေသရှိ ဗုဒ္ဓဘာသာဝင်တွေအတွက် ထီးတော်တင်လှူပွဲကား အံ့သြ ၀မ်းသာစရာ ဖြစ်သည်။ တကယ်တော့ သူတို့တတွေသည် စေတနာ သဒ္ဓါတရား မညံ့ကြပါ၊ ဘာလုပ်ရမလဲ ဘယ်လိုလုပ်ရမလဲ ဆိုတာကိုတော့ အသိပညာ ဗဟုသုတ အလွန်နည်းပါးကြသည်။ ဒီနေ့တော့ မြန်မာမှု မြန်မာဟန်ဖြင့် ထိုစေတီ ထီးတင်ပူဇော်ပွဲကို ခန်းခန်းနားနား အောင်အောင်မြင်မြင် ကျင်းပနိုင်ခဲ့သည်အတွက် သမိုင်းမှတ်တိုင် တစ်ခုဖြစ်ခဲ့သည်။

မြန်မာ့ဟန်နဲ့ နာဂပူ
ဘုရားထီးတင်ပူဇော်ရာဝယ် ထီးတော်များ ပင့်ဆောင်ခြင်း၊ လှည့်လှည်ပူဇော်ခြင်း၊ ရွှေမိုးငွေမိုးများရွာသွန်းခြင်း စတဲ့ မြန်မာမှုမြန်မာ့ဟန်များကို အိန္ဒိယနိုင်ငံ နာဂပူမြို့မှာ ပြသနိုင်ခဲ့သဖြင့် မြန်မာနှင့်ဗုဒ္ဓဘာသာ၊ ဗုဒ္ဓဘာသာနှင့်မြန်မာဟု တွဲမြင်စေခဲ့သည်။ စာရေးသူတို့အဖွဲ့အား လိုလေးသေးမရှိအောင် ကျောင်းထိုင်ဘုန်းကြီးက စောင့်ရှောက်သည်၊ ရပ်ကွက်ရှိ ဒကာဒကာမများကလဲ အလှည့်ကျ ဆွမ်းကပ်ကြသဖြင့် တာဝန်ကျေကြသည်။ အိန္ဒိယပြည်တွင် အများစုက သက်သက်လွတ်စားကြသည်၊ အသားဟင်းများဖြင့် မစားတတ်ကြ၊ ထိုသက်သက်လွတ်ဝါဒသည် မြန်မာပြည်အထိ လွမ်းမိုးလာခဲ့သည်။ သက်သက်လွတ်စားလျှင် ကုသိုလ်ရသည်ဟု ထင်တတ်ကြသည်၊ သတွာတွေ အပေါ် မေတ္တာ ကရုဏာကြောင့် သက်သက်လွတ်စားနေတာ ကောင်းပေမဲ့ ထိုသက်သက်လွတ် အစားအစားအပေါ် ရသတဏှာ ၀င်နေခြင်းက ဘုရားအလိုတော်ကျ မဟုတ်။ ဘုရားရှင်က မစားကောင်းသော အသားကြီး ၁၀ မျိုးကလွဲရင် ကျန်သော အသားဟင်းများကို မိမိအတွက် ရည်စူး၍ သတ်ဖြတ်သည်ဟူသော မြင်ခြင်း ကြားခြင်း၊ ယုံမားသံသယဖြစ်ခြင်း စတဲ့ အစွန်သုံးပါးက လွတ်နေလျှင် စားကောင်းသည်ဟု ဟောခဲ့။ အသားဟင်းစားနေပေမဲ့ ထိုအစားအစာအပေါ် ဆင်ခြင်စားနေပါက ထိုထိုသက်သက်လွတ်သမားထက် ပိုကုသိုလ်ရသည်။ အိန္ဒိယသက်သက်လွတ်သမားများသည် ထိုကဲ့သို့ကား မသိ၊ သူ့ရိုးရာအရ သက်သက်လွတ်စားနေကြပေမဲ့ မြန်မာရဟန်းတော်များ အတွက် ကုလားအစားအစာ အနံ့ နဲနိုင်သမျှ နဲအောင် စီမံပြီး အသားဟင်းများကိုလဲ အထူးစီမံပေးသည်။

 

(သိမ်နုတ်၊ သိမ်သမုတ် အခမ်းအနားတွင် နာဂပူသံဃာ့နာယက ဆရာတော်ကြီးများအား ရိုသေပေးခြင်း)

