အောင်မြင်သောနေ့ကို အမှတ်ရခြင်း

အောင်မြင်သောနေ့ကို အမှတ်ရခြင်း

စာမိတ်ဆက်
အောင်မြင်သူတစ်ယောက်က မိမိရဲ့ အောင်မြင်မှု (စာမေးပွဲ၊ စီးပွားရေး၊ အလုပ်)အတွက် အမှတ်တရ ဖြစ်စေ၍ ကောင်းမှုတစ်ခု လုပ်တယ်၊ ထို့အတွက် ဂုဏ်ပြုပို့စ်ရေးတယ်။ အရင်က စာရေးသူ၏ဆိုက်ထဲမှာပဲ မေ ၁၆ ရဲ့မွေးနေ့အတွက် တစ်သက်စာ အမှတ်တရဖြစ်စေရမည့် အရာများတွင် မွေးနေ့ကိုလဲ တစ်သက်စာ အမှတ်ရစေရမည်ဟု ရေးထားခဲ့သည်၊ နောက်တစ်ခုက နှစ်လည်အမှတ်တရမှာလဲ တစ်သက်စာ အမှတ်ရစေရမည့် အရာများထဲက သေခြင်းတရားကို အမှတ်တရဖြစ်ပုံကိုလဲ ရေးခဲ့သည်။ ယခုတော့ တစ်သက်စာအမှတ်တရ ဖြစ်စေရမည့် အရာထဲက အောင်မြင်သောနေ့ တစ်နေ့ပေါ့။

(ဒေါက်တာ အရှင်ဣန္ဒာဝုဓ သီတဂူစတားအား ဆွမ်းန၀ကမ္မ လှူစဉ်)

ဒီပို့စ်လေးက အောင်မြင်သူတွေအတွက် ရည်ရွယ်ပြီး ရေးသားခြင်းဖြစ်ပါတယ်။ သတိရတုန်း ရေးထားသဖြင့် ဘယ်သူတွေ အတွက်ဖြစ်မလဲ စောင့်ရင်းနဲ့ အတော်ကြာသွားပါပြီ။ အခုတော့ ပို့စ်အဖြစ်တင်ဖို့ အချိန်ကျရောက်လာပါပြီ။ ဘုံဘေတက္ကသိုလ်က (Vivaပြီး) ဒေါက်တာဘွဲ့ရသွားသော အရှင်မြတ်နှစ်ပါးနှင့် ကျမ်းတင် (Thesis submission) အရှင်မြတ်တစ်ပါးအတွက် ဖြစ်သွားပါသည်။ ပြီးခဲ့တဲ့ လလောက်က ရှေ့ဆင့်နောက်ဆင့် ဒေါက်တာဘွဲ့ လုံးဝပြီးသော အရှင်မြတ်နှစ်ပါးက ဒေါက်တာစန္ဒာဝရ (မုံရွာ) နှင့် ဒေါက်တာပါရမီ (ထေရ၀ါဒသာသပြု တက္ကသိုလ်)တို့ဖြစ်သည်။ ထိုဒေါက်တာ အရှင်မြတ်နှစ်ပါးက ဘုံဘေတက္ကသိုလ်အသီးသီးရှိ မြန်မာရဟန်းတော် ကျောင်းသားများအား ဆွမ်းကပ်ခြင်း ဆွမ်းအလှူများလှူခြင်းစတဲ့ ကောင်းမှုများဖြင့် သူတို့ရဲ့အောင်မြင်သောနေ့ကို အမှတ်တရဖြစ်စေကြသည်။ အလားတူပဲ ၉-၇-၂၀၁၂ နေ့က ကျမ်းတင်ပြီးသောနေ့အဖြစ် ဘုံဘေသံဃာတော်များအား ဆွမ်းဟင်းများ၊ သစ်သီဝလံများအပြင် တစ်ပါးစီလျှင် ရူပီး ၅၀၀ စီ လှူခြင်းဖြင့် သူ၏အောင်ပွဲကို အမှတ်တရဖြစ်စေသူကတော့ ဒေါက်တာဣန္ဒာဝုဓ ဖြစ်သည်။ ထိုအရှင်မြတ်သုံးပါးအား ဂုဏ်ပြုပါသည်။

