ရိုမန်ကက်သလစ် ခရစ်ယာန်သာသနာ အခမ်းအနားတွင် သီတဂူဆရာတော် ၀မ်းမြောက်စကား ပြောခြင်း

ရိုမန်ကက်သလစ် ခရစ်ယာန်သာသနာ မြန်မာပြည်သို့ ရောက်ခြင်း နှစ် (၅၀၀) ပြည့်ပွဲအခမ်းအနားတွင် သီတဂူဆရာတော် ၀မ်းမြောက်စကား ပြောခြင်း
--------------------------------------------

ဝမ်းမြောက်ဂုဏ်ပြုသဝဏ်လွှာ
ရိုမန်ကက်သလစ် ခရစ်ယာန်သာသနာ မြန်မာပြည်သို့ရောက်ခြင်း
နှစ် (၅၀၀) ပြည့်ပွဲအခမ်းအနား
သုဝဏ္ဏကွင်း၊ ရန်ကုန်
၂၀၁၄ နိုဝင်ဘာလ ၂၃ ရက်
--------------------------------

ရိုမန်ကက်သလစ် ခရစ်ယာန်ဘာသာဝင် ညီအစ်ကိုမောင်နှမများ၏ မြန်မာပြည်ရောက်ခြင်း နှစ်(၅၀၀) ပြည့်ပွဲ အခမ်းအနားကြီးမှာ ခရစ်ယာန်ဘာသာဝင် များကိုသာမက အခြားသောဘာသာဝင်များနှင့်ပါ တွေ့ဆုံခွင့်၊ ရင်းနှီးခွင့်၊ စကားပြောခွင့်ရတဲ့အတွက်ကြောင့် အလွန်ဝမ်းမြောက်ဂုဏ်ယူပါတယ်။

မြတ်ဗုဒ္ဓကဟောတော်မူထားသော စာတစ်ပိုဒ်ရှိပါတယ်- အဘိဏှံ သန္နိပါတာ သန္နိပါတဗဟုလာ ဝုဍ္ဎိယေဝ ဘဝိဿန္တိ၊ နောပရိဟာနိ - (“As long as the monks hold regular and frequent assemblies, they may be expected to prosper and not decline.”) မြတ်ဗုဒ္ဓရဲ့မိန့်တော်မူချက်အရ ဘာသာရေးခေါင်းဆောင်များအချင်းချင်း၊ နိုင်ငံရေးခေါင်းဆောင်များ အချင်းချင်း၊ လူမှုရေးခေါင်းဆောင်များအချင်းချင်း၊ ပညာရေးခေါင်းဆောင်များအချင်းချင်း၊ စိတ်ဓာတ်ရေးခေါင်းဆောင်းများ အချင်းချင်း မပြတ်မပြတ် တွေ့ဆုံခြင်းဟာ အကျိုးများစွာရှိပါတယ်။ အချင်းချင်း ချစ်ခင်ရင်းနှီး ခွင့်ရပါတယ်။ (mutual friendship) တစ်ယောက်နှင့်တစ်ယောက် နားလည်ခွင့် ရတယ်။

ဘာသာတရားတခု၏အကြောင်းကို အခြားဘာသာ ဝင်များက နားလည်ခွင့် ရပါတယ်။ (mutual understanding) ချစ်ခင်ရင်းနှီးခြင်း အပြန်အလှန် နားလည်ခြင်း ဆိုတဲ့ အကျိုးတရားတွေက အချင်းချင်းအပြန်အလှန် ရိုသေလေးစားခြင်းဆိုတဲ့ (Mutual respect) ကိုဖြစ်စေပါတယ်။ ဒါကြောင့် ဒီကနေ့ ဒီနှစ် (၅၀၀) ပြည့်ပွဲအခမ်း အနားကြီးဟာ အထက်ပါအကျိုးတရားတွေကို များစွာဖြစ်စေနိုင်လိမ့်မယ်လို့- ယုံကြည်မျှော်လင့်ပါတယ်။

အဲဒါကြောင့် Inter-faith dialogue တွေ Multi-faith seminar-တွေ Inter-religious conference-တွေဟာ မြတ်ဗုဒ္ဓမိန့်ကြားတော်မူတဲ့ အဘိဏှသန္နိပါတ-အစချီသောဒေသနာတော်များနှင့် ထပ်တူညီမျှဖြစ်နေသည်-ဟု ကျွန်ုပ်ယုံကြည် ပါသည်။ ထို့အပြင် မြတ်ဗုဒ္ဓသည် သူ၏ဗုဒ္ဓသာသာနာတော်ကို စတင်တည်ထောင် ခါစ B.C 588 မဂဓတိုင်း၊ ရာဇဂြိုဟ်မှာပထမအကြိမ်ကျင်းပတဲ့ သံဃာ-၁၂၅၀-တို့၏ အစည်းအဝေးကြီးမှာ ပထမဆုံးပြောတဲ့ မိန့်ခွန်း၏ ပထမဆုံးသောစကားလုံးမှာ ခန္တီ ပရမံ တပေါ တိတိက္ခာ (Tolerance is the highest austerity) လို့စတင် မိန့်မြွက် တော်မူပါတယ်။

