ဘုန်းဘုန်း အရှင်ကောဝိဒသိရီ သို့

ဒီ မေးထားတဲ့ မေးခွန်းကိုတော့ အဖြေနဲ့တကွ မေးသူထံပို့ပြီး ဆွေးနွေးပြီးသားဖြစ်သည်၊ သူလဲ ကျေနပ်သွားသည်၊ လောကမှာ ဖြစ်တတ်သည့် သဘောပါလားဆိုတာ အတွေးတစ်ခုလဲ ရနိုင်ကောင်းပါသည်၊ ထိုအတွက် စာရေးသူ၏ပို့စ်ထဲမှာ ဖြစ်တတ်သည့်သဘာဝကို ပြသော ရဟန်းတော်နှင့် အမျိုးသမီး အမည်ရှိ ပို့စ်လည်း ရှိပြီးသားဖြစ်ပါသည်။ ပို့စ်အဖြစ် တင်ရကောင်းမလားဆိုတာကိုတော့ အကြိမ်ကြိမ် အခါအခါ စဉ်းစားခဲ့သည်၊ ဘယ်သူ့ကိုမှ ထိခိုက်စရာမပါသဖြင့်၎င်း၊ အဖြေကို ဖတ်လိုက်ရခြင်းကြောင့် ဗဟုသုတတစ်ခု ရနိုင်သည်ဟု ယူဆရသောကြောင့်၎င်း တင်လိုက်ရပါသည်။

======

ဘုန်းဘုန်း ကောဝိဒသိရီ ဘုရား
တပည့်တော်မသည် ဘုန်းဘုန်း ဧ။် သီတဂူစတား Web Site ကို အမြဲတမ်း ဖတ်ရှု လေ့လာသော အရှင် ဘုရား ဧ။် ဘလော့ ပရိတ်သတ် တယောက်ပါ ဘုရား။ ဘုန်းဘုန်းကို မေးစရာ မေးခွန်းလေးများ ရှိနေပါ သဖြင့် အီးမေးရေးရခြင်း ဖြစ်ပါသည် ဘုရား။ ဦးစွာ ပထမ တပည့်တော်ဧ။် အရေး အသားထဲတွင် အမှားပါခဲ့ပါက ရိုသေစွာ တောင်းပန်အပ်ပါသည် ဘုရား။


တပည့်တော်မသည် စင်ကာပူမှာ နေ၍ အလုပ်လုပ်ရင်းဖြင့် မိဘများကို ကျေးဇူးဆပ်နေပါသည်ဘုရား။ တပည့်တော် မတို့ စင်ကာပူမှာ နေသည်မှာ အရှင်ဘုရားလဲ သိပါလိမ့်မည်ဘုရား။ တအိမ်လုံး ငွေ ကုန်ကြေး ကျခံကာ မငှားဘဲနဲ့ တစ်ခန်းလျင် ၂ ယောက် သို့မဟုတ် ၃ ယောက် မိန်းခလေးများ စု နေကြပါသည် ဘုရား။ ထိုသို့နေထိုင်ကြသည့် အအခါ တဦးကိုတဦး လေးစား၍သော်လည်းကောင်း ကိုယ်ချင်းစာ၍သော် လည်းကောင်း အဆင်ပြေအောင်ကြိုးစား၍ နေကြ ရပါသည်ဘုရား။