အောင်မြင်သောနေ့ကို အမှတ်တရဖြစ်စေခြင်း

ဘုရားရှင်
ဘုရားရှင်များကတော့ ဒေ၀ပုတ္တမာရ် (မာရ်နတ်)၊ ကိလေသာမာရ် (ကိလေသာ-၁၀)၊ အဘိသင်္ခါရမာရ် (ပြုပြင်စီရင်ခြင်း)၊ ခန္ဓမာရ် (ခန္ဓာငါးပါး)၊ မစ္စုမာရ် (သေခြင်း) ဟူသော မာရ်ငါးပါးကို အောင်မြင်သော နေ့ကို အမှတ်တရဖြစ်သည်။ ဘုရားရှင်၏ ဘုရားဖြစ်ပြီး ထိုမာရ်ငါးပါးကို အောင်မြင်ရာ နေရာသည် အိန္ဒိယနိုင်ငံ ဗုဒ္ဓဂယာ မဟာဗောဓိညောင်ပင်ပဲ ဖြစ်သည်၊ ထိုနေရာကို ဗုဒ္ဓဘာသာဝင်တို့က အောင်မြေဟု သတ်မှတ်ထားကြသည်။ အောင်နိမိတ် အောင်အတိတ် ရချင်သူတွေကတော့ အောင်မြေကို လာရောက်နင်းကြသည်၊ အောင်မြေထဲက အုဋ္ဌ် ကျောက် သဲ ဗောဓိပင်ရွက် စသည့် အမှတ်သား တစ်ခုခုကို ရယူပြီး အမြတ်တနိုးပူဇော်ကြသည်။

ရဟန္တာ
ရဟန္တာအရှင်မြတ်များအတွက်ကတော့ ကိလေသာ အားလုံးကို နှိမ်နှင်းအောင်တော်မူတဲ့ နေ့ဖြစ်ပါတယ်၊ ကိလေသာအားလုံး အောင်မြင်သူသည် ဇိန (အောင်နိုင်သူ) ဟုဆိုနိုင်ပါသည်။ ထို့ကြောင့် ရဟန်းတော်များ အမြဲအမှတ်တရ ဖြစ်စေတဲ့ နေ့ထဲက ကိလေသာတို့ကို အောင်တဲ့နေ့တစ်ဖြစ်ပါသည်။

(ဒေါက်တာအရှင်ဣန္ဒာဝုဓ သံဃာတော်များအား ရူပီး ၅၀၀ စီ န၀ကမ္မအဖြစ် လှူစဉ်)

သာမန်လူတွေရဲ့ အောင်မြင်သောနေ့
စာရေးသူတို့လို အောင်မြင်သူတွေ သို့မဟုတ် အောင်မြင်မှု တစ်ခုခု ရရင် ထိုနေ့ကို အမှတ်တရအဖြစ် တစ်ခုခု လုပ်ကြသည်။ ထိုအောင်မြင်သော နေ့ကို ပုံစံအမျိုးမျိုးနဲ့ ပုံဖော်ကြသည်။ တချို့ကတော့ ပါတီပွဲလေးလုပ်ပြီး ရှမ်ပိန်(champagne) တွေ့ ဖွင့်ပြီး ပျော်ကြသည်၊ တချို့ကတော့ ပျော်ပွဲရွှင်ပွဲတွေနဲ့ အောင်ပွဲကို ဆင်နွဲကြသည်၊ တချို့ကတော့ အောင်မြင်သော နေ့အဖြစ် သူငယ်ချင်းတွေကို ဆိုင်မှာပဲ ဖြစ်ဖြစ် အိမ်မှာပဲဖြစ်ဖြစ် အစားအမျိုးစုံနဲ့ အောင်ပွဲကို အမှတ်တရဖြစ်စေသည်။ စာမေးပွဲအောင်လို့ပဲ ဖြစ်ဖြစ်၊ အလုပ်တစ်ခုခု အောင်မြင်လို့ပဲ ဖြစ်ဖြစ်၊ ကံကောင်း၍ ထီပေါက်အောင်မြင်တာပဲ ဖြစ်ဖြစ်၊ ပြိုင်ပွဲတစ်ခုခုကို အနိုင်ရအောင်မြင်တာပဲ ဖြစ်ဖြစ် မည်သည့်အောင်မြင်မှုမဆို အောင်ပွဲအတွက် အထိမ်းအမှတ်တစ်ခုတော့ လုပ်ကြသည်။