ရပ်ကွက်ထဲက အိမ်တက်မင်္ဂလာအတွက်လဲ သံဃာများ သွားရောက် ချီးမြောက်ပေးလိုက်ကြသည်၊ သံဃာရှားပါးသော နေရာမှာ ယခုလို သံဃာများများစားစား နဲ့ အရွယ်တူ ဆိုက်တူ အသွင်တူများကို ဖူးမျှော်ရသည့်အတွက် အားရ ကျေနပ်နေကြသည်။ သံဃာကို ဖူးရကောင်းမှန်းသိသည်၊ သံဃာကို ပြုစုတတ်လာကြသည်၊ သံဃာ့ဂုဏ်ရည်ပင်ဖြစ်သည်၊ ယခုလို အ၀တ်အစား ညီညီ၊ အရွယ်ညီညီ ဖူးမြင်ရသည့်အတွက် ပိုပြီး သံဃာ့ဂုဏ်ကို ထင်ဟပ်စေသည်၊ သံဃာ (အဖွဲ့လိုက်) မဟုတ်ဘဲ တပါးချင်းစီဆိုရင် ကြည်ညိုဖွယ် ဖြစ်ချင်မှ ဖြစ်မည်၊ တောင်မြို့ မဟာဂန္ဓာရုံမှာ နေစဉ်က ဆရာတော်ကြီးများက မကြာမကြာပြောလေ့ရှိသည်၊ “အ၀တ်အစား အရောင်တူ၊ ဆံရိပ်တာချင်းလဲ တူ၊ သပိတ်လွယ်၊ ဘိနပ်ကအစ တူစေသည်၊ ညီစေသည်၊ ထိုသို့ညီညွတ်ချင်းက ကြည်ညိုစရာ ဖြစ်စေသည်၊ တစ်ပါးချင်းစီဆိုရင် မြင်ရမှာက ရွဲ့တာ စောင်းတာ၊ မဲ့တာ၊ မည်းတာ၊ တိုတာ၊ ပုတာ၊ ရှည်တာ၊ ကွေးတာ ကောက်တာ စသည်အားဖြင့် အသွင်မတူသည့်အတွက် လူတွေရဲ့ စိတ်ကို မဖမ်းစားနိုင်၊ စိတ်ရဲ့ ကြည်လင်မှု၊ အေးချမ်းမှုကို မပေးနိုင်” ဟု မိန့်သည်၊ ထို့ထက် ပိုပြင်းထန်သော စကားမှာ တစ်ယောက်ချင်းစီကို လိုက်ကြည့်နေရင် ဂျိုကျိုး နားရွက်ပဲ့နေမှာ အများနဲ့ အသွင်တူ အဆင်တူ မြင်ရတော့ ထိုပျော့ကွက် ဟာကွက်တွေ ပျောက်ပြီး သံဃာ့ဂုဏ်ကို ပီပြင်စေသည်။

စာရေးသူတို့အဖွဲ့လဲ အလားတူပင် ဖြစ်မည်၊ အရွယ်တူ ဆိုက်တူ အဆင်းတူ ကျောင်းသား ရဟန်းတော်များကို ဖူးမြင်ရသဖြင့် နာဂပူသားတွေ ပီတိတွေ ဖြစ်သည်။ အလှူအတန်းမရှိသော အိန္ဒိယလူမျိုးတွေ လှူတတ်သွားသည်၊ လှူရကောင်းမှန်းသိလာသည်၊ ထို ဘုရားထီးတော် တင်ပွဲနေ့ကပဲ ကျောင်းဘေးမှာ မဏ္ဍပ်များထိုးပြီး မနက်ပိုင်းကစပြီး ညနေပိုင်းအထိ လာသမျှလူတွေကို စတုဒိသာ ကျွေးမွေးသည်။

 

(သံဃာတော်များ ဆွမ်းကပ်ခြင်း၊ စတုဒိသာ ကျွေးခြင်းများ)

ပြန်မည့်နေ့မှာလဲ တပည့်ဒကာ ဒကာမတွေ လာနုတ်ဆက်သည်၊ တန်းစီကြွလာသော စာရေးသူတို့အဖွဲ့အား အိန္ဒိယရူပီးများလဲ လမ်းစရိတ်အဖြစ် လာလောင်းလှူကြသည်။ ကျောင်းဘုန်းကြီးလဲ အားရကျေနပ်နေသည်၊ မြန်မာမှုမြန်မာ့ဟန်များကို လက်တွေ့ချပြလိုက်ရသဖြင့် ပီတိတွေ ဖြစ်နေသည်။ ကျောင်းဘုန်းကြီးရော ဒကာ ဒကာမတွေကပါ နောက်နောင်လဲ အဆက်မပြတ် ကြွရောက်ဖို့ ဖိတ်သည်၊ အားလုံးကို ကျေးဇူးတင်ခြင်းဖြင့် နာဂပူမြို့ကို နုတ်ဆက်ကာ ညနေ ၈-၅၀ ရထားဖြင့် ဘုံဘေမြို့သို့ ပြန်ခဲ့ကြသည်။

ရွှင်လန်းချမ်းမြေ့ပါစေ
သီတဂူစတား
၃၁-၁၁-၂၀၁၂

Read more »