ဂျိန်းဘာသာကိုတည်ထောင်တဲ့ မဟာဝီရဆရာကြီးကတော့ အဟိံသဝါဒ (Non-violence)ကို အမြင့်ဆုံးထားဟောပါတယ်။ Jesus Christ - ရဲ့ ဟောပြော ချက်တွေ ထဲမှာလည်းကရုဏာကို ဦးစားပေးဟောပြောချက်တွေကိုလည်း တွေ့ရ ပါတယ်။
တမာန်တော်မိုဟာမက်ရဲ့မူဝါဒတွေထဲမှာ ထူးထူးခြားခြား ကျွန်ုပ်သဘောကျ မိတာနှစ်ချက်တွေ့ရပါတယ်။ အဲဒါဟာဘာလဲဆိုတော့ အမြတ်ကြီးစား ဝိသမ လောဘကို ဖယ်ရှားဖို့နဲ့ ကြွယ်ဝချမ်းသာသူတွေဟာ သူတို့ရဲ့ ပိုင်ဆိုင်မှုတွေကို ဆင်းရဲသားများအားဝေငှဖို့ဆိုတဲ့ အဆုံးအမတွေ တွေ့ရတယ်။ အဲဒါဟာ မြတ်နိုးစရာ ကောင်းတဲ့ အချက်တွေပါပဲ။

တရုတ်ပညာရှိ အတွေးအခေါ်ဆရာကြီးကွန်ဖြူးရှပ်ရဲ့ အဆုံးအမတွေထဲမှာ နိုင်ငံရေးသမားတွေဟာ ပညာတတ်ရမယ်၊ အကျင့်ကောင်းရမယ်-ဆိုတာ တွေ့ရပါ တယ်။

အဲဒီတော့ ဒီဘာသာရေးခေါင်းဆောင်များ၊ ပညာရှိများရဲ့ အဆိုအမိန့်တွေ အားလုံးကိုပေါင်းလိုက်ရင် ငြိမ်းချမ်းသော, လုံခြုံသော, တည်ငြိမ်သော, စည်းလုံးသော လူ့အဖွဲ့အစည်းတစ်ခု, နိုင်ငံတစ်ခု တည်ဆောက်ရာမှာ ဘာသာရေးကပေးတဲ့ ခန္တီ, မေတ္တာ, ကရုဏာ, ပညာ, သီလဆိုတဲ့ ၀ိဇ္ဇာစရဏ တရားများဟာ များစွာအထောက်အကူဖြစ်လိမ့်မယ်လို့ ယုံကြည်ပါတယ်။
နောက်ပြီးတော့ လောဘအစွန်းရောက်တဲ့ကမ္ဘာမှာ ငတ်မွတ်ခေါင်းပါးမှုတွေ၊ ဒေါသအစွန်းရောက်တဲ့ကမ္ဘာမှာ စစ်ပွဲတွေနှင့် ပဋိပက္ခတွေ၊ မောဟအစွန်း ရောက်တဲ့ ကမ္ဘာမှာ ဆင်ခြင်တုံတရား ကင်းမဲ့တဲ့ မိုက်မဲမှုတွေ ထွန်းကားလာတတ်တယ်ဆိုတဲ့ မြတ်ဗုဒ္ဓရဲ့သစ္စာစကားထဲမှာ ဘာသာရေးခေါင်းဆောင် အားလုံးတို့ရဲ့ အဆုံးအမများ အားလုံးစုပေါင်းဝင်သွားကြပါတယ်။ နောက်တစ်ခုပြောချင်တာက ဒီလောဘ, ဒေါသ, မောဟ အစွန်းရောက်နေကြတဲ့ လူသားအချို့ရဲ့ စိတ်ဓါတ်တွေကို ဟန်ချက် ညီအောင် - Balance of Mind - ဖြစ်အောင် ဘာသာတရားအားလုံးက ၀ိုင်းဝန်း ညှိပေးနိုင်လျှင် ပဋိပက္ခတွေဟာ လျော့ပါးနိုင်တယ်လို့ ထင်မြင်မိကြောင်း ပြောပါရစေ။