စာသင်တိုက်မှာနေစဉ် စာရေးသူတို့ ငယ်ငယ်က ပထမပြန်တန်း (အခြေပြုမူလတန်း၊ ပထမငယ်တန်း၊ ပထမလတ်တန်း၊ ပထမကြီးတန်း) စာမေးပွဲ ဂေဇာက်(gazette) ထွက်ပြီဆိုရင် စာသင်တိုက်ကြီးထဲက စာရေးသူတို့အဆောင်လေးမှာ အတန်းစုံ စာမေးပွဲအောင်လေ့ရှိတယ်၊ ထိုအောင်မြင်မှုတွင် ပါဝင်တဲ့ ကိုရင် ဦးဇင်းလေးတွေက တစ်ပါးလျှင် ၁၀၀ ကျပ် သို့မဟုတ် ၂၀၀ စသည် ကိုယ်တတ်နိုင်သလောက် စုပေါင်းပြီး အဆောင်နေ သံဃာ သံဃာ ၃၀ သို့မဟုတ် ၄၀ လုံးကို မွန်မြတ်တဲ့ အစားအစာ ကပ်လေ့ရှိသည်။ ကိုရင်ဘ၀ စာသင်နေရတဲ့ အချိန်သည် လာဘ်လာဘမရှိ၍ စာသင်သားများ ပိုက်ဆံ မချမ်းသာကြ၊ သို့ပေမဲ့ မိမိရှိတာလေးနဲ့ စုပေါင်းပြီး အောင်မြင်သော နေ့ကို ဒါနဖြင့် အမှတ်တရဖြစ်စေခဲ့ကြသည်။ စာရေးသူလဲ ထိုချို့တဲ့စွာနဲ့ ပါဝင်ခဲ့ရဖူးသည်။ အလားတူပဲ သာမဏေများ (အနဲစု)သာ ဖြေဆိုရတဲ့ သာမဏေကျော် စာမေးပွဲ ကိုရင်လေးများကလဲ မိမိတို့အောင်ပွဲအတွက် တတ်နိုင်သလောက်ပြုကြသည်၊ စာရေးသူပင် သာမဏေဘ၀က သာမဏေကျော် ပထမဆင့်နှင့်ဒုတိယဆင့်ကို အောင်မြင်ခဲ့သဖြင့် ၂ ကြိမ် အောင်ပွဲအတွက် ဒါနဖြင့် အမှတ်တရဖြစ်စေခဲ့သည်။ စာရေးသူ စာချတန်း (ဓမ္မာစရိယ) တန်းအောင်တော့ စာရေးသူနေတဲ့ အဆောင်က စာရေးသူတစ်ပါးတည်း အောင်သည်၊ သံဃာ ၁၄၀၀ လောက်ရှိတဲ့အထဲက စာရေးသူအပါဝင် ၅ပါးအောင်မြင်ခဲ့သည်။ အလွန်မွဲချာသော စာရေးသူမှာ စာရေးသူနေတဲ့အဆောင်ရှိ သံဃာ ၃၀ လောက်ကို ရှိစုမဲ့စုထဲက ခြစ်ခြုတ်ပြီး ခေါက်ဆွဲဆွမ်းကပ်ပြီး အောင်မြင်သောနေ့ကို အမှတ်တရဖြစ်စေသည်၊ စာရေးသူ၏ ဘုန်းကံကြီးမားတဲ့ သူငယ်ချင်းများကတော့ မိမိတို့ရပ်ရွာမှာ ဂုဏ်ပြုပွဲတွေ အကြီးအကျယ်လုပ်ပြီး အောင်ပွဲခံကြသည်၊ စာရေးသူမှာကား ထိုဘုန်းကံမရှိ၊ ရန်ကုန်မြို့ အောင်လက်မှတ်ဆက်ကပ်ပွဲကိုတောင် အမေနဲ့အစ်မသာ ပါဝင်ခဲ့နိုင်သည်၊ သူငယ်ချင်းတွေကတော့ ရဟန်းဒကာ ရဟန်းအမတွေ၊ ဆွေမျိုးတွေနဲ့ စည်စည်ကားကား တက်ရောက်ကြသည်။

