ဝါဆိုဆရာတော်ကြီး သြ၀ါဒ (ဂယာ)

ဝါဆိုဆရာတော်ကြီး သြ၀ါဒ
၁-၁၂-၂၀၁၁ ည ၇ နာရီ

ကျောင်းသားများ ကျောင်းဆောင်
ဗုဒ္ဓဂယာ၊ အိန္ဒိယ

ရှေးဦးစွာ မဂဓတက္ကသိုလ်ရှိ ကျောင်းသားများ ကန်တော့၊ သီတဂူဆရာတော်ကြီးက ဆုပေး။
ထို့နောက် အိန္ဒိယနိုင်ငံ တက္ကသိုလ် အသီးအသီးတွင် ပညာသင်ကြားနေကြသော ရဟန်း သီလရှင် ၅၂၈ ပါး ရှိကြောင်း ကျောင်းသားများအဖွဲ့ လက်ရှိ ဥက္ကဋ္ဌဆရာတော် ဘဒ္ဒန္တဇ၀နက ကြော်ငြာသည်။
ထို့နောက် သီတဂူဆရာတော်က ရွှေကျင်သာသနာပိုင်ဆရာတော်ကြီး စကားနဲနဲ ပြောပေးရန် လျှောက်ထားသည်၊ ကျောင်းသားများကိုလည်း ‘‘ဆရာတော်ကြီး၏ အဆုံးအမ နာကြားခွင့်ရခြင်းသည် မင်းတို့တတွေ သိပ်ကံကောင်းတယ်’’ဟု အမိန့်ရှိသည်။ ထို့နောက်မှာတော့ ရွှေကျင်သာသနာပိုင် သက်တော်ရှည် ၀ါဆိုဆရာတော်ကြီးက သြ၀ါဒပေးသည်။

ရွှေကျင်ဆရာတော်နှင့် မဂဓတက္ကသိုလ်ကျောင်းသားများ

ဝါဆိုဆရာတော်ကြီး၏ သြ၀ါဒ
ဒါနအမျိုးမျိုး

သီတဂူဆရာတော်နှင့်၊ ကျောင်းအမကြီးများ၏ ပညာဒါန၊ ပညာပါရမီ ကုသိုလ်ပွဲကို နောက်ကနေပြီး လိုက်ကြည့်ရတာ သြ၀ါဒ ပေးစရာ သိပ်မလိုပါဘူး။
နောက်ကနေကြည့်ပြီး ၀မ်းသာတာပါ။ ၀မ်းမြောက်ပါတယ် သဘောတူပါတယ်။ သဘောတူတယ်ဆိုတာ နောက်ကနေ လိုက်ပြီး သဘောတူတာ ဘုန်းကြီးတို့ နဲနဲ ချောင်တာပေါ့၊ သီတဂူလိုတော့ တာဝန်မရှိဘူးပေါ့၊ နောက်ကနေ သဘောတူတယ်ဆိုတာလဲ ဒါနပဲ။ ဒါနဆိုတာ ကိုယ်တိုင် သာဟတ္ထိက ဆိုတာရှိတယ်။ သူတပါးကို တိုက်တွန်းတာ အာဏတ္တိကဒါန၊ သီတဂူဆရာတော်တို့ကတော့ သာဟတ္ထိကဒါနပဲ။ ၀ဏ္ဏဘာသနာဆိုတာ ရှိသေးတယ်၊ ၀ဏ္ဏဘာသနဆိုတာ ချီးမွမ်းတာ၊ သီတဂူကို ချီးမွမ်းတာ သီတဂူအလှူကို ချီးမွမ်းတာလည်းပဲ သီတဂူအလှူလှူသလို ကိုယ်က အလှူရှင်ထဲ ပါသွားတာပေါ့။ နောက်ကနေ ချီးမွမ်းတာ အလှူရှင် အစစ်မဟုတ်ပေမဲ့ အချောင် အလှူရှင်ဖြစ်တယ်။ အလှုရှင် အချောင်ပေါ့ဗျာ (သံဃာများ ရယ်သံ)
သမနုညဆိုတာ ရှိသေးတယ်၊ သမနုညဆိုတာ စိတ်တူတယ် သဘောတူတယ် သာဓုခေါ်တယ်။ အဲဒီတော့ ဒို့က သာဟတ္ထိက အာဏတ္တကဒါန သမားတော့ မဟုတ်ဘူး၊ ၀ဏ္ဏာဘာသန ဒါန သမားတော့ ပါတယ် (ရယ်၍ ပြော)။ သမနုညထဲလဲ ပါတယ်၊ သီတဂူအလှူလှူတဲ့ အလှူကို နောက်ကနေ လိုက်ပြီး ချီးမွမ်းတော့ သီတဂူအလှူနဲ့ ကုသိုလ် အတူတူပဲ၊ ဒို့လည်း ကုသိုလ်ရတာပဲ အချောင် ကုသိုလ်ရတာပဲ (ရယ်ပြော)။ သမနုည-သဘောတူ။