ယခု တပည့်တော်မ နေထိုင်သည့် အခန်ုးမှာ အနည်းငယ် နေသာ ထိုင်သာ ရှိပါသဖြင့် အိမ်ခန်း ငှားခ သက်သာစေရန် တခန်းတည်းမှာ မိန်းခလေး ၄ ယောက် နေပါသည်ဘုရား။ ထိုသို့ နေထိုင်ကြသည်မှာ တစ်လ မပြည့်ခင်မှာပင် အခန်းထဲမှ အခန်းဖော် အမျိုးသမီးမှာ သူဧ။် အမျိုး ဦးပဇင်း ဆိုသူနှင့် ညတိုင်း ဖုန်း ပြော, Gtalk ပြောသည်မှာ ကျန်သည့် အခန်းဖော်များ အားလုံး အနှောက်အယှက် ဖြစ်ကြရပါသည်ဘုရား။
ဦးပဇင်း ဆိုသည့် ဘုန်းကြီးသည် သိရီလင်္ကာသို့ မာစတာဘွဲ့ ယူရန် ဆိုလား ဒေါက်တာဘွဲ့ ယူရန်ဆိုလား ကျောင်းသား အဖြစ်နှင့် ရောက်နေပါသည်တဲ့ဘုရား။ တပည့်တော်မတို့မှာ တစ်ညတလေဆို အရှင်ဘုရားကို အချိန်တို့ကို အကုန်ခံ ခိုင်းနေစရာ မလိုပါဘုရား။ အခုဟာက ညတိုင်းဘုရား။ တစ်လ ပြည့်တော့မယ်။ တပည့်တော်မတို့ ညတိုင်း အိပ်ရေး ပျက်ကြရပါသည်ဘုရား။ အိပ်ရေး ပျက်ရုံတင် မကတော့ဘဲ အခုက တပည့်တော်တို့မှာ ငရဲ ကြီးနေကြပါပီဘုရား။

ဒီဘက်က ဒကာမက ပြောနိုင်သည်ထားဦး သိရီလင်ကာဘက်မှ ဦးပဇင်းကရော အဲလို အချိန်ကုန်ခံပီး ပြောရကောင်းလား ဆိုပီး တပည့်တော်တို့မှာ ညတိုင်း စိတ်နှင့် ပြစ်မှား နေကြရပါသည်ဘုရား။
တပည့်တော် မေးလိုသည် မှာ …..
၁။ စာသင်သား ဘုန်းဘုန်းများသည် ဒကာ ဒကာမများနှင့် အရေးမပါသည့် လူမှုရေး ဆွေမျိုး အကြောင်းများကို ထို ကဲ့သို့ ပြောနေလို့ ရပါသလားဘုရား။ ညတိုင်း ပြောနေကြသည်မှာ ည ဂ နာရီခန့်မှ နေ၍ အနည်းဆုံး မပြောဘူး ဆိုသောညသည် ည ၁၂ နာရီထိ ပြောပါသည်ဘုရား။ ထို့ကြောင့် မေးမြန်း ပါရစေပါဘုရား။
၂။ ထိုသို့ ပြောနေကြသည့် ဘုရားအကြောင်း တရားအကြောင်း မဟုတ်သော အလာပ သလာပ စကားများ ပြောနေသည်ကို ကာယကံရှင်မှ စပီကာဖွင့် ပြောနေသဖြင့် ၂ ဖက် စလုံးဧ။် စကားများကို တပည့်တော် မတို့က မကြားချင်မှ အဆုံးပါဘုရား။ ထို့ကြောင့် တပည့်တော်မတို့မှာ စာသင်နေသည် ဆိုသည့် ဘုန်းကြီးကလဲ အဲလောက်တောင် ပြောနိုင်ရကောင်းလားဆိုပီး ညတိုင်း စိတ်နှင့် ဒေါသထွက်နေကြရပါ သဖြင့် တပည့်တော်မတို့မှာ အဘယ်ကဲ့သို့သော အပြစ်များ ရောက်နိုင်ပါသလဲဆိုတာ ဖြေကြား ပေးတော်မူပါဘုရား။
၃။ သိရီလင်ကာမှ ဦးပဇင်း (ဘွဲ.နာမည် မသိပါ အညာဘက်မှ ဖြစ်ပါသည် )ကိုလဲ သိစေချင်ပါသည်ဘုရား။
ထိုကဲ့သို့သော ဦးပဇင်းများဧ။် လုပ်ရပ်များကြောင့် ဗုဒ္ဓဘာသာကို အကြည်အညိုပျက် အရိုအသေ ပျက်စေ သည်ဟု မြင်ပါသည်ဘုရား။ တပည့်တော်မဧ။် အမြင်မှားနေပါက ပြင်ပေးတော်မူပါဘုရား ။တပည့်တော်မဧ။် စာကို ဘုန်းဘုန်း အဆင်ပြေသလို တည်းဖြတ်၍ ဖြေကြားပေးတော်မူပါဘုရား။
တပည့်တော်ဧ။် နာမည်ကို မရေးပါနှင့်ဘုရား
အရှင်ဘုရား အစဉ်အမြဲ ကျန်းမာ ရွှင်လန်းပါစေဘုရား။
(ဒကာမ-စင်္ကာပူ)
၁၁-၁၂-၂၀၁၁
ဟလို-ဟလို----

