ဒုတိယနေ့ ဗုဒ္ဓဘာသာအစည်းအဝေး

ဒုတိယနေ့ ဗုဒ္ဓဘာသာအစည်းအဝေး

နီပေါလ်နိုင်ငံမှာ သီတဂူဆရာတော်ကြီး ဦးဆောင်ကျင်းပနေသည့် လုမ္ဗိနီ အပြည်ပြည်ဆိုင်ရာ ဗုဒ္ဓဘာသာအစည်းအဝေးကြီးကို ၁၅-၁၁-၂၀၁၄ ပထမနေ့ နံနက်ပိုင်း ဖွင့်ပွဲ၊ ညနေပိုင်း ၃ နေရာ ၅ ဌာနခွဲပြီး ဘာသာရပ်အလိုက် ဆွေးနွေးခြင်းများပြုလုပ်ခဲ့သည်။

ဒုတိယနေ့ (၁၆-၁၁-၂၀၁၄)
ဒုတိယနေ့မှာလည်း ၃ နေရာ ၅ ဌာနခွဲပြီး ဘာသာရပ်အလိုက် ဆွေးနွေးခြင်းများ ပြုလုပ်ရာ သီရိလင်္ကာဘုန်းတော်ကြီးကျောင်းမှာ ၂ ဌာန၊ မဟာဗောဓိအသင်းကျောင်းမှာ ၂ ဌာနနှင့် မြန်မာရွှေကျောင်း ဓမ္မာရုံကြီးမှာ ၁ ဌာနဟူ၍ သက်မှတ်သည်။ ထိုဌာနအားလုံးတွင် မနက်ပိုင်း ညနေပိုင်းဟူ၍ ခွဲခြားကာ ဆွေးနွေးကြသည်၊ ညနေ ၆နာရီအထိ သက်မှတ်ထားသော်လည်း ၇ နာရီ၊ မြန်မာကျောင်းမှာ ကျင်းပသော ဆွေးနွေးပွဲသည် ညနေ ၈နာရီအထိ ရောက်သွားသည်။

မြန်မာကျောင်းမှ မနက်ပိုင်း
လုမ္ဗိနီမြန်မာကျောင်းမှာ ကျင်းပနေသည့် ဆွေးနွေးပွဲ၏ Moderator တာဝန်ကို အိန္ဒိယတက္ကသိုလ်တစ်ခုမှ ပါမောက္ခကြီးက ဆောင်ရွက်သည်။ စာတမ်းများကိုတော့ ဒေါက်တာ ခင်မောင်ညွှန့်၊ အမေရိကမှ အလီဇဘတ်မိုး၊ ဒေါက်တာ ဓမ္မပီယ၊ ဒေါက်တာဝေဠုရိယဥာဏာလင်္ကာရ၊ ဦးအောင်သိန်းညွှန့်တို့က တင်သွင်းဖတ်ကြားကြသည်။

ဒေါက်တာခင်မောင်ညွှန့်နှင့် အလီဇဘက်မိုးတို့သည် မြန်မာနိုင်ငံ၊ ပုဂံရဲ့ ရှေးဟောင်းများအကြောင်း၊ ထိုရှေးဟောင်းများကို ဘယ်လိုထိန်းသိမ်း၊ ဘယ်လိုကာကွယ်၊ စောင့်ရှောက်ရမည့်အကြောင်းများကို တင်သွင်းကြသည်။

ထိုနှစ်ဦး၏ စာတမ်းများကို ဗီယတ်နမ်ဘုန်းတော်ကြီး ဒေါက်တာလန်းက “လုမ္ဗိနီနှင့် မြန်မာပုဂံ ဘယ်ဟာ ပိုအရေးကြီးသနည်း”ဟု မေးခွန်းထုတ်သွားသည်။

ဒေါက်တာဓမ္မပိယ
ဒေါက်တာဓမ္မပိယ၏ “မြတ်ဗုဒ္ဓမွေးဖွားရာ လုမ္ဗိနီ၏ လက်ရှိ သဘာဝပတ်ဝန်းကျင်၊ ယဉ်ကျေးမှုအမွှေအနှစ်များကို ရင်ဆိုင်နေရသော အန္တရာယ်များ၊ ထိုအန္တရာယ်များကို ကာကွယ်စောင့်ရှောက်ရန်”ကို ဗီယတ်နမ် ဘုန်းတော်ကြီး ဒေါက်တာလန်းက စိတ်အားထက်သန်စွာ ထောက်ခံ ပြောဆိုသည်။ လုမ္ဗိနီမှာ ဒီလောက်ကြီးကျယ်သည့် အစည်းဝေးကြီးဖြစ်ပေါ်အောင် ထောက်ပံ့ပေးသော သီတဂူဆရာတော်ကြီးကို ကျေးဇူးတင်ကြောင်း ပြောသွားသည်။