ကျောင်းသား ရဟန်းတော်များ

အဲဒီတော့ ကျောင်းသား ကျောင်းသားဆိုပေမဲ့ ရဟန်းတော်တွေပါ၊ သာသနာ့ဝန်ထမ်း ရဟန်းတော်တွေပဲ၊ သာသနာ့ဝန်ထမ်းတွေ ဘာလုပ်ကြတာလဲ မေးရင် ပညာသင်တာပဲ။ ပညာသင်တာဆိုရင် ပရိယတ်လား ပရိပတ်လား မေးရင်တော့ ပရိယတ်ထဲပါတယ်၊ ဦးဇင်းတို့က ကိုယ့်ကိုယ်ကို အထင်မသေးကြနဲ့၊ သဒ္ဒါ သင်ဂြိုဟ် သင်မှ ပရိယတ်မဟုတ်ဘူး၊ မာတိကာ ဓာတုကထာတွေ သင်မှ ပရိယတ် မဟုတ်ဘူး၊ ဦးဇင်းတို့ အခု သင်နေတာ ပရိယတ်တွေပဲ။

ပရိယတ်မှ ပရိပတ်

ပရိယတ်ဆိုတာ ဘယ်သွားဖို့လဲ ပရိပတ်သွားဖို့ပဲ၊ အချိန်ရှိခိုက်လုံးလစိုက်ဆိုတာလိုပဲ၊ အခု အချိန်ရှိတုန်းမှာ သဒ္ဒါ သင်ဂြိုဟ်တွေတင် မဟုတ်ဘဲနဲ့ စွယ်စုံ ပရိယတ္တိကျအောင် စနစ်ကျကျသင်၊ ပညာတွေ တတ်အောင်သင်၊ မိဝေး ဖဝေး ဒီလာပြီးတော့ သင်ရတာ၊ အဲဒါ သာသနာ စိတ်တော့ လက်မလွတ်နဲ့၊ ဒီသာသနာတော်ကြီးဟာ ငါ့အတွက် ပေါ်လာတာလို့ အောင့်မမေ့နဲ့၊ ဘုရားသာသနာတော် ဖြစ်တယ်၊ ဘုရားသာသနာတော်အတွက် ငါဖြစ်လာတာ၊ ဘုရားသာသနာတွေအတွက် ငါ ရဟန်းတော်တစ်ပါးအနေနဲ့ လူတစ်ယောက် ဖြစ်လာတယ်ဆိုတော့ သာသနာတော်ကြီး ကြီးပွားအောင်၊ ဒို့တတွေ ပညာတွေ တတ်အောင်သင်မယ်၊ ပညာတွေ တတ်ရင် ဘယ်လိုကြီးပွားအောင် လုပ်မလဲ၊ မေတ္တာရပ်ခံ တောင်းပန်ချင်တာက အဲဒါ မြန်မာပြည် ပြန်ရောက်ပြီးတော့ စာတွေ ဘာတွေ ပြန်ချ၊ စာချတဲ့ နေရာလိုက်ရှာ၊ ဒီလိုပညာတွေကို ဘယ်လို အသုံးချမလဲ ဆိုတာကို ဟိုဟို ဒီဒီ စိတ်မကူးပါနဲ့၊ ဖြစ်ချင်တဲ့ အခါ ဖြစ်သွားမှာပေါ့။ အခြေအနေ ပေးလို့တော့ ဖြစ်ချင် ဖြစ်လာမှာပေါ့။ ကျောင်းတော့ မှန်မှန် တက်ကြ၊ စာတော့ အံကြ လုပ်စရာရှိတာ လုပ်ကြ၊ ဟိုဟာ ဒီဟာလုပ်မယ် စိတ်မကူးကြနဲ့။
(ငါသည် သာသနာအတွက် ဖြစ်လာတာ၊ သာသနာသည် ငါ့အတွက် ဖြစ်လာတာမဟုတ်)