00000000000000000

သို့ စင်္ကာပူမှ ဒကာမလေး
ရှေးဦးစွာ ဘုန်းဘုန်းဆိုက်ကို အားပေးဖော်ရတဲ့ သီတဂူစတား၏ ပရိသတ်တစ်ယောက် ကျေးဇူးအထူးတင်ပါသည်။ ဘုန်းဘုန်း၏ ဆိုက်ထဲမှာ ရဟန်းနဲ့အမျိုးသမီး ပို့စ်တွေ အပိုင်း (၁-၂) တင်ပြီးသားရှိပါတယ်။ အဲဒါ အရင် ဖတ်ကြည့်ပါအုန်း။
မေးခွန်းတွေကို မဆွေးနွေးခင် လူမှုရေးအသိအကြောင်းလေး ပြောကြရအောင်၊ စောစောက ဒကာမပြောပြတဲ့ ဇာတ်လမ်းထဲက ဘုန်းဘုန်းက အညာသားဆိုတော့ ဘုန်းဘုန်းက ရီချင်သွားတယ်၊ ဘာလို့လဲဆိုတော့ ဘုန်းဘုန်းကလဲ အညာသားလေ၊ စစ်ကိုင်းသားဆိုတော့ အညာသားစစ်စစ်ကြီးပေါ့နော်။ ဘုန်းဘုန်းများ ဖြစ်နေမလားppppp။

အချင်းချင်းနားလည်မှု
တခန်းတည်းမှာ အတူနေသူတွေဆိုတာ တစ်ဦးအပေါ်တဦး နားလည်ပေးသင့်ပါတယ်၊ အိပ်ချိန် အနားယူချိန်မှာ ဘယ်လိုနည်းနဲ့ပဲ ဖြစ်ဖြစ် ကိုယ့်ကြောင့် သူတစ်ပါးအတွက် အနှောက်အယှက် မဖြစ်စေရဘူး။ အိပ်ချိန်မှာ Gtalk ကနေ စကား အကျယ်ကြီးပြောတာတို့ တယ်လီဖုန်းနဲ့ အကျယ်ကြီးပြောတာတို့ အနားယူနေသူတွေကို အနှောက်အယှက်ဖြစ်စေတာ အမှန်ပါ။ မဖြစ်သာလို့ ပြောချင်ရင်တောင် အပြင်ဘက် ထွက်ပြောသင့်ပါတယ်။ အချင်းအချင်း လေးစားခြင်း စာနာခြင်း အားနာခြင်း စတဲ့ တဦးအပေါ်တဦး နားလည်တဲ့စိတ်ရှိရပါမည်။ ဘုန်းကြီးနဲ့ အချိန်မတော် စပီကာဖွင့်ပြီး တယ်လီဖုန်းပြောနေတာကတော့ လူမှုရေး နားမလည်လို့လား၊အရွဲ့  တိုက်တာလား၊ တစ်ယောက်ယောက်နဲ့ စကားပြောနေတာကို ထင်ယောင်ထင်မှားဖြစ်အောင် ကြွားနေတာလား၊ တဖက်လူကို ဂရုမစိုက်တာလား ဆိုတဲ့ လားများစွာ ရှိနေပါတယ်။
ဘုန်းဘုန်းတို့လည်း ဘုံဘေမှာ တစ်ခန်းကို ၄ ပါးနေရပါတယ်၊ ပိုက်ဆံပေးပြီး အပြင်မှာ အိမ်ခန်းငှါးမနေနိုင်လို့ တက္ကသိုလ်က ပေးတဲ့ Local အဆောင်မှာပဲ အခန်းကျင်းလေးထဲ ၄ပါး နေရပါတယ်၊ တပါးနဲ့တပါး တစ်တောင်လောက်ရှိတဲ့ စားပွဲခုံလေးတစ်လုံးပဲ ခြားထားပါတယ်၊ ဒီအထဲ တစ်ယောက်ယောက်က လေအကျယ်ကြီး လည်လို့ မနဲအောင့်အီးနေရတာပါ။ ကိုယ်ကိုယ်တိုင်ကတော့ ပတ်ဝန်းကျင်ကို အသံကော တခြားနှောက်ယှက်စေတဲ့ အရာကို မဖြစ်အောင် အတတ်နိုင်ဆုံး ထိန်းပါတယ်။ ဒါလဲ လူ့ကျင့်ဝတ်တစ်မျိုးဖြစ်ပါတယ်။