ဘာသာတိုင်းဟာ Outer shell-ဆိုတဲ့ပြင်ပအကာအခေါက်တွေ ရှိတတ်တယ်။ အဲဒါတွေဟာ ရှိခိုးခြင်း၊ ပူဇော်ခြင်း၊ ဆုတောင်းခြင်း၊ အခမ်းအနားကျင်းပခြင်းများနှင့် ဓလေ့ထုံးစံများဖြစ်ပါတယ်။ အဲဒီ Outer shell-ဆိုတဲ့ ပြင်ပအကာတွေက ကျွန်ုပ်တို့ ဘာသာတရားတွေကို ကွဲပြားခြားနားစေတာဖြစ်ပါတယ်။ ဒါပေမဲ့ မည်သို့ပင် ကွဲပြားခြားနားစေကာမူ ကျွန်ုပ်တို့ဘာသာတရားအားလုံးမှာ တူညီသောအတွင်းပိုင်း အနှစ်သာရ Inner Core-ဆိုတာ ရှိပါတယ်။ အဲဒါတွေက ဒါန-Charity- သီလ-Morality -သမာဓိ-The balance of the mind - ပညာ - Insight - ဆိုတာတွေပဲ ဖြစ်ပါတယ်။ အဲဒီ ဒါန, သီလ, သမာဓိ, ပညာတွေဟာ ဘာသာတရားတိုင်းရဲ့ အနှစ်သာရတွေဖြစ်ပါတယ်။ Charity-Morality -The balance of the mind – insight ဆိုတဲ့ဘာသာရေး အနှစ်သာရ Inner Core of Religion - ဟာ ကျွန်ုပ်တို့ရဲ့ ငြိမ်းငြိမ်း ချမ်းချမ်း ညီညီညွတ်ညွတ် လုံလုံခြုံခြုံ လက်တွဲနေထိုင်ကြရမဲ့ - Common Ground-ဖြစ်ပါတယ်။

အဲဒီသစ္စာတရားလမ်းကြောင်းပေါ်မှာ လက်တွဲလမ်းလျှောက်ကြမယ်ဆိုရင် ကျွန်ုပ်တို့ဘာသာဝင်အားလုံး မည်သည့်ဘာသာကိုးကွယ်သည့် မည်သည့် ဘာသာဝင်မဆို Universal Brotherhood Spirit-ကို တည်ဆောက် နိုင်ကြလိမ့်မည်-ဟုယုံကြည်မျှော်လင့်ပါတယ်။

ဒီကနေ့ ကျင်းပတဲ့ ရိုမန်ကက်သလစ် ခရစ်ယာန်ဘာသာ မြန်မာပြည်ရောက် နှစ် ( ၅၀၀) ပြည့်ပွဲသို့ တက်ရောက်လာကြကုန်သော ညီအစ်ကိုမောင်နှစ်မအားလုံး Inner Core of Religion ဆိုတဲ့- Common Ground - မှာ ငြိမ်းငြိမ်းချမ်းချမ်း ညီညီညွတ်ညွတ် လုံလုံခြုံခြုံ လက်တွဲနေထိုင်သွားကြပါစို့။ မတူညီသည့် ဘာသာရေး အကာ Outer Shell တွေပေါ်မှာ ငြင်းခုံမနေကြဘဲ တူညီသည့် ဘာသာရေး အတွင်း အနှစ်သာရ Inner Core ပေါ်မှာအားလုံး လက်တွဲ Universal Brotherhood Spirit ကိုတည်ဆောက်ကာ ပြည်ထောင်စုမြန်မာနိုင်ငံတော်ကို အားလုံး လက်တွဲဝိုင်းဝန်း စောင့်ရှောက်၊ ငြိမ်းချမ်းရေးကိုတည်ဆောက်နိုင်ကြပါစေ-ဟု ဆုတောင်းမေတ္တာပို့သ လိုက်ရပါသည်။

ဝိဇ္ဇာစရဏတရား နေရာတိုင်းမှာ ထွန်းတောက်ပါစေ။

“သီတဂူစန်းလပမာချမ်းမြသာယာရှိကြပါစေ”

သီတဂူဆရာတော် ဒေါက်တာ အရှင်ဥာဏိဿရ (Ph.D, D.Litt)

ရွှင်လန်းချမ်းမြေ့ပါစေ
သီတဂူစတား
၂၃-၁၁-၂၀၁၄
www.thesitagu.org
www.sitagustar2020.net

Sent at 8:23 PM on Sunday

Posted in: အစည်းအဝေးများ