မနေနိုင်လူထွက်

မင်းတို့ ကျောင်းပေါက် ထွက်သွားလို့ ကလေးမလေး တစ်ယောက်က ကိုယ့်တော့ကို မရရင် တပည့်တော်မ သေရပါတော့မယ် ဆိုရင်တော့ လူထွက် ယူလိုက်ပေါ့ (သံဃာများ ရယ်သံ)။ မယူနိုင်ရင် သူနဲ့ မတွေ့အောင် နေပေါ့၊ သူနဲ့ မတွေ့မခြင်းကတော့ စာအံရမှာပဲ (သံဃာများ ရယ်သံ)၊ အဲဒီ အခြေအနေလေးတွေကို နဲနဲ သိဖို့ အရေးကြီးတယ်၊ ဟိုစိတ်ကူး ဒီစိတ်ကူး မကူးနဲ့၊ ငါဟာ သာသနာအတွက်ပဲ၊ ငါဟာ သာသနာအတွက် ပေါ်လာတာပဲ၊ သာသနာသည် ငါ့အတွက် ဒီလိုမဟုတ်ဘဲနဲ့ ငါသည် သာသနာအတွက်၊ ငါတည်းဟုသော အကြောင်းကြောင့် သာသနာတော်ကို ကြီးပွားအောင် လုပ်မယ်လို့ စိတ်ကူးပြီးတော့ သင်ကြပါ၊ ပရိယတ်ပါ၊ ပရိယတ်မို့လို့ သီတဂူဆရာတော်က အားပေးနေတာပါ၊ သီတဂူဆရာတော်လည်း နောက်ဘ၀ သံသရာ ဘ၀တိုင်းဘ၀တိုင်း ပညာတတ်ဖို့ ပညာတွေ အထက်တန်းကျဖို့ အကျိုးလိုလားပြီးတော့ လှူဒါန်းတာ၊ အဲဒါ ခုနကပြောတဲ့ ၀ဏ္ဏဘာသန ဒို့က အချောင် ကုသိုလ်ရနေတာ။ သမနုည-စိတ်တူတယ် သဘောတူတယ်၊ သီတဂူလှူတဲ့ အလှူကို ဒို့က သဘောတူတယ် ၀မ်းမြောက်တယ်၊ အလှူ့ရှင်ထဲ ပါသွားတာပဲ၊ အလှူရှင်နဲ့တူတာတော့ သီတဂူလုပ်တဲ့ အလုပ်တွေကို ဒို့က နောက်ကနေ ၀မ်းမြောက် ၀မ်းသာတယ်၊ အားပေးနေတယ်၊ သီတဂူအစား သီတဂူရဲ့ ကိုယ်စား ဒို့က မင်းတို့ကို သြ၀ဒါပေးတာ၊ ဒါ ပရိယတ်အလုပ်ပါ၊ ဒို့ကတော့ ထောက်ခံတယ်။