ဒကာမအနေနဲ့ အဝေးက ဘုန်းကြီးကို လှမ်းပြောနေမဲ့အစား အနီးဆုံးလူကို နားလည်အောင်ပြောသင့်ပါတယ်၊ တချို့က လူမှုရေးတွေ သိပ်အလေးထားတာ မဟုတ်ဘူး၊ အဲဒီလို ပုဂ္ဂိုလ်မျိုးကိုတော့ အားမနာပါနဲ့၊ ပြောစရာရှိတာ ပြောလိုက်ပါ။ ဘုန်းကြီးနဲ့ ဒကာမ ဆွေးမျိုးပဲ တော်သည်ပဲဖြစ်စေ၊ မတော်သည်ဖြစ်စေ၊ ဘယ်လိုပဲတော်စပ်တော်စပ် ဘာပဲ ပြောပြော သူတို့ဘာသာ ပြောပါစေ၊ သူတို့ရဲ့ ကိုယ်ရေးကိုယ်တာ ကိစ္စ၊ ဒါပေမဲ့ ပတ်ဝန်းကျင်ကို အနှောက်အယှက် ဖြစ်လာပြီဆိုရင်တော့ သူဘာပဲ ဖြစ်ဖြစ် ပြောသာ ပြောလိုက်ပါ။ The man who is unable to live in society must be a beast or God. ဒီအင်္ဂလိပ်စာ စာပိုဒ်ကလေးက ဒကာမအတွက် အသုံးဝင်မှာပါ၊ လူအဖွဲအစည်း, ပတ်ဝန်းကျင်နဲ့ လိုက်လျောညီထွေ မနေတတ်သူဟာ အသိဥာဏ်ကင်းမဲ့တဲ့ တိရိစ္ဆာန်ပဲ ဖြစ်ရမည်၊ ဒါမှမဟုတ် လူသားမဟုတ်တဲ့ ဘုရားလျှင်လဲ ဖြစ်ရမည်တဲ့။ သူငယ်ချင်းတစ်ယောက် Gtalk ဘောက်ထဲမှာ ရေးထားတာ တွေ့တာနဲ့ ကူးယူထားလိုက်တာပါ။ ဒကာမရဲ့ မေးခွန်းတွေနဲ့ ပတ်သက်ပြီး တစ်ခုချင်းကို ပြောပြပါ့မယ်။

အမေး (၁)

၁။ စာသင်သား ဘုန်းဘုန်းများသည် ဒကာ ဒကာမများနှင့် အရေးမပါသည့် လူမှုရေး ဆွေမျိုး အကြောင်းများကို ထို ကဲ့သို့ ပြောနေလို့ ရပါသလားဘုရား။ ညတိုင်း ပြောနေကြသည်မှာ ည ဂ နာရီခန့်မှ နေ၍ အနည်းဆုံး မပြောဘူး ဆိုသောညသည် ည ၁၂ နာရီထိ ပြောပါသည်ဘုရား။ ထို့ကြောင့် မေးမြန်း ပါရစေပါဘုရား။