စာရေးသူတို့လို စာမေးပွဲ ၀င်ကြတဲ့ အရပ်သား လူငယ်များကလဲ ၈ တန်း ၉ တန်း ၁၀ တန်းတွေမှာ အထူးအောင်ခဲ့သော် အောင်ပွဲခံပွဲလေး အမှတ်တရလုပ်ကြသည်၊ ဆယ်တန်းအောင်မြင်သူတွေကတော့ အောင်မြင်ရုံလေးနဲ့ပဲ အောင်ပွဲအတွက် အမှတ်တရ လုပ်ကြသည်၊ စာရေးသူတို့တောရွာမှာဆို ဆယ်တန်းဂေဇာက်ထွက်တဲ့ နေ့ဟာ ဘယ်သူအောင်ပွဲခံမလဲဆိုတာ မျှော်တဲ့ နေ့တစ်နေ့လို ဖြစ်နေသည်၊ ဂေဇာက်ထွက်လို့ ကျရှုံးသူတွေကတော့ မိမိရဲ့ အရှုံးပွဲအတွက် မျက်ရည်နဲ့ ရှုံးပွဲခံကြသလို အောင်မြင်သူတွေကတော့ ပြုံးပျော်စွာ ပါတီပွဲလေးတွေနဲ့ အောင်ပွဲနေ့ကို အမှတ်တရဖြစ်စေကြသည်၊ အောင်ပွဲခံကြသည်။

ကောင်းကံမှ အကြောင်းကံ
ရှေးကုသိုလ် (ကောင်းကံ) ကံကြောင့် အောင်မြင်မှုလေးတွေ အထိုက်အလျှောက်ရရှိလာသလို လက်ရှိဘ၀ အားထုတ်မှုရဲ့ ပစ္စုပ္ပန်ကံတို့ ပေါင်းစပ်လိုက်တဲ့အခါ ပိုမိုပြီး အောင်မြင်မှုတွေ ရလာခြင်းဖြစ်သည်။ ထိုအကြောင်းကောင်းကံကြောင့် ရလာတဲ့ အကျိုးကောင်းကံလေးတွေကို ဒီဘက်ဘ၀မှာ အကျိုးမများ၊ အချည်းအနှီးမဖြစ်စေဘဲ အကြောင်းကောင်းကံ ဖြစ်အောင် လုပ်ရန် မမေ့ကြဖို့ လိုအပ်သည်။

တခါက ၀ိသာခါကျောင်းအမလောင်းက ဘာသာခြား ယောက်ျားနှင့် ယောက္ခများနောက်သို့ လိုက်သွားရသည်။ တနေ့တော့ အိမ်ပေါက်ဝ ရဟန်းတော်တစ်ပါး ကြွလာတော့ ၀ိသာခါမှာ အခက်တွေ့နေသည်၊ မိမိကိုယ်တိုင်ကလဲ ရဟန်းတော်များအား မဖူးရ မလှူရရင် မနေနိုင်၊ ဒါပေမဲ့ နေရတဲ့အိမ်က ဘာသာခြားအိမ်ဖြစ်နေသည်၊ ရဟန်းတော်များအား ဆွမ်းတစ်ဇွန်းကိုမျှ မလောင်းဘူး၊ ရဟန်းကြွလာတာကို ယောက္ခမကြီးကမြင်သည်၊ အိမ်ပေါက်ဝရောက်လာတဲ့ ရဟန်းကို မြင်လိုက်တာနဲ့ မျက်နှာလွှဲသွားသော ယောက္ခမကို ၀ိသာခါက အကဲခက်နေသည်။ ၀ိသာခါက မနေနိုင်၍ ရဟန်းတော်နားသွားပြီး လက်အုပ်ကလေးချီကာ “အရှင်ဘုရား ကန်တော့ဆွမ်းပါဘုရား၊ တပည့်တော် ယောက္ခမက အဟောင်း (ပုရာဏ)ကိုပဲ စားနေသူပါဘုရား”ဟု လျှောက်ထားသည် ထိုအသံကို ကြားသွားသော ယောက္ခမကြီးသည် သူ့ကို သူ့ချွေးမက မစင် (ချီး) တွေစားပါတယ်လို့ ပြောတယ်ထင်ပြီး မျက်ထောက်တွေနီပြီး ဒေါသထွက်နေသည်။ တကယ်တော့ ၀ိသာခါက “ပုရာဏံ ခါဒတိ-အစာဟောင်းကို စားတယ်”လို့ ပြောလိုက်ခြင်းသည် ရှေးကောင်းမှုကံကိုပဲ ထိုင်စားနေတယ်၊ ကောင်းကံ အသစ်ကို မဖန်တီးဟု ရည်ရွယ်ပြောသည်။