ကိုယ့်စာပေကို ချစ်ပါ

ဦးဇင်းတို့ သင်ကြားနေတဲ့ ပရိယတ်ကို ထောက်ခံတယ်၊ သင်ပါ သင်ကြားသင့်ပါတယ်၊ သင်ကောင်းပါတယ် တတ်ကောင်းပါတယ်၊ တတ်ပါ၊ ဘာသာ တစ်ခုတည်း မဟုတ်ဘဲနဲ့ ဘယ်နှစ်ခုတတ်တတ်၊ အင်္ဂလိပ်တင် မဟုတ်ဘူး ကုလားလဲ တတ်အောင်သင်ခဲ့၊ ကုလားစကားလဲ တတ်အောင်သင် နောက် ကုလားနဲ့တွေ့ရင် သြ၀ါဒပေးရအောင် တရားဟောရအောင် (သံဃာများ ရယ်သံ)။ ဒီအထဲ တရုပ်လဲ တတ်ရင် ကောင်းတာပဲ၊ ပြင်သစ်စကားလဲ ကောင်းတာပဲ၊ ချစ်တာတော့ ကိုယ့်စာပေကို ချစ်ပါ။ ကိုယ့်စာကိုယ့်မျိုး ကိုယ့်သာသနာကို ချစ်ပါ။

‘‘ကိုယ့်မျိုး ကိုယ့်စာ၊ ကိုယ့်မြို့ရွာ ကိုယ်ပါ ချစ်၍ မြတ်နှိုးမယ်’’

ကိုယ့်မျိုးကို ချစ်ပါ၊ ကိုယ့်စာကို ချစ်ပါတဲ့၊ အဲဒါ မြန်မာရက်စွဲလေးတွေ မမေ့စေနဲ့၊ အရှင်ဘုရားတို့ မြန်မာ ရက်စွဲ ချစ်ပါ၊ သုံးတာတော့ ဘာပဲ ဖြစ်ဖြစ် သုံးပါ၊ မြန်မာနိုင်ငံမှာ ရေဒီယိုတွေ ဘာတွေမှာ ကြော်ငြာတယ်၊ သတင်းစာတွေမှာ ထွက်နေတယ်၊ မြန်မာရက်စွဲလဲ ပါတာပဲ။ အင်္ဂလိပ် ရက်စွဲလဲ ပါတာပဲ၊ ကမ္ဘာသုံးတဲ့ ရက်စွဲ ပါရမှာပေါ့။ တဘက်သက်တော့ မလုပ်ပါနဲ့၊ အင်္ဂလိပ်စကားလေး နဲနဲတတ်တော့ ခေတ်မီတယ်ပေါ့၊ တချို့ အင်္ဂလိပ်စကား ဘာမတတ် ညာမတတ်နဲ့ အလကားနေရင်း သူတို့ကို သူတို့ ခေတ်မီနေတယ် ထင်နေယ်၊ ရှိသေးတယ် ဦးဇင်းလေးတစ်ပါး မန္တလေးမှာ တွေ့ရတယ်၊ ဘယ်လမှန်းမသိ၊ တခူးလမှန်းမသိ ကဆုန်လမှန်းမသိ ၀ါဆိုလမှန်းမသိနဲ့ သူများဝါဆိုလို့သာ ၀ါဆိုလပြည့်ကျော် ၁ ရက်နေ့ ၀ါဆိုလိုက်ရတယ် (သံဃာများ ရယ်သံ)၊ သူများ ပ၀ါရဏာပြုလို့သာ သီတင်းကျွတ်လပြည့် ပ၀ါရဏာပြုလိုက်ရတာ၊ ဘာမှ မသိဘူး။
ဦးဇင်းလေးတစ်ပါး ငါ့ဆီလာပြီး ရဟန်းခံလာပင့်တယ်၊ ‘‘ဆရာတော်ဘုရား၊ တပည့်တော် ရဟန်းခံမယ်မလို့ ဆရာတော် လိုက်ပြီး ချီးမြောက်ပေးပါဦးဘုရား၊ ဘယ်တော့လဲ မေးတော့ ဖေဖေ၀ါရီလ ၂ ရက်တဲ့ (သံဃာများ ရယ်သံ)၊’’ ဖေဖော်ဝါရီလတွေ ဘာတွေ ငါမသိဘူးကွ၊ ငါ ပြန်တွက်ကြည့်ရအုန်းမှာ၊ ပြောပေါ့ မြန်မာလို၊ အဲတော့မှ တပည့်တော် ပြန်တွက်အုန်းမယ်ဘုရားတဲ့။ ငါ့ပင့်တော့ ဖေဖော်ဝါရီလ ၂ ရက်တဲ့၊ အဲဒါ မကောင်းဘူး၊ နဲနဲ ကျော်နေတယ်၊ နဲနဲ လွဲနေတယ်၊ အမှန်ကတော့ ဖေဖော်ဝါရီလ ၂ရက်တို့ ၃ ရက်တို့ နောက် သိရမှာ၊ ကိုယ့်မြန်မာလ ရက်ကိုတော့ အရင် ဦးအောင် လုပ်ထားရမှာပေါ့။ ကိုယ့်စာကိုတော့ ချစ်ပါ၊ တတ်အောင်သင်ပါ၊ ကိုယ့်စာကို တတ်မှ ဘာစာဖြစ်ဖြစ် တတ်အောင်သင်ပါ၊ တတ်လေ ကောင်းလေပဲ၊ မင်းတို့ အိန္ဒိယကနေ ပြန်လာတယ်၊ မြန်မာပြည်ရောက်တယ်၊ ဘာတွေ တတ်လာတယ်၊ တပည့်တော်ဘုရား အမ်အေ (M.A) တန်းအောင်ခဲ့တယ်ဘုရား၊ ၀မ်းသာတယ်၊ အာ-တပည့်တော် ပီအိပ်ချီ(Ph.D) ဘွဲ့တွေ ရခဲ့တယ်ဘုရား၊ ၀မ်းသာတယ်၊ ဘာလုပ်မှာလဲဆိုတော့ ကိုယ့်ကိုယ်ကို စဉ်းစားပေါ့၊ မြန်မာလူမျိုး ဖြစ်တယ်၊ မြန်မာဘုန်းကြီးဖြစ်တယ်၊ မြန်မာနိုင်ငံမှာ မိမိတို့ကျောင်း အသီးအသီး ရှိကြတယ်၊ ကိုယ့်မိခင်ကျောင်းကို ပြန်ကြည့် ဘာလိုတယ်၊ စာဝင်ချရမယ်၊ စာလုပ်မယ် ဘာလုပ်မယ်။