အဖြေ

စာသင်သားပဲ ဖြစ်ဖြစ် တရားအားထုတ်နေတဲ့ ဘုန်းကြီးပဲ ဖြစ်ဖြစ် လူဝတ်ကြောင်ပဲ ဖြစ်ဖြစ် အရေမရ အဖတ်မရ အရေးမပါသည့် စကားပြောနေရင်တော့ မုသာဝါဒ ၄ မျိုးထဲက သမ္ဖပ္ပလာပ၀ါစာ ခေါ်တာပေါ့။ ၀ိနည်းသိက္ခာပုဒ်အရ အပြစ်မရှိဘူးဆိုရင်တောင် သုတ္တန်သဘောအရ အဘိဓမ္မာ သဘောအရ ဘုန်းကြီးရော လူဝတ်ကြောင် ဒကာမရော အပြစ်ဖြစ်ပါတယ်။ တိရစ္ဆာနကထာ ၁၀ မျိုးရှိပါတယ်၊ မဂ်ဖိုလ်နိဗ္ဗာန်မှ သွေဖယ်သော စကားမျိုးဖြစ်သည်အတွက် အပြစ်ဖြစ်၊ ဂေဟဿိတပေမ၊ ဂေဟဿိတ တဏှာကို ဖြစ်စေနိုင်သောကြောင့်လည်း အကုသိုလ်က ဖြစ်ပြန်။ လူတစ်ကိုယ် သိုလ်နှစ်ခုတဲ့၊ လူတစ်ကိုယ်မှာ ကုသိုလ်နဲ့ အကုသိုလ်ပဲ ရှိတာ၊ အကုသိုလ်မဖြစ်ရင် ကုသိုလ်ဖြစ်ပေါ့။ ကုသိုလ်မဖြစ်ရင် အကုသိုလ်ဖြစ်ပေါ့၊ ကုသိုလ် မဖြစ်စေတဲ့ စကားတွေ ပြောနေကြရင် နှစ်ယောက်လုံး အကုသိုလ်ဖြစ်မှာပေါ့။ ကုသိုလ်ဖြစ်စေတဲ့ ဘာသာရေးအကြောင်း၊ ဘာသာရေးနဲ နှီးနွယ်နေတဲ့ စကားတွေ ပြောနေရင်တော့ အကုသိုလ်မဖြစ်ဘူးပေါ့။
စာပေမှာ ပြဆိုထားတဲ့ ဘုန်းကြီးပဲဖြစ်ဖြစ် လူပဲဖြစ်ဖြစ် မဂ်ဖိုလ်နိဗ္ဗာန်လမ်းကြောင်းကို လျှောက်ချင်သူတိုင်း မပြောသင့်သော စကားများဟူ၍ ပြဆိုထားသည်။ တိရစ္ဆာနကထာ ဟူ၍ဆိုအပ်၏။

တိရစ္ဆာနကထာ (၁၀)
စာပေက အနိယျာနိကတ္တာ-၀ဋ်ဆင်းရဲမှ လွတ်မြောက်ကြောင်း စကားလဲမဟုတ်၊ သဂ္ဂမောက္ခမဂ္ဂါနံ တိရစ္ဆာနဘူတံ- နတ်ပြည် မဂ်ဖိုလ် နိဗ္ဗာန်တို့ လမ်းကြောင်းမှ ဖီလာကန့်လန့် ဆန့်ကျင်သော သဘောရှိသောကြောင့် တိရစ္ဆာနကထာဟု ဆို၏။ သံယုတ်ပါဠိတော်မှ လာသော ကထာ ဆယ်မျိုးကို အောက်ပါအတိုင်းမှတ်ပါလေ။

၁။ ရာဇကထာ-ဘယ်မင်းက ဘယ်လို၊ ဘယ်သမ္မတက ဘယ်လို၊ ဘယ်ဝန်ကြီးချုပ်က ဘယ်လို စသည်ဖြင့် နိုင်ငံ့အကြီးဆုံးဟုဆိုသော သူတို့၏ အကြောင်းကို ပြောခြင်း။
၂။ စောရကထာ- သူခိုး ဓားပြ တို့၏ အကြောင်း ပြောခြင်း။
၃။ မဟာမတ္တကာ-၀န်ကြီးများ အမတ်ကြီးများ အကြောင်းကို ပြောခြင်း။
၎။ သေနာကထာ-စစ်တပ်နှင့်ပတ်သက်သော အကြောင်း ပြောခြင်း။
၅။ ဘယကထာ-ကြောက်စရာ လန့်စရာ အကြောက်တရားနှင့်စပ်ပြီး ပြောခြင်း။
၆။ ယုဒ္ဓကထာ-စစ်ပွဲအကြောင်း ရန်ပွဲအကြောင်း တိုက်ပွဲအကြောင်းများ ပြောခြင်း။
၇။ အန္နကထာ-အစားအစာနှင့် ပတ်သက်သော အကြောင်း ပြောခြင်း။
၈။ ပါနကထာ- သောက်ဖွယ်နှင့်ပတ်သက်ပြီး ပြောခြင်း။
၉။ ၀တ္ထကထာ- အ၀တ်အစားနှင့်ပတ်သက်ပြီး ပြောခြင်း။
၁၀။ သယနကထာ- အိပ်ယာနေရာနှင့်ပတ်သက်ပြီး ပြောခြင်းများ နှင့် အဋ္ဌကထာဆရာက ဆိုသေးတယ်၊ ဥာတိကထာ- ဆွေမျိုးများအကြောင်း၊ ဂါမကထာ- နိဂမကထာ-နဂရကထာ- မြို့ရွာအကြောင်း။ ဣတ္ထိကထာ- အမျိုးသမီးများအကြောင်း စသည်ဖြင့် လူတို့နှင့်စပ်သော စကားများ ၃၂ ခုထိ ပြဆိုထားသည်။