ထို့ကြောင့် ပုရာဏံ ခါဒတိ မဖြစ်ရလေအောင် အကြောင်းကောင်ကံအသစ်အသစ်တွေကိုလဲ ဆထက်ပိုပြီး ပြုသင့်သည်။ ဒီကနေ့ ဒေါက်တာ အရှင်မြတ် ၃ ပါးတို့က မိမိ၏ ရှေးကံကြောင့်ရော ပစ္စုပ္ပန်ဘ၀၏ ကြိုးစားမှုရော ပေါင်းစပ်ပြီး ရလာတဲ့ အောင်မြင်မှုအသီးအပွင့်ကို အကြောင်းကောင်းကံအသစ် မျိူစေ့ ဖြစ်အောင် ဖန်တီးယူလိုက်တာပဲ ဖြစ်သည်။ ထိုကဲ့သို့သော အောင်မြင်မှု အဆင့်ဆင့်ကနေ တကယ့်အောင်နိုင်သူ အစစ် ဇိန ဖြစ်အောင် အားထုတ်ကြရမှာ ဖြစ်သည်။ ဇိန ဖြစ်ခြင်းသည် ဗုဒ္ဓဘာသာဝင်တို့၏ နောက်ဆုံး ပန်းတိုင်ဖြစ်သည်။

အောင်နိုင်သူ အစစ်
အောင်နိုင်သူကို ဇိန ဟုခေါ်သည်။ (အိန္ဒိယအခေါ် ဂျိန (ဂျိန်း)။ တခါက ဘုရားရှင်သည် သူရထားသည့်တရားထူးတရားမြတ်ကို ကျေးဇူးရှိတဲ့သူတွေကို အရင်ဆုံး ကျေးဇူးဆပ်မည်ဟုသော ရည်ရွယ်ချက်ဖြင့် ခရီးကြွလာရာ ဆရာတော်ခဲ့ဖူးသူ အာဠာရနှင့် ဥဒကတို့လဲ ဆုံးသွားကြပြီ။ နောက် ကျေးဇူးရှိဆုံးသူများက သူ ၆ နှစ်လုံးလုံး တရားအားထုတ်စဉ်က ပြုစုစောင့်ရှောက်ခဲ့သော ပဉ္စ၀၀္ဂီ ငါးဦးဖြစ်သည်။ သူတို့အထံအသွား လမ်းမှာ တက္ကဒွန်း ဂျိန်း (ဇိန) အမည်ခံ ဥပကကြီးနဲ့တွေ့သည်။ ဘုရားရှင်ကို မြင်တော့ သူ အံ့သြသည်၊ ဘုရားရှင်ကိုမေးခွန်းတွေ မေးသည်။ ဘုရားရှင်က ဥပက-- တကယ့်အောင်နိုင်သူဆိုတာ ကိုယ့်သန္တာန်မှာ အကုသိုလ်စိတ်တွေ ကိလေသာတွေကို အောင်နိုင်မှ ဇိနလို့ခေါ်တာ။ ငါ့ဘုရားရှင်က ထို အကုသိုလ်တွေကို အောင်ပြီးဖြစ်လို့ တကယ့်အောင်နိုင်သူ (ဇိန) ဖြစ်တယ်ဟု ပြောတော့ ဥပကကြီးသည် ခေါင်းလေး ရမ်းပြီး ပြောလိုက်ပုံက “ဟုပေယျပါဝုသော- ဖြစ်နိုင်ဖွယ်ရှိတယ်၊ ဟုတ်ချင်လဲဟုတ်မှာပါလေ” ဟုသာ။ ကိုယ့်သန္တာန်က ကိလေသာ အကုသိုလ်စိတ်တွေ နှိမ်နှင်းအောင်နိုင်သူများကို ဇိန-တကယ့်အောင်နိုင်သူအစစ်များ ဖြစ်ကြသည်။ ဘုရားရှင်တို့ကိုတော့ အနန္တဇိန ဟုခေါ်သည်။

အောင်မြင်သောနေ့ကို အမှတ်တရဖြစ်စေသော အားဖြင့် ကောင်းမှူပါရမီများ ပြုကြသည်။ ကောင်းမှုပါရမီများဖြင့် အောင်ပွဲခံသည်။ ထိုအောင်ပွဲမှ သည်တကယ့်အောင်ပွဲခံအဖြစ် ဇိနဘွဲ့ခံ ရသည်အထိ မျှော်မှန်း တက်လှမ်းနိုင်ကြပါစေကုန်သတည်းးးးးးးးးးးးးး။

ဒေါက်တာအရှင်မြတ်များအား မိမိ တတ်နိုင်သော ဤမဖြစ်စလောက်ပို့စ်လေးဖြင့် ဂုဏ်ပြု (Congratulation!!!!!) လိုက်ပါသည်။

ရွှင်လန်းချမ်းမြေ့ပါစေ
သီတဂူစတား
၁၁-၇-၂၀၁၂

Posted in: ဆောင်းပါး