ပရိယတ်မှ ဈေးဆိုင်သို့

သီတဂူဆရာတော့်တပည့်တွေလဲ ပြည့်လို့၊ ဒေါက်တာဘွဲ့တွေ ဘာတွေရတာ သီတဂူရဲ့ အစီးအစဉ်အတိုင်း စာတွေချနေရတယ်၊ စာတွေ ပြနေရတယ်၊ အဲဒါ သိပ်ကောင်းတာ၊ ပရိယတ်က ပရိယတ်နယ်ပယ်က မထွက်ဘူး၊ အဲဒီက ထွက်ရင် ပဋိပတ်ကို ကူးရမှာ၊ ပရိယတ်နယ်ပယ်က ထွက်ပြီးတော့ ဒီပြင်နယ် ကူးသွားရင် မကောင်းဘူး၊ ပရိယတ်မှ ပဋိပတ္တိသို့၊ ပရိယတ်မှ ဘယ်ရပ်ကွက်သို့ ဘယ်ဈေးဆိုင်သို့ (သံဃာများ ရယ်သံ)၊ ဆိုက်ကားနှင်းမည့်သူကလဲ ဘယ်ဆိုက်ကားသို့ (သံဃာများ ရယ်သံ)။ ဒို့က ပရိယတ်ထဲမှာဆိုတော့ ပဋိပတ်ထဲကို တက်ရမှာ၊ အဲဒါလေးတွေ သတိထားပြီး ကြိုးစားကြဖို့ပဲ။ အဲဒါ ‘‘ကိုယ့်မျိုး ကိုယ့်စာ၊ ကိုယ့်မြို့ရွာ ကိုယ်ပါ ချစ်၍ မြတ်နှိုးမယ်’’ တဲ့၊ ကိုယ်တည်းဟုသော အကြောင်းကြောင့် ဆရာသမားတွေ နာမည် မပျက်အောင်၊ သီတဂူကိုလဲ အားပေးရင်း သီတဂူရဲ့ ဂုဏ်ကျေးဇူးတွေကို အာရုံပြုပြီး ကြိုးစားကြ။ ပရိယတ်လုပ်နေတာ၊ တနေ့ကျရင် စာပြန်ချရမယ်၊ ဘယ်လိုသာသနာပြုမယ်၊ ကိုယ့်ရွာကို ပြန်ကြည့်၊ ကိုယ့်မြို့ကို ပြန်ကြည့်၊ ကိုယ့်စာသင်တိုက်ကို ပြန်ကြည့်၊ ဘာလိုတယ် ညာလိုတယ် အဲဒါတွေ သတိထား။ အခြေအနေကတော့ အခြေအနေရပေါ့၊ အခြေအနေမှ မရောက်သေးဘူး စောစောကထဲက အချိန်ကုန်လာတာ မကောင်းဘူး။