ထိုစကားကများသည် မဂ်ဖိုလ် နိဗ္ဗာန် တို့နှင့် မဆက်စပ်ဘဲ အိမ်၌နေသူတို့၏ စကားများနှင့်သာ ဆက်စပ်၍ ပြောခြင်းကို ဆိုလိုသည်။ စာအလိုအရ ဂေဟဿိတ ကထာများ ဟု ခေါ်သည်။ ဒီတော့ ဒကာမ မေးတဲ့ အမေးကို ဤကထာ ၁၀ မျိုးနဲ့ တိုင်းတာကြည့်ပါ၊ ဘယ်သူတွေ ဘာတွေ ပြောပြောနေ ကိုယ် မပြောဖို့က အဓိကဖြစ်သည်။ ရဟန်းပဲ ဖြစ်ဖြစ် လူဝတ်ကြောင်ပဲ ဖြစ်ဖြစ် ပြောချင်တာ ပြောပါစေပေါ့။ သူ့အကြောင်းနဲ့သူ သွားမှာလေ။ ကိုယ်က အနေသာကြီးပါ၊ သို့သော်လည်း ပတ်ဝန်းကျင်ကို အနှောက်အယှက် ဖြစ်လာရင်တော့ အကျိုးအကြောင်း နားလည်အောင် ပြောပြရမှာပေါ့။

လူမှုရေးတွေ ပရဟိတတွေ လုပ်နေသူတွေကတော့ မေတ္တာ ကရုဏာတရားတို့ အခြေခံပြီး တချို့ လူမှုရေးစကားတွေ ပြောကြရသည်။ ဒါတွေက လောကအပြစ်မဟုတ်သဖြင့် အပြစ်မဟုတ်ဟု ယူဆပါသည်။ သူတပါးလည်း မထိခိုက် ကိုယ့်ကိုယ်ကိုလည်း မထိခိုက်ဘူးဆိုရင် အပြစ်မဖြစ်ပါ။ မိမိကိုယ်ပဲ ဖြစ်ဖြစ် သူတပါးကိုပဲ ဖြစ်ဖြစ် ထိခိုက်နေရင်တော့ အပြစ်ဖြစ်သည်။ ဒါကို အန၀ဇ္ဇ ဟုခေါ်သည်။ နောက်တစ်ခုက သုခ၀ိပါက- မိမိအတွက်သော်၎င်း၊ သူတပါးအတွက်၎င်း အကျိုးရှိစေမယ်ဆိုရင် ပြောသင့်ပါသည်။ ဒီလောက်ဆိုရင် ဒီမေးခွန်းအတွက် အဆင်ပြေမယ်ထင်ပါတယ်။

အမေး (၂)

၂။ ထိုသို့ ပြောနေကြသည့် ဘုရားအကြောင်း တရားအကြောင်း မဟုတ်သော အလ္လာပ သလ္လာပ စကားများ ပြောနေသည်ကို ကာယကံရှင်မှ စပီကာဖွင့် ပြောနေသဖြင့် ၂ ဖက် စလုံးဧ။် စကားများကို တပည့်တော် မတို့က မကြားချင်မှ အဆုံးပါဘုရား။ ထို့ကြောင့် တပည့်တော်မတို့မှာ စာသင်နေသည် ဆိုသည့် ဘုန်းကြီးကလဲ အဲလောက်တောင် ပြောနိုင်ရကောင်းလားဆိုပီး ညတိုင်း စိတ်နှင့် ဒေါသထွက်နေကြရပါ သဖြင့် တပည့်တော်မတို့မှာ အဘယ်ကဲ့သို့သော အပြစ်များ ရောက်နိုင်ပါသလဲဆိုတာ ဖြေကြား ပေးတော်မူပါဘုရား။