ဒေါက်တာ ဝေဠုရိယာဥာဏာလင်္ကာရ
ဒေါက်တာ ဝေဠုရိယာဥာဏာလင်္ကာရ၏ စာတမ်းနှင့်စပ်ပြီး ဆွေးနွေးသူတစ်ယောက်က “ လုမ္ဗိနီရှေးဟောင်းအမွှေနှစ်ကို ဘယ်လိုကာကွယ် စောင့်ရှောက်မလဲ” မေးခွန်းအပေါ် စာတမ်းရှင်က ဒေသခံလူတွေရဲ့ ပညာတတ်မှုနှင့် စည်းကမ်းရှိမှုသည် ပိုအရေးကြီးကြောင်း၊ ဘန်ကောက်က နာမည်ကြီး ကျောက်ဖုရားမြစ်တွင် မည်သည့်နိုင်ငံသား တစ်ယောက်ယောက် အမှိုက်တစ်ခုခု ပစ်ချသည်ကို မြင်သော ဒေသခံ လူတိုင်းက တားမြစ်ကြသည့်အတွက် မြစ်သည် သန့်ရှင်းသည်၊ သဘာဝပတ်ဝန်းကျင်းကို ထိန်းသိမ်းထားနိုင်သည်။

ထိုစာတမ်းနှင့်စပ်ပြီး အမေရိကန်မျိုးနွယ် မစ်စ်ဝမ်မိုးက “ သံဃာတော်အားလုံးက မြတ်ဗုဒ္ဓရဲ့စကားတော်များကို သင်ယူခြင်း၊ ပို့ချခြင်း၊ ဒကာ ဒကာမများကို ဟောပြောခြင်းသည် Preserve ထိန်းသိမ်းထားရာ ရောက်ပါကြောင်း”လည်း ထောက်ခံ ပြောသွားသည်။

နေ့လည်ပိုင်း ဆွေးနွေးချက်
နေ့လည်ပိုင်းမှာတော့ စာရေးသူသည် သီရိလင်္ကာဘုန်းတော်ကြီးကျောင်းမှာ ပြုလုပ်နေသည့် ၂ ဌာနကို သွားရောက်ခဲ့သည်။ ထို၂ ဌာနမှ တစ်ခုသော ဌာနတွင် မြန်မာနိုင်ငံ ပုဂံက ရေဆေးပန်းချီ၊ ဓာတ်ပုံများကို ထိန်းသိန်းစောင့်ရှောက်ပုံများကို အင်္ဂလန်နိုင်ငံ စာကြည့်တိုက်မှူးများက ပရိုဂျက်တာဖြင့် တင်ပြဆွေးနွေးသည်။ အိန္ဒိယ ပညာရှင်နှစ်ယောက်နှင့် သီရိလင်္ကာပညာရှင်တို့သည်လည်း သူတို့နိုင်ငံမှ ရှေးဟောင်းအမွှေအနှစ်ဖြစ်သော ဘုရား၊ ပုထိုး၊ ရုပ်ပွား၊ ဂူကျောင်းများကို ပရိုဂျက်တာဖြင့် တင်ပြဆွေးနွေးကြသည်။ တရုပ်ကလည်း သူ့နိုင်ငံမှာ ထေရ၀ါဒသာသနာနှင့် စာပေများရောက်လာပုံ ပြောသည်။ ထိုဆွေးနွေးပွဲကို မြန်မာနိုင်ငံမှ ဒေါက်တာဓမ္မဿာမိက Moderator အဖြစ်ဆောင်ရွက်သည်။

မြန်မာကျောင်းနေ့လည်းပိုင်း၊ ရှေးပိုင်းမှာတော့ နီပေါလ်ဘာသာဖြင့် ဆွေးနွေးကြသည်၊ နောက်ပိုင်း အင်္ဂလိပ်လိုပဲ ပြောကြဆွေးနွေးကြသည်၊ နောက်ဆုံး အမေရိကန် ရှေးဟောင်းသုတေသနပညာရှင်က ရှေးဟောင်းအမွှေနှစ်ဖြစ်သော မြတ်ဗုဒ္ဓဖွားရာကို တွေ့ရှိပုံတို့ကို ရှင်းလင်းတင်ပြသည်၊ ရှာဖွေပုံ စမ်းသပ်ပုံ၊ ထိန်းသိမ်းပုံတို့ကို မေးခွန်းရှင်များ၏ မေးခွန်းများအရ ဖြေဆိုရာ တစ်နာရီကျော်ကြာသွားသည်၊ ထိုနေ့ ညနေပိုင်းဆွေးနွေးပွဲသည် ည ၈နာရီမှ ပြီးစီးသည်။

ထိုဆွေးနွေးပွဲသို့ မြန်မာသာသနာရေးဝန်ကြီးလည်း လာရောက် နားထောင်သည်။ သီတဂူဆရာတော်ကြီးသည် နောက်ဆုံးအချိန်ထိ နားထောင်သည်။ ပါဝင်သည်၊ ဦးဆောင်ဦးရွက်ပြုသည်။ မြတ်ဗုဒ္ဓဖွားရာနေရာကို ရှာဖွေတွေ့ရှိသော ရှေးဟောင်းသုတေသန ပညာရှင်ကို မိုဟာမက်၊ ဂျေးဇက်၊ ဂျိန်းတို့၏ မွေးဖွားရာနေရာကို ရှာဖွေသုတေသန လုပ်ပြီးရင် သင်ပို့ချချက်ကို နားထောင်လိုကြောင်းပြောလိုက်သဖြင့် ပရိသတ် လက်ခုပ်သံ ညံသွားသည်။

 အကြောင်းကား သူတို့မွေးဖွားရာနေရာသည်လည်း ကမ္ဘာ့အမွှေနှစ်ဖြစ်သောကြောင့်တည်း။

ရွှင်လန်းချမ်းမြေ့ပါစေ
သီတဂူစတား
၁၆-၁၁-၂၀၁၄

Posted in: အစည်းအဝေးများ