ဗိုလ်ချုပ်နှင့်သမီးရည်းစား

ဗိုလ်အောင်ဆန်း ပြောသလိုပဲ၊ ဗိုလ်ချုပ်အောင်ဆန်းက သမီးရည်းစားထားတဲ့ အချိန်တွေ အကုန်မခံဘူး၊ နောက်တော့ ဆေးရုံတက်ရင်းနဲ့ ဒေါ်ခင်ကြည်နဲ့ တွေ့လို့ တစ်ယောက်နဲ့ တစ်ယောက် လက်စွပ်ခြင်း လဲပြီး လင်မယားဖြစ်သွားတာ (သံဃာများ ရယ်သံ)။ သမီးရည်းစား ဖြစ်တဲ့ အချိန်လေး ဘာမှ မရှိလိုက်ဘူး၊ သမီးရည်းစား ဖြစ်တဲ့ အချိန် တစ်ရက်နှစ်ရက်ပဲ၊ တစ်ယောက်နဲ့ တစ်ယောက် အကြောင်းပါရမီဆက်သွားကြတာ။ အခု သူမွေးလာတဲ့သူတွေက လူစွမ်းကောင်းတွေချည်းပဲ၊ ဒေါ်အောင်ဆန်းစုကြည်ဆိုလဲ ကမ္ဘာကျော်နေတာ၊ နိုဘယ်လ်ဆုတွေ ရတာ။ အဲဒါ ဗိုလ်ချုပ်အောင်ဆန်းလို လုပ်။