အဖြေ

စပီကာ ဖွင့်ပြောတာကတော့ နားသိပ်မကောင်းလို့နဲ့ တူပါတယ် pppppp။ ဒါမှမဟုတ် ဒီလိုမိတ်ဆွေမျိုး သူ့မှာ ရှိတယ်ဆိုတာ ကြွားချင်လို့လား။ တခုခုပေါ့နော်။ အဲဒါကတော့ သူမကိုယ်တိုင်ကိုပဲ မေးကြည့်မှ ရမယ်ထင်တယ်၊ စာသင်နေသည့် ဆိုသည့် ဘုန်းကြီးကတော့ သူ့မှာ ပြောမကုန်တဲ့ ဗဟုသုတတွေ များနေလို့ ဖောက်သည်ချနေတာ နေမှာပါ ppppp။ ဒကာမအနေနဲ့ သူတို့ပြောတာတွေကြားပြီး ဒေါသထွက်နေတာကတော့ အေးချမ်းနေတဲ့ ကိုယ့်ကိုယ်ကို မီးမြိုက်နေသလိုပါပဲ၊ ယောနိသော မနသိကာရ မထားတတ်ရင် အဲဒီလို အပူလောင်ခံနေရမှာပါ။ အဲဒီလို အပူလောင်မခံရအောင် မေတ္တာ များများ ပွားလိုက်ပါ။ သူတို့မှာ ပြောမကုန်တဲ့ ဗဟုသုတတွေ ဖလှယ်နေကြတာပါလားလို့ အကောင်းဘက်က တွေးပြီး မေတ္တာသာ နာနာ ဖိပို့လိုက်။ ဒိထက်မက ပြောနိုင်ကြပါစေပေါ့ ppppp။ ဘုန်းဘုန်းမှာလဲ ပြောမကုန်တဲ့ စကားတွေ ရှိပါတယ် ဒါပေမဲ့ နားထောင်ပေမဲ့ သူမရှိတာရယ်၊ ဖုန်းဖိုးမတတ်နိုင်ရယ်ကြောင့် ပြောမကုန်တဲ့ စကားတွေ ဒီလိုပဲ အလကား ဖြစ်ကုန်ပြီထင်ပါရဲ့။ သို့သော်လည်း ပါးစပ်က မပြောပေမဲ့ စာတွေနဲ့ ရေးပြီး ပို့စ်မှာ စာဖတ်ပရိသတ်ကို အများကြီး ပြောထားပါတယ်။ ဒကာမရေ- ဘယ်သူ့အကြောင်းကြောင့်ပဲ ဖြစ်ဖြစ် ကိုယ့်ကိုယ်ကိုတော့ အကုသိုလ် အဖြစ်မခံပါနဲ့။

အမေး (၃)

၃။ တတိယ မေးခွန်းကတော့- သိရီလင်ကာမှ ဦးပဇင်း (ဘွဲ့နာမည် မသိပါ အညာဘက်မှ ဖြစ်ပါသည်) ကိုလဲ သိစေချင်ပါသည်ဘုရား။

အဖြေ

အညာသားဆိုတော့ သီတဂူစတားများ ဖြစ်နေမလားppppp။ သီတဂူစတားလဲ အညာသားပဲလေ၊ အညာသားဆိုတော့ အညာသားသတ္တိ ပြနေတာ နေမှာပါ။ သီတဂူစတားတော့ ဘာသတ္တိမှ မရှိလို့ မပြရဲပါဘူး။
ဒကာမရေ- ဖြေတာလေးတွေကို ပျော်စေ ပျက်စေ ဖြေထားတယ် ဆိုပေမဲ့ အမှန်တရားမဟုတ်ဘူးလို့တော့ မတွေးလိုက်ပါနဲ့နော်။
ရွှင်လန်းချမ်းမြေ့ပါစေ
သီတဂူစတား
၁၃-၁၂-၂၀၁၁

Posted in: အမေး+အဖြေ