နေ (၇)စင်းထွက်သော်

နေ (၇)စင်းထွက်သော်
(သီတဂူစတား စာတို ပေတို)

ပူလွန်းတယ်--
ညက တော်တော်နဲ့လည်း အိပ်မပျော်၊ မနက်ရောက်တော့လဲ စောစော အိပ်ယာက နိုးနေသည်၊ အိပ်ရေးမ၀ ဖြစ်နေသည်။ ခန္ဓာကိုယ်နဲ့ ထိတွေ့သည့် အရာမှန်သမျှတို့ ပူနေသည်၊ ခန္ဓာကိုယ်မှာ ဘာမှ မကပ်ဘဲ တာဇံလို နေချင်စိတ်တွေတောင် ဖြစ်လာမိသည်။

မွမ်ဘိုင်း (ဘုံဘေ) သည် အပူချိန် ၃၈ ရှိနေပြီ၊ ပူစပ်စပ်ရှိလှသည်၊ မေလအကုန်ထိ ပူမည်၊ မေလကုန်ပိုင်းဆိုရင်တော့ မိုး စရွာမည်။ ဒီအချိန် အိန္ဒိယပြည် ခရီးသွားလို့ မကောင်း၊ ပင်လယ်ကမ်းခြေရှိ မွမ်ဘိုင်းလို မြို့မှာတောင် ဒီလောက်ပူနေပြီဆိုရင် နယူးဒေလီ၊ ဗုဒ္ဓဂယာ၊ ဗာရာဏသီ စတဲ့ ဒေသတွေမှာ ၄၀-၄၂ အထိရှိနေသဖြင့် ကျောပြင်တွေ လောင်မတတ် ပူပြင်းသည်ဟု သိရသည်။ ဒီကနေ့ နေရာအနံ့အပြား “ပူလိုက်တာ ပူလိုက်တာ ပူလိုက်တာ”ဟူ၍ ငြီးထွားနေကြရသည်။ ဒါတောင် နေတစ်စင်းပဲ ရှိသေးတာနော်--
နေ ၂စင်းထွက်သော်----
နေ ၃စင်း ထွက်သော်---
နေ ၄စင်း ထွက်သော်----
နေ ၅စင်း ထွက်သော်----
နေ ၆စင်း ထွက်သော်---
နေ (၇)စင်း ထွက်လာလို့ကတော့----
ချောင်းတွေ မြစ်တွေ ခန်းချောက်သွားရုံမက ပင်လည်ရေတွေပါခန်းသွားမည်၊ တောတောင်တွေက မီးခိုးတွေ ထွက်လာမည်၊ ထုထည်ကြီးမားသည် တောင်လုံးတွေပါ မကျန် မီးလောင်မည်၊ မြင့်မိုရ်တောင်ကြီး မီးပြာကျမည်၊ ထိုကမ္ဘာမီးကြီးစွဲသော် မီးပြာကိုတောင် တွေ့ရမည်မဟုတ် အကြွင်းအကျန်မရှိ လောင်ကျွမ်းပါလိမ့်မည်။ လူ့လောက၊ နတ်လောက၊ ဗြဟ္မပြည် ပထမဈာန်ဘုံအထိ မီးဟုန်းဟုန်းတောက်မည်။

ထိုကဲ့သို့သော နေ ၇စင်းထွက်သည့် အချိန် သတ္တ၀ါတိုင်း ကြုံခဲ့ကြဖူးပြီ၊ နောင်လဲ ကြုံကြရဦးမည်၊ “ဒီလို အဖြစ်မျိုး တကယ်ရှိခဲ့သည်၊ ရှိလိမ့်မည်”ဟု သောတာပန် အရိယာမှ တစ်ပါး မည်သူ ယုံနိုင်လိမ့်မည်နည်း၊ ဘ၀တဏှာ၊ အ၀ိဇ္ဇာများကား အလွန်ကြောက်စရာ။

ထုထည်ကြီးမားသည် တောတွေ တောင်လုံးကြီးတွေ၊ မြင့်မိုရ်တောင်တွေတောင် နောက်ဆုံး မီးဟုန်းဟုန်းတောက်ပြီး ပျက်စီးကြရမည်၊ သွေးသားနဲ့ တည်ဆောက်ထားသည့် ခန္ဓာကား ဘယ်ဆိုဖွယ်ရှိအံ့။ အရာအားလုံး ဘာမှ မခိုင်မြဲ၊ အနိစ္စပါတကားးးး။

အပူကောင် အပူမတွေ
ကဆုန် နယုန် ဆွေ့ဆွေ့ခုန်သည့် ပူဟုန်တောက်ထဲ နေပူထဲမှာ အားလုံးသော သတ္တ၀ါတွေဟာ အတွင်းက ကိလေသာအပူ၊ အပြင်က အာရုံငါးပါးတည်းဟုသော အပူ နှစ်ရပ်တို့ ဖိညှပ်သဖြင့် အပူကောင် အပူမတွေ ဖြစ်နေကြရပါသည်။ ကမ္ဘာတ၀ှမ်းလုံး အပြင်က ပူ၊ အတွင်းကလဲ ပူနေကြသဖြင့် အပူသည်တွေ ဖြစ်နေကြရသည်။

ကိလောသာ အပူသည်တွေ ဖြစ်နေသရွေ့ နေတစ်စင်းအပူမှ နေ ၇နှစ်စင်းအပူတို့ ခံကြရလိမ့်ဦးမည်၊ ဒီထက်ပူရှိန်အားပြင်းသည်ကား ငရဲမီးပူပင် ဖြစ်သည်။ ထို့ကြောင့် မေတ္တာမိုးတွေ ရွာချကြ၊ ကရုဏာရေတွေ ဖြန်းကြ၊ မုဒိတာ အအေးတွေ တိုက်ကြခြင်းဖြင့် ကမ္ဘာကြီး အေးချမ်းပါလိမ့်မည်။

စာတိုပေတိုလေးကို ဓာတ်ပုံလေးတစ်ပုံထည့်ပြီး ပို့စ်အဖြစ် တင်ဖို့ ခေါင်းစဉ်နဲ့ အစင်ပြေမည့် very hot images ဆိုပြီး ဂူဂဲလ်မှာ ရှာလိုက်တာ မြို့ထဲ ရပ်ကွက်ထဲက မိန်းမတာဇံတွေ တွေ့လိုက်ရသဖြင့် ရယ်မိသေးတယ်၊ ဒီပုံတွေနဲ့ တင်လိုက်လို့ကတော့ very hot ဖြစ်သွားမှာပဲ တွေးပြီး ပြုံးမိသည်။ ကိုယ်လိုချင်တာက ရာသီဥတု hot တာကို လိုချင်တာ ဘယ့်နှယ် သူ ဟော့ကြီးက အ၀တ်မပါတဲ့ တာဇံမ ဟော့ကြီးဖြစ်နေတာ။

ရွှင်လန်းချမ်းမြေ့ပါစေ
သီတဂူစတား
၃၀-၄-၂၀၁၃

Posted in: စာတို ပေတို