ဒါမှမဟုတ် အလကားနေမည့်အစား ဗိုလ်ချုပ်အောင်ဆန်းက အင်္ဂလိပ်ကို တိုက်တယ် ခိုက်တယ်ဆိုတာ တိုက်တာ ခိုက်တာ မဟုတ်ဘူး၊ အင်္ဂလိပ်ကို ကန့်ကွက်တာ၊ အင်္ဂလိပ်က မဆီမဆိုင် သခင်လုပ်ပြီးတော့ မြန်မာကို ကျွန်လုပ်ပြီးတော့ကို နေလို့၊ မြန်မာကို ကျွန်အဖြစ် အကြာကြီးမလုပ်ပါနဲ့ ခင်များတို့ကို ကျုပ်တို့ ကန့်ကွက်တယ်၊ ဒါ ကန့်ကွက်တာ။ ကန့်ကွက်တာ တမျိုး တိုက်တာခိုက်တာက တမျိုး၊ အဲဒါ သေနပ်ကိုင်ပြီးတော့ တိုက်တာ ခိုက်တာ မလုပ်ချင်ဘူး၊ တက္ကသိုလ်မှာလဲ သူ့အပေါင်းအသင်းတွေကို အင်္ဂလိပ်စကားတတ်အောင် သင်စေတယ် သူကိုယ်တိုင်ကလဲ တတ်အောင်လုပ်တယ်၊ ဒို့က အင်္ဂလိပ်ကို တော်လှန်ဖို့ အင်္ဂလိပ်စကား တတ်မှ ဖြစ်မယ်၊ ဒါ့ကြောင့် ဘာဖြစ်ဖြစ် တတ်ရင်ကောင်းတယ်။ အင်္ဂလိပ်စကား တတ်အောင်သင်၊ တိဗတ်က ဦးဇင်းတွေ မနက်ကလာလို့ အဲဒါပြောတယ်၊ တရုပ်ကို တိုက်တယ်ခိုက်တယ် မလုပ်နဲ့ပေါ့ တရုပ်တွေကို ကိုယ့်တိုင်းပြည်ကို လာမအုပ်ချုပ်အောင် ကန့်ကွက်ပေါ့လို့။ ကန့်ကွက်နိုင်အောင် တိဗက်စာ များများတတ်အောင် လုပ်ရတယ်၊ တရုပ်စာကို များများတတ်အောင် လုပ်ရတယ်လို့၊ အဲဒါ စာများများတတ်ဖို့ အရေးကြီးတယ်။ ဘာစာတတ်တတ် ကောင်းပါတယ်၊ ပညာတွေတတ်တာ ကောင်းပါတယ်ဆိုတဲ့ အကြောင်းကို ပြောတာပါ။ ဒါ့ကြောင့် ကိုယ့်မျိုး ကိုယ့်ဘာသာ ကိုယ့်သာသနာကြီးပွားအောင် လုပ်ပါ။

တပ်မတော်သည် တိုင်းပြည်အတွက်

မန္တလေးမှာဆိုပြောတယ် ‘‘တပ်မတော်သည် နိုင်ငံအတွက် ဖြစ်တယ်၊ နိုင်ငံတော်သည် တပ်မတော်အတွက်ဆို သွားရော’’လို့ အဲဒါပြောတယ်၊ (သံဃာများ ရယ်သံ)။ တပ်မတော်သည် ထင်ရာလုပ်တော့မှာလေ၊ (သံဃာများ ရယ်သံ)။ ငါလည်း အစိုးရတွေ ဘာတွေ ကြားအောင် ပြောတာ။ တပ်မတော်သည် ဘာလဲ မင်းတို့သိတဲ့အတိုင်း ကတ္တားလေးက အလွန်အရေးကြီးတယ်၊ တပ်မတော်သည် တိုင်းပြည်သည် ငါသည် အဲဒီကတ္တားလေးက တော်တော် အရေးကြီးတယ်။

အမှန်ကတော့‘‘ တပ်မတော်သည် တိုင်းပြည်အတွက် ဖြစ်ရမယ်၊ တိုင်းပြည်သည် တပ်မတော်အတွက် မဟုတ်ဘူး’’ ထို့အတူပဲ သာသနာတော်သည် ငါ့အတွက်မဟုတ်၊ ငါသည် သာသနာအတွက်၊ သာသနာတော် ကြီးပွားအောင်၊ ငါ့မိခင်တိုက်ပြီးရင် တိုးတက်ပြီးရင် ကိုယ့်ရွာ ကိုယ့်မြို့ ပြန်ပြီး သာသနာပြုမယ်၊ ဘယ်သူတွေ မျက်စိပွင့်အောင် ဘယ်လိုပြောမယ် ဘယ်လို ဆိုမယ်၊ ဘယ်လို စည်းရုံးမလဲ။

ဘုန်းကြီးခေါင်းဆောင်မှ

မြန်မာနိုင်ငံမှာ မင်းတို့ သိတဲ့အတိုင်းပဲ တောရွာတွေက ဘုန်းကြီးတွေ မပါရင် မဖြစ်ဘူး၊ ဘုန်းကြီးတွေ ခေါင်းဆောင်မှဖြစ်တာ၊ လူတွေ တစ်ယောက်နဲ့ တစ်ယောက် မယုံကြဘူး၊ တစ်ယောက်နဲ့ တစ်ယောက် ယုံကြည်စရာ သိပ်မရှိဘူး (သံဃာများ ရယ်သံ)။ ဂေါပကတွေ ဘာတွေဖွဲ့ ဘာဖွဲ့ ညာဖွဲ့နဲ့ တော်ကြာ ပိုက်ဆံတွေပျောက်နဲ့ (သံဃာများ ရယ်သံ)။ ရွာတစ်ရွာရောက်တော့ မေးကြည့်တယ်၊ မင်းတို့ရွာမှာ ဘုရားခန်းတွေ ဘုရားကျောင်းတွေမှာ ဘယ်လို လုပ်ကြလဲ၊ ဂေါပကတွေ ဘာတွေ မရှိဘူးလား မေးတော့၊ တပည့်တော်တိုဆီ ဂေါပကတွေ မရှိဘူးဘုရား၊ ဂေါပကတွေ နဂိုကတော့ ရှိတယ်ဘုရားတဲ့၊ အခု ဘာဖြစ်ကုန်လဲ မေးတော့ ဂေါပကတွေက ဂေါပကုတ်တွေ ဖြစ်ကုန်ပြီတဲ့ (သံဃာများ ရယ်သံ)။ လူတွေက ဘုန်းကြီးတွေကို အားကိုးနေတာ၊ ဦးဇင်းတွေ ခေါင်းဆောင်နေရတာ။

နိဂုံးချုပ်

ဦးဇင်းတို့လဲ ဒီလာနေကြရတာ ပညာတတ်အောင် သင်ဖို့၊ ပရိယတ်တတ်အောင် သင်ဖို့၊ ပရိယတ္တိကနေ ပဋိပတ္တိသို့ သွားဖို့၊ ငါသည် သာသနာ့အတွက် ဖြစ်ဖို့ ငါ့ရပ်ရွာ ကောင်းစားဖို့၊ ငါ့မြို့ ကောင်းစားဖို့၊ ငါ့မိခင် စာသင်တိုက်ကြီး ကောင်းစားဖို့၊ ငါ ဓမ္မာစရိယ အောင်ခဲ့တဲ့ နေရာ၊ ငါ ပထမကြီး အောင်ခဲ့တဲ့ နေရာ၊ ဘာလိုနေလဲ၊ ငါပြန် စာချရမယ် စာသင်ပေးရမယ် ဒီလို စိတ်တွေ ထားပြီးတော့ ပြစ်မထားဖို့ ကိုယ့်ဘ၀တစ်သက်တာ ကိုယ့်ဘ၀ကို မမေ့ဖို့၊ ကိုယ့်ရွာက ဆရာသမားတွေ ကိုယ့်မိဘ ကိုယ့်အမျိုးတွေကို အားကိုးပြိးတော့ ဒီလာကြတာ၊ သီတဂူက အဲဒီကိစ္စမှာ လမ်းဖြောင့်အောင်လို့ လမ်းဖြောင့်သွားရအောင်လို့ ထောက်ပံ့တာ။ အဲဒါ ယုံကြည်ချက်ချပြီး ကိုယ့်အတွက်ရော သာသနာတော်ကြီး အတွက်ပါ ကောင်းစားအောင် သာသနာအတွက် ကြိုးစားအောင် သာသနာတော်ကြီး တိုးပွားအောင် ကြိုးစား အားထုတ် ဆောင်ရွက်နိုင်ကြပါစေကုန်သတည်း။။။။။။

(သံဃာအားလုံး ရဲ့ သာဓုသံ)

မှတ်တမ်းတင်သူ ။ ။ အသံဖိုင်ကို သီတဂူစတားက စာအဖြစ်ရောက်အောင် စာစီသည်၊ သီတဂူဆရာတော်ကြီး သြ၀ါဒ လာပါဦးမည်။

ရွှင်လန်းချမ်းမြေ့ပါစေ
သီတဂူစတား
၂၀-၁၂-၂၀၁၁

Posted in: သြ၀